Янгиликлар
24
Shańaraqtıń huqıqıy tiykarı-nızamlı neke
Shańaraq-bul biziń hár birimiz ushın qádirli máskán. Neke- bul erkek penen hayal ortasındaǵı awqam. Jámiyet neke arqalı er hám hayal ortasındaǵı múnasebetlerdi tártipke salıp turadı, er hám hayal, ata-ana hám perzentler ortasında ádep-ikramlıq, huqıqıy májbúryatlardı ornatadı.
Shańaraq nekeden baslanadı. Neke rásmiy, nızamlar tiykarında ótkerilgeninde ǵana haqıyqıy esaplanadı.
Ózbekstan Respublikası Shańaraq kodeksiniń 13-statyasında neke puqaralıq halatı aktlerin jazıw bólimlerinde dúziliwi lazımlıǵı kórsetilgen. Diniy úrp-ádetler menen dúzilgen neke huqńqńy áhmiyetke iye emes. Nekeden ótiwshiler PHAJ bólimine arza bergennen keyin bir ay ótip, olardıń qatnasıwında ámelge asırıladı.
PHAJ bólimleri tárepinen nekeleniwshi shaxslardıń nekeni dizimge alıw haqqındaǵı arzanı qabıl qılǵanda belgilengen tártipte medicinalıq kórikten ótiw ushın jollanba beriledi, ayırıqsha jaǵdaylarda (hámledarlıq, bala tuwılıwı, bir táreptiń keselligi )neke arza berilgen kúni dúziliwi múmkin.
Ózbekstan Respublikası Prezidentiniń 23.03.2021jil 6191 sanlı Pármanına tiykar puqaralar turaqlı yaki waqtınsha jasaw ornına qaramastan puqaraıiq halatı aktlerin eksteritorial principi tiykarında qálegen jerden ámelge asırıwı mumkin.
Neke qurıwdan tiykarǵı maxset shańaraqlı bolıp bir-birin qollap- quwatlaw, bir-birine súyenish bolıp jasaw , jetik iymanı putin salamat perzentti dunyaǵa keltiriw hám keleshekte olardıń ráhátin kóriw bolıp tabıladı. Jaslardıń shańaraq qurıwǵa tayarlıǵı shańaraqtıń bekkem bolıwınıń girewi bolıp esaplanadı.Jaslardı shańaraq qurıwǵa tayarlaw máselesi jámiyetlik áhmiyetke iye.Sonlıqtan da,bul máselege barlıq waqıtta itibar beriwimiz kerek.
Nókis rayon PHAJ bólimi baslıǵı G.Doshanova