Янгиликлар
11
Ministrler Kabinetiniń “Sawda hám xızmet kórsetiw tarawında jámiyetshilik qadaǵalaw nátiyjeligin asırıwǵa tiyisli qosımsha is-ilajlar haqqında”ǵı 2022-jıl 12-maydaǵı 255-san qararınıń mazmun-mánisi
2022-jıl 12-mayda Ózbekstan Respublikası Ministrler Kabinetiniń “Sawda hám xızmet kórsetiw tarawında jámiyetshilik qadaǵalaw nátiyjeligin saırıwǵa tiyisli qosımsha is-ilajlar haqqında”ǵı 255-san qararı qabil etildi. Bul qarar 2021-jıl 4-oktyabrdagi Ózbekstan Respublikası Prezidentiniń “Usaqlap satıw sawda hám xizmet kórsetiw tarawında qadaǵalaw-kassa texnikasınan paydalanıwdı jetilistiriwge tiyisli qosımsha is-ilajlar haqqında”ǵı PQ-5252-san qararınıń orınlanıwın támiyinlew maqsetinde Ministrler Kabineti tárepinen qabil etilgen.
Qarar menen tómendegilerdi názerde tutılǵan, yaǵnıy:
a) satıp alınǵan tovarlar (xızmetler) bahasınıń bir bólegin fizikalıq shaxslarǵa qaytarıw tártibi haqqındaǵı rejesi tastıyıqlanǵan bolıp, usi rejege muwapıq:
fizikalıq shaxslar tárepinen satıp alınǵan tovarlar (xızmetler) bahasınıń bir payızın olardıń fiskal belgili chekları salıq uyımlarınıń arnawlı mobil qosımshası arqalı dizimnen ótkerilgennen keyin qaytarılıwı;
usaqlap satıw sawdası, ulıwma awqatlanıw hám xojalıq xizmet kórsetiw ob’yektlerinde naq pul yamasa bank kartaları, sonday-aq, korporativ kartalar arqalı satıp alınǵan tovarlar (xızmetler) bahasınıń bir bólegin fizikalıq shaxslardıń bank kartalarına Ózbekstan Respublikası milliy valyutasında qaytarılıwı;
b) arnawlı programma arqalı salıqqa tiyisli huqıqbuzarlıqlar anıqlanǵan jaǵdaylar haqqında salıq uyımların xabar bergen fizikalıq shaxslarǵa pul sıylıqın tólew haqqındadaǵı rejeside tastıyıqlanǵan bolıp, usi rejege muwapıq:
salıq uyımların fizikalıq shaxslar tárepinen anıqlanǵan salıqqa tiyisli huqıqbuzarlıqlar anıqlanǵan jaǵdaylar haqqında “Salıq sherik” arnawlı málimleme sisteması arqalı xabar beriw;
salıqqa tiyisli huqıqbuzarlıqlar anıqlanǵan jaǵdaylar haqqında salıq uyımlarına xabar bergenligi ushın bir mártelik pul sıylıǵı formasında xoshametlewdi Ózbekstan Respublikası Salıq kodeksiniń 221-statyası birinshi bóleginde názerde tutılǵan salıq huqıqbuzarlıqları ushın belgilengen járiymalardıń jigirma procenti muǵdarında belgilew;
qarıydarlarǵa naq pul qarjları yamasa plastik kartalar boyınsha tólew formasına qaray bahalar jasalma túrde asırılǵanlıǵı yamasa páseytirilgenligi, isbilermenlikti mámleketlik diziminen ótpegen halda ámelge asırılǵanlıǵı, identifikaciya quralları arqalı májburiy cifrlı markirovkalaw názerde tutılǵan ónimlerde jasama markirovka qollanılǵanlıǵı yamasa markirovka joqlıǵı, sonıń menen birge, sawda hám xızmetler kórsetiw qaǵıydalarınıń buzılıwı anıqlanǵan basqa jaǵdaylar haqqında salıq uyımlarına xabar bergenligi ushın fizikalıq shaxslarǵa bir mártelik pul sıylıǵın tólenıwı názerde tutılǵan.
Usı qarar menen sonday tártip ornatılgan, oǵan kóre:
usı qarardıń joqarıda atap kórsetilgen rejelerine muwapıq tovarlar (xızmetler) bahasınıń bir bólegi hám salıqqa tiyisli huqıqbuzarlıqlar anıqlanǵan jaǵdaylar haqqında salıq shólkemlerine xabar bergenligi ushın bir mártelik pul sıylıǵı Ózbekstan Respublikası Mámleketlik salıq komiteti tárepinen belgilenetuǵın kepillikli bank arqalı tóleniwi;
salıq uyımlarınıń arnawlı mobil qosımshası arqalı dizimnen ótkerilgen fiskal belgili cheklar boyınsha satıp alınǵan tovarlar (xızmetler) bahasınıń bir bólegi bul cheklar usı qararda belgilengen tártipte rásmiylestirilgen aydan keyingi aynıń 25 sánesinen keyin qaytarılıwı.
Salıq shólkemlerine kóshpeli salıq tekseriwlerin ótkeriw sheńberinde planshetler hám basqa kompyuter texnikasınan paydalanıw, sonıń menen birge, kóshpeli salıq tekseriwleri menen baylanıslı hújjetlerdi elektron cifrlı qol tańbadan (barmaq izi yamasa grafikalıq qol tańbadan) paydalanǵan halda elektron formada rásmiylestiriw huqıqı berilgen.
Qanday cheklarǵa tovarlar (xızmetler) bahasınıń bir bólegi qaytarılmaydı?
Tovarlar (xızmetler) bahasınıń bir bólegi esaplanbaydı:
eger chek berilgenine 10 kúnden artıq waqıt ótken bolsa;
eger satıp alınǵan tovar (xızmet)ler cheki ushın aldın tovar (xızmet) bahasınıń bir bólegi esaplanǵan bolsa;
avtomobil, hawa hám temir jol biletlerin satıp alıw nátiyjesinde alınǵan, sonıń menen birge, baylanıs hám kommunal xızmetler ushın ámelge asırılǵan tólemlerdiń chekları ushın;
Mámleketlik salıq komiteti tárepinen júritiletuǵın gúmanlı qarıydarlar reyestrine kiritilgen fizikalıq shaxslar chekları ushın.
Kimler gúmanlı qarıydarlar bolıp tabıladı?
Gúmanlı qarıydarlar - tovar (xızmet) bahasınıń bir bólegin ıyelew ushın basqa puqaralar tárepinen ámelge asırılǵan satıp alınǵan zat chekların iyesiniń ruxsatisiz dizimnen ótkergen shaxslar.
Bunda, satıp alınǵan zattı ámelge asırǵan shaxs óz cheki basqa paydalanıwshı tárepinen Salıq mobil qosımshasında (Android/iOS) dizimnen ótkerilgenligin anıqlasa:
chekti dizimnen ótkergen shaxs paydasına tovar (xızmet) bahasınıń bir bólegine waz keshiwi múmkin;
yaki bul shaxs ústinen shaǵım etiwi múmkin. Onıń ushın Salıq qosımshasında ashılatuǵın arnawlı aynada shaǵım qılıwdı qáleysizbe sorawına "awa" juwabın tańlaw kerek.
Mobil qosımsha arqalı ózgelerge tiyisli bolǵan 15 hám odan artıq QR-kodlı chekti dizimnen ótkergenlıgi haqqında shaǵım kelip túsken paydalanıwshılar gúmanlı qarıydarlar reyestrine kiritiledi.
Bunnan tısqarı, cheki basqa puqaralar tárepinen dizimnen ótkerilgen rasında satıp alınǵan zattı ámelge asırǵan fizikalıq shaxs belgilengen tártipte sudqa múrájat etiw huqıqına iye.
Solay etip, mámleketimde puqaralar tárepinen satıp alınǵan tovar (xızmet) bahasınıń bir payızın olardıń fiskal belgili chekları salıq uyımlarınıń arnawlı mobil qosımshası arqalı qaytarip alıw huqıqı kepillengen hámde anıqlanǵan huqıqbuzarlıqlar menen operativ tárizde usı mobil qosımsha arqalı Mámleketlik salıq komiteti kompleks is-ilajlar alip barıp tiyisli sháralar kórmekte.
Shaxsanem Saliyeva,
Qaraqalpaqstan Respublikası
Ádillik ministriliginiń juwaplı xizmetkeri