Янгиликлар
01
Jer nızamshılıǵına baylanıslı jańalıqlar
Jer barlıq resurslar ishinde ózine tán ayırıqshalıqqa iye. Mámleketimizde bazar qatnasıqlarına tiykarlanǵan demokratiyalıq huqıqıy mámleket qurıw procesinde sociallıq, ekonomikalıq, mádeniy jaqtan xalıqtıń turmıs dárejesin arttırıw sıyaqlı áhmiyetli wazıypanı muwapaqıyatlı ámelge asırıwda jer baylıqlarınan aqılǵa muwapıq paydalanıw máselesine úlken itibar qaratılmaqta. Bunda jer uchastkaların ajıratıwdıń hámme ushın teń, áshkara hám bazar principlerine tiykarlanǵan tártibin engiziw, jerge tiyisli múlkiy hám huqıqıy qatnasıqlarda turaqlılıqtı támiyinlew, jerlerdi qorǵaw, jer iyeleriniń múlkiy huqıqların kepillew, jánede jerdiń ekonomikalıq bahasın belgilew arqalı onı puqaralıq huqıqıy qatnasıqlar obyekti sıpatında erkin qatnasıqqa kiritiw maqsetinde Ózbekstan Respublikası Prezidentiniń 2021-jılı 8-iyundaǵı “Jer qatnasıqlarında teńlik hám ashkaralıqtı támiyinlew, jerge bolǵan huqıqlardı isenimli qorǵaw hám olardı bazar aktivine aylandırıw shara-ilajları haqqında” ǵı Parmanı qabıl etildi.
Parman menen 2021-jılı 1-avgust sánesinen baslap: jer uchastkaları jeke sektorǵa- múlik hám ijara huqıqı tiykarında, mámleket organları, shólkemleri, karxanaları, puqaralardıń ózin-ózi basqarıw organlarına-turaqlı paydalanıw huqıqı tiykarında ajıratılıwı belgilendi, al óz náwbetinde miyras etip qaldırılatuǵın ómirlik iyelik, turaqlı iyelik, waqtınsha paydalanıw huqıqı menen jer ajıratıw tártibi biykar etildi, bunda aldın ajıratılǵan jer uchastkalarına bolǵan bunday huqıqlar olardıń iyelerinde ámeldegi tártipte saqlanıp qalınatuǵın boldı.
Mámleketimiz rawajlanıwında awıl xojalıǵınıń ornı úlken. Parman tiykarında awıl xojalıǵında jer ajıratıw menen baylanıslı bolǵan áshkara hám ádil tártip engizilip, awıl xojalıǵına mólshellengen jerler barlıq túrdegi awıl xojalıǵı tovar islep shıǵarıwshıları qatnasa alatuǵın ashıq elektron tańlaw juwmaqlarına kóre, tek ǵana ijara huqıqı tiykarında ajıratılatuǵın boldı, al fizikalıq hám yuridikalıq shaxslar ushın awıl xojalıǵına mólshellenbegen jerler múlik huqıqı hám ijara huqıqı tiykarında elektron onlayn-aukcion arqalı realizaciya qılınıwı belgilendi. Mámleket shólkemlerine jer uchastkaları mámleket hám jámiyet mútájlikleri ushın Qaraqalpaqstan Respublikası Ministrler Keńesi, walayatlar hám Tashkent qalası hákimleriniń qararı menen turaqlı paydalanıw huqıqı menen ajıratıladı.
Jer uchastkaları barlıq hallarda tek bos turǵan hám rezervge alınǵan jerlerden ajıratıladı, bir hújjet penen yaki bir waqıttıń ózinde jer uchastkasın alıp qoyıw, rezervge alıw, basqa shaxsqa ajıratıw jer beriw tártibin buzıw esaplanadı hám nızamǵa muwapıq juwapkershilikke tartıw ushın tiykar boladı. Jergilikli mámleket hakimiyatı organlarınıń da túrli hákimshilik aralasıw formaları saplastırıldı, atap ótkende jer qatnasıqlarına tiyisli tómendegi wákillikleri, olar boyınsha qarar, biylik hám basqa túrdegi hújjet qabıl qılıw huqıqı 2021-jılı 1-avgustten baslap biykar etildi:
jer uchastkaların tuwrıdan-tuwrı ajıratıw, paydalanıwǵa beriw, keleshekte ajıratıw ushın rezervke alıw, biriktiriw, abadanlastırıw ushın beriw yaki jerlerdi basqasha jol menen biylik etiw, bundan usı Parmanǵa muwapıq jer uchastkaların mámleket shólkemlerine turaqlı paydalanıwǵa ajıratıw, ashıq tańlaw juwmaqların tastıyıqlaw, ijara shartnamasın imzalaw, jer uchastkaların menshiklestiriw nátiyjelerin rásmiylestiriw boyınsha wákillikler buǵan kirmeydi;
rayon hám qala jergilikli mámleket hakimiyatı organları tárepinen jer uchastkalarına bolǵan huqıqlardı belgilew, ózgertiriw, biykar qılıw;
suwǵarılatuǵın jerlerdi suwǵarılmaytuǵın jerler taypasına yaki basqa jer taypasına, suwǵarılmaytuǵın awıl xojalıq jerlerin basqa jer taypasına ótkeriw;
menshiklestirilgen jer uchastkalarına qarata investiciya májbúriyatları yaki jeke múlikti erkin biylik etiwdi shekleytuǵın basqa majbúriyatlardı belgilew.
Juwmaqlap aytqanda joqarıdaǵı Parman xalqımızdıń jer ajıratıw, oǵan iyelik etiw hám biylik etiwi menen baylanıslı bolǵan máselelerine ashıq-áshkara sheshim tabılıwında ayırıqsha áhmiyetke iye boldı.
Qońırat rayonı ádillik bólimi
yuridikalıq xızmet kórsetiw orayı
bas yuriskonsultı A.Arzımuratov