Янгиликлар
20
Ata-ana hám perzent quwanıshı...
Balanıń tuwılıwın dizimge alıw-balanıń tuwılǵanlıǵın, onıń ata-anası kim ekenligin, tuwısqanlıǵın tastıyıqlawshı hújjetti beriw ushın tiykar boladı. Bul puqara tolıq huqıqıy uqıplılıqqa iye ekenligin, áskeriy minnetke shaqırılıw jasın, neke jasın hám taǵı basqalardi belgilew ushın zárúr. Demek tuwılıwdı óz waqtında dizimge alıw keshiktirip bolmaytuǵın másele bolıp esaplanadı.
Nızam talabı boyınsha bala tuwılǵannan soń bir ay ishinde tuwılıw haqqında gúwalıq alıw májbúriy bolıp esaplanadı. Tuwılıwdıń dizimge alınbawı balanıń keleshekte shaxsın tastıyıqlawshı hújjetin alıwına, puqaralıq alıwına keri tásirin tiygizedi.
Lekin tilekke qarsı perzentlerine óz waqtında tuwılǵanlıq haqqında gúwalıq almaǵan shańaraqlar da ushırasıp turadı. Jıl basınan búgingi kúnge shekem Tórtkúl rayonı PHAJ bólimi tárepinen 7 balanıń tuwılıwı múddetin ótkerip dizimge alınıp, tuwılǵanlıq haqqında gúwalıqlar berildi. Solardıń biri sıpatında Tórtkúl rayonında jasawshı Diydiyev Nemat hám Rozumbetova Zulayxanıń shaharaǵın mısal etip keltirsek boladı. 2016-jılı tuwılǵan perzentine ayırım sebeplerge bola usı kúnge shekem tuwılǵanlıq haqqında gúwalıq alınbaǵan. Nızam talapları boyınsha tiyisli hújjetleri tayarlanıp, fevral ayında 2016-jıl 25-oktyabrda tuwılǵan Amatjanova Munisa Nemat qızına tuwılǵanlıq haqqında gúwalıq rásmiylestirilip berildi. Bunnan shańaraq aǵzaları minnetdar bolıp, quwanıshınıń shegi joq.
Hár bir ata-ana perzentleriniń keleshegine biypárwa bolmay, perzentlerine tuwılǵanlıq haqqında gúwalıqtı óz waqtında alsa maqsetke muwapıq bolar edi.
Tórtkúl rayonı PHAJ bólimi baslıǵı T.Musaeva