Янгиликлар
11
Nekeni haqıyqıy emes dep tabıw
Nekeni haqıyqıy emes dep tabıw- bul dúzilgen nekeniń haqıyqıy ekenligin tán almaslıq. Nekeni haqıyqıy emes dep tabıw tek ǵana sud tártibinde ámelge asırılıp, tómendegiler tiykar boladı: neke ózleriniń qálewi menen dúzilmegen, ózge shaxslardıń zorlawı yaki aldaw aqıbetinde dúzilgen bolsa, nekeniń belgilengen jası buzılǵanda, nekeleniwshilerdiń biriniń dizimge alınǵan basqa nekesi bolsa, násil shejeresi boyınsha tuwrı tutasqan qarındaslar ortasında, tuwısqan hám ógey aǵa-iniler menen apa-sińliler ortasında, sonday aq perzentlikke alıwshılar menen perzentlikke alınǵanlar ortasında, nekeleniwshilerdiń biri (ruhıy keselligi yaki aqıl zayıplılıǵı) sebepli sud tárepinen háreket uqıplılıǵına iye emes dep tabılsa, qálbeki neke, er yamasa hayaldıń shańaraq qurıw maqsetlersiz nekeden ótken bolsa, nekeleniwshilerdiń biri teri keselligi yaki AIJ keselligi barlıǵın ekinshisinen jasırǵanda, eger ekinshi tárep sudqa usınday talap penen múráját etse.
Nekeniń haqıyqıy emes dep tabılıwı, sonday nekeden tuwılǵan yaki nekeni haqıyqıy emes dep tabılǵan kúnnen keyin úsh júz kún ishinde tuwılǵan balalardıń huqıqlarına tásir etpeydi. Sud nekeni haqıyqıy emes dep tabıw haqqındaǵı sheshiwshi qararın shıǵarıwda huqıqı buzılǵan er yamasa hayaldıń Shańaraq kodeksiniń 118-119 statyalarına muwapıq, hayal yamasa erinen támiynat alıw huqıqına iye dep tabıwǵa haqlı, nekeni haqıyqıy emes dep tabıw waqtına shekemgi artırılǵan mal-múlkti bóliwge qarata usı kodekstiń 23,27 hám 28 statyalarında belgilengen qaǵıydaların qollanıwǵa, sonday aq neke shártnamasın tolıq yamasa qısman haqıyqıy dep tabıwga haqlı. Er (hayal) ózine jetkizilgen materiallıq hám ruxıy zıyandı qaplawdı puqaralıq nızam hújjetlerinde názerde tutılǵan qaǵıydalar boyınsha talap etiwge haqlı. Er (hayal) nekeni haqıyqıy emes dep tabılǵanda, nekesi dúzilgen waqıtta tańlaǵan familiyasın saqlap qalıwına haqlı. Nekeni haqıyqıy emes dep tabıw haqqında sud shıǵarǵan sheshiwshi qararı nızamlı kúshke kirgennen keyin, on kún ishinde nekesi dizimge alınǵan PHAJ organına jiberiledi.
Kegeyli rayonı ádillik bólimi
PHAJ bólimi baslıǵı Erjanova Inkar