Янгиликлар
31
Shańaraqtıń muqades dárgáy. Puqaralardıń nızamlı neke dizimge alınıwı nátiyjesinde júzege keletuǵın huqıq hám májbúriyatlar.
Shańaraq-insan ómiri máńgiligi hám áwladlar dawamlılıǵın támiynlewshi qádriyatlar besigi, keleshek áwladlar ushın biytákrar tárbiya qorǵanı sanaladı. Sonlıqtan xalqımız ázelden shańaraqtı eń muqaddes mákan dep bilip onıń mángiligin saqlaw ushın barlıq talaplarına ámel etip jasap kelmekte. Sonday-aq, shańaraqtı bekkemlew salasında kóplep unamlı isler ámelge asırılıwı menen bir qatarda, hayal-qızlarǵa bolǵan itibarda artıp barmaqta. Bul álbette, jámiyette bolıp atırǵan barlıq rawajlanıwlar menen de baylanıslı.
Ózbekistan Respublikası Shańaraq kodeksiniń 14 hám 15-statiyalarına tiykar nekeleniwshilerdiń óz-ara kelismi hám olardıń neke jasına jetkenlikleri neke dúziwdiń tiykarǵı shártleriniń biri esaplanadı.
Neke dúziwde hár bir puqara bul haqqında belgilengen úlgidegi arza menen múrájat etken kúnnen 1 ay ótip ózleriniń jasap turǵan PHAJ uyımı tárepinen ámelge asırıladı.
PHAJ organları tárepinen nekeleniwshi shaxslardıń neke dúzilgenligin dizimge alıw haqqındaǵı arzanı qabıl etip alıwda belgilengen tártipte medicinalıq kórikten ótiw ushın jollama beriledi.
Joqarıda keltirilgen nızamlı huqıq hám erkinlikler menen bir qatarda ayırım tártiptegi sheklewlerde belgilengen.
Ózbekstan Respublikası Shańaraq Kodeksınıń 16-statyasına tiykar tómendegi jaǵdaylarda nekeni dizimge alıwǵa jol qoyılmaydı:
1)Erli-zayıptıń birewi basqa shaxs penen nekede turǵan hallarda,
2)Óz-ara tuwısqanlar ortasında,
3)Birewi ruwxiy kesel yakı qarım-qatnas uqıplılıǵına iye emes dep tabılǵan bolsa.
Sonday-aq, neke hámde shańaraq penen baylanıslı elimiz nızamshılıq tarawında alıp barılıp atırǵan reformalarǵa toqtalıp ótsek, Ózbekstan Respublikasınıń 2022-jıl 14-martdaǵı ÓRQ-759 -sanlı Nızamına tiykar Shańaraq kodeksıne qatar ózgerisler kiritilip, buǵan kóre, neke dúzilgenligi haqqında erli-zayptıń shaxsın tastıyıqlaytuǵın hújjetlerine (pasportı, áskeriy bileti hám b.) belgi qoyıw hám qaytıs bolǵan puqaranıń shaxsın tastıyıqlaytuǵın hújjetlerin (pasportı, áskeriy bileti hám b.) PHAJ bólimi tárepinen alıp qalıw tártibi biykar etiliwi nátiyjesinde kópǵana byurokratik tosıqlarǵa tıyım salındı desek asıra aytqan bolmaymız.
Bozataw rayonı jańdan ashılǵan rayonlar qatarına kiriwine qaramastan, PHAJ bólimimiz tárepinen 2021-jıl dawamında jámi 146 neke shártnaması hámde 216 tuwılǵanlıq haqqında akt jazıwı dizimge alınǵan bolsa, ótken 2022-jıl dawamında jámi 103 neke shártnaması hám 244 tuwılǵanlıq haqqında akt jazıwı dizimge alınıwı joqarıda atap ótilgen Shańaraq muqaddesliginiń ayqın dálilleriniń biri desek qátelespeymiz.
Bozataw rayonı ádillik bólimi PHAJ
bólimi baslıǵı T.Mambetmuratova