Янгиликлар
01
Qaraqalpaqstan Respublikasında 2022-2024-jıllarda xalıq salamatlıǵın qorǵawdı jánede kúsheytiw
“Qaraqalpaqstan Respublikasında 2022-2024-jıllarda xalıq salamatlıǵın qorǵawdı jánede kúsheytiw haqqında”ǵı 2022-jıl 07-iyul kúni PQ-310-sanlı Prezident qararı qabıllanǵan edi usı qararǵa muwapıq Qaraqalpaqstan Respublikasında sozılmalı keselligi hám mayıplıǵı bolǵan balalar ushın 120 orınlı Balalar medicinalıq reabilitatsiya orayı, 80 orınlı Balalar ftiziatriya sanatoriyası, Nókis qalası medicina birlespesi quramında 20 orınlı xirurgiya bólimi, Qaraqalpaqstan Respublikası kóp tarmaqlı medicina orayınıń xirurgiya bólimi negizinde akademik V.Vohidov atındaǵı Respublika qánigelestirilgen xirurgiya ilimiy-ámeliy medicina orayınıń Nókis filialı hám Nókis qalası medicina birlespesi quramında ámeldegi orınlar sheńberinde awır nawqaslar ushın 20 orınlı palliativ járdem kórsetetuǵın bólim shólkemlestirildi.
Kóp tarmaqlı oraylıq poliklinika hám shańaraqlıq poliklinika filialları negizinde 16 shańaraq shıpakerlik punktleri shólkemlestirildi hám balalar arasında kóp ushrasatuǵın keselliklerdi erte anıqlaw maqsetinde 2-10 jaslı balalar arasında gelmintoz, 12-15 jaslı qızlar arasında kemqanlıq keselligi boyınsha skrining programmaları engizildi.
Medicina birlespelerinen uzaqta jaylasqan máhellelerde qosımsha 34 máhellede medicinalıq punktler shólkemlestirildi hám tez medicinalıq járdem xızmeti 63 jańa tez medicinalıq járdem arnawlı avtotransportları menen támiynlendi.
Usı qararǵa tiykar den sawlıqtı saqlaw ministriniń Aralboyı regionında medicinalıq xızmet boyınsha orınbasarı lawazımı engizildi. Ministr orınbasarı óz iskerligi dawamında Aralboyı regionınde tarawǵa tiyisli mashqalalardı qala hám rayonlardıń ayrıqsha ózgesheliginen kelip shıqqan halda ornında sheshiw ushın tiyisli sharalar kóriliwin támiyinleydi.
Leprozoriylarda isleytuǵın barlıq xızmetkerlerdiń lawazım is haqısına 50 procent muǵdarında ústeme belgilenedi.
Qararǵa tiykar keminde 3 jıllıq jumıs stajına iye shańaraq shıpakerlik punktleri shıpakerlerin jergilikli byudjet qarjıları esabınan qayta tayarlaw kurslarında oqıtıw názerde tutılǵan.
Medicina joqarı oqıw ornınıń pitkeriwshileri hám de medicina birlespeleri qánigelerin tez medicinalıq hám qıstawlı járdem xızmetinde islewi ushın tez medicinalıq járdemdi rawajlandırıw fondı qarjıları esabınan qayta tayarlaw kurslarında oqıtıladı.
2022-2024-jıllarda keminde 75 medicina xızmetkerleri abıraylı shet el medicina birlespeleri hám oraylarında bilimlerin jetilistiriw hám stajirovkadan ótew ushın jiberiledi.
Qarar menen Qaraqalpaqstan Respublikasında 2022-2024-jıllarda xalıqqa kórsetiletuǵın medicinalıq hám sanitariyalıq járdeminiń sapa hám nátiyjeliligin asırıw boyınsha qosımsha ilajlar programması tastıyıqlandı.
Qońırat rayonı ádillik bólimi
Yuridikalıq xızmet kórsetiw orayı bas yuriskonsultı R.Yu.Annarazov