Янгиликлар
13
ELEKTRON SANLÍ IMZANÍ ONLAYN TÁRIZDE ALÍŃ HÁMDE MÁMLEKETLIK XÍZMETTEN PAYDALANÍŃ!
Házirgi kúnde Mámleketlik xızmetler orayları tárepinen kórsetiletuǵın mámleketlik xızmetler túri 200 ge jaqın bolıp, bul mámleketlik xızmetlerdiń derlik barlıǵınan aralıqtan (distancion) turıp (úyińizde yaki jumıs ornıńızdan) internet tarmaǵı arqalı onlayn tárizde yaǵnıy, Birden-bir interaktiv mámleketlik xızmetler portalı (my.gov.uz) arqalı paydalanıwıńız múmkin. Sonday-aq, mámleketlik xızmetten paydalanıwıńız ushın tólemińiz 10 payızǵa shegirme beriledi.
Bunıń ushın eń aldı menen Sizde my.gov.uz saytı arqalı mámleketlik xızmetlerinen paydalanıw ushın elektron múrájatlardı jiberiwde elektron sanlı imza bolıwı tiyis.
Sonlıqtan da, elektron sanlı imzanıda onlayın tárizde alıwıńız ushın múmkinshilik jaratıldı. Bunıń ushın Siz orayǵa kelmesten, úyińizde yaki jumıs ornıńızda otırıp e-imzo.uz portalınan tómendegi usıllarda elektron sanlı imza sertifikatların alıwıńız múmkin;
- elektron sanlı imza sertifikatın alıw ushın sorawnamanı toltırıw hám pasport nusqasın, sonday-aq pasporttıń aldı tárepi selfiy fotosúwretin qosımsha qılıw, (fotosúwrettiń kólemi 5 Mbtan aspawı kerek);
- xızmet ushın tólemdi ámelge asırıw, (jeńillikke iye bolǵanlardan tısqarı) yaǵnıy fizikalıq shaxslar ushın – bazalıq esaplaw muǵdarınıń 7 payızı, yuridikalıq shaxslar ushın bazalıq esaplaw muǵdarınıń 10 payızı muǵdarında: payme, (click, upay, paynet taǵı basqa usıllarda) tólew;
- sertifikat tayarlıǵı boyınsha SMS-xabarnamanı alǵannan keyin óz arzasın e-imzo.uz saytında tabıw;
- elektron sanlı imza sertifikatı alınǵanlıǵın tastıyıqlaw hám onı kompyuterge júklew zárúr.
Demek, Siz joqarıdaǵı usıllardan paydalanǵan halda elektron sanlı imzanı alsańız orayǵa keliwińizge qájet bolmaydı.
Bunnan tısqarı, keleshekte elektron sanlı imza menen bárshe mámleketlik hákimiyatı hám basqarıw uyımları sonday-aq, bank xızmetleriniń barlıq túrlerinen erkin paydalanıw múmkinshiligin támiyinleydi. Sonday-aq, qaǵaz hújjetke qolda ózi qoyǵan imza menen birdey áhmiyetke iye ekenligi belgilengen.
Sonı ayrıqsha aytıp, esletip ótiwimiz zárúr, hár bir fizikalıq yaki yuridiklıq shaxs óziniń jeke elektron sanlı imzasın ózgelerge isenip tapsırmawı kerek.
Sebebi elektron sanlı imza arqalı Siziń atıńızdan túrli nızamsız islerdi ámelge asırıwı múmkin.
Húrmetli puqaralar hám isbilermenler!
Joqaradaǵı kórsetip ótilgen imkániyatlardan, yaǵnıy mámleketlik xızmetlerinen onlayn tárizde my.gov.uz elektron portalı arqalı úyde yaki jumıs ornıńızda paydalansańız qımbatlı waqıtlarıńız, finanslıq qárejetlerińiz tejeledi hámde usı tarawda byurokratiya, áweregershilik hám basqa hákimshilik tosqınlıqlarǵa jol qoymaysız.
Kegeyli rayonı Ádillik bólimi, Mámleketlik xızmetler orayı bólim baslıǵı S.Otegenov