Янгиликлар
29
" Korrupciyaǵa qarsı gúres dáwir talabı "
Húrmetli Prezidentimiz tárepinen 2019- jıldıń 27-may kúni « Ózbekstanda korrupciyaǵa qarsı gúresiw sistemasın jáne de jedelestiriw haqqında » ǵı Pármanına qol qoyıldı. Usı hújjet korrupciyaǵa qarsı gúresiw sisteması nátiyjeligin asırıw, eń joqarı darejedegi qolay isbilermenlik ortalıǵın jaratıw, mámlekettiń xalıq aralıq maydandaǵı unamlı abıroy-itibarın asırıwǵa qaratılǵanlıǵı menen áhmiyetli bolıp tabıladı.
Hár bir nızam jaqsılıqtı kózlep qabıl etiledi. Ayırım nızamlar óz mazmun-mánisine qaray mámleket hám jámiyet táǵdiri, xalıq keleshegi, hár birimizge baylanıslı boladı. Prezidentimiz tárepinen qabıl etilgen « Ózbekstanda korrupciyaǵa qarsı gúresiw sistemasın jáne de jetilistiriw haqqında » ǵı Pármanı áne usinday tariyxiy áhmiyetke iye hújjetlerden biri bolıp esaplanadı.
Búgingi kúni jámiyetimizde orın alıp turǵan korrupsiya illeti elimiz ekonomikasınıń alǵa qaray rawajlanıwı, kadrlar sapasınıń tómenlewi, shólkemlesken jınayatshılıqtıń tereń tamır atıwı aqıbetinde barlıq tarawlardıń « aqsawı » na alıp keledi.
Korrupciyaǵa qarsı gúresiw boyınsha mámleketlik dástúrlerdi qabıl etiw arqalı usı jóneliste ámelge asırılıwı lazım bolǵan is-rejeler hár jılı belgilep alıw ámeliyatı usınıldı. Korrupciyaǵa
tiyisli huqıqbuzarlıqlar haqqında xabar bergen yamasa korrupciyaǵa qarsı gúresiwge
basqasha tárizde kómeklesken shaxslardı xoshemetlew mexanizmi engizildi.
Usı nızam tiykarında, mámleketimizde Bas prokuratura, Mámleketlik qáwipsizlik xızmetı, Ishki isler ministrligi, Ádillik ministrligi, Bas prokuratura janındaǵı Ekonomikalıq jınayatlarǵa qarsı gúresiw departamenti korruptsiyaǵa qarsı gúresiw boyınsha jumıslardı ámelge asıradı.
Usı sebepli de sońǵı jıllarda mámleketimizde isbilermenler, kishi biznes subektlerine «bir ayna» principi boyınsha mámleketlik xızmetler kórsetilip átır, Puxaralıq halatı akt jazıw bólimlerinde birden-bir ınteraktiv portal arqalı mámleketlik xızmetler elektron túrde jiberilmekte.
10.11.2020- jılı Ózbekstan Respublikası Ministrler Kabinetiniń 704- sanlı reglamentine tiykar Puxaralıq halatı akt jazıw bólimlerinde tuwılıwdı dizimge alıwǵa baylanıslı komples mámleketlik xızmet kórsetiw 2021-jıldın fevral ayınan baslap jańa tuwılǵan balalar ushın balaǵa tuwılıw guwalıq alıwda tólemler ámelge asırılmaydı.Bul da bir Ádillik ministrligi tárepinen korrupciyanıń aldın alıw maqsetınde islengen is-ilajlar bolıp esaplanadı.
Nızam hújjetlerine, mámleketlik shólkemlerdiń jumıs xızmetine ashıqlıq, áshkáralıqtı támiyinlewǵe ózgerisler kiritilip átır hám basqa kóplep jańalıqlar kiritilmekte. Bulardıń barlıǵı korruptciyanı boldırmawda úlken áhmiyetke iye. Puqaralar tárepinen bunday ózgerisler qollap-quwatlanıp, óz minnatdarshılıqların bildirmekte.
Juwmaqlastırılıp aytqanda, mámleketimizdiń erkin hám abat turmısına saya salıwshı korrupciyaǵa qarsı jánede jedel gúresiw talap etiledi. Bul baǵdarda reformalar ele de dawam etedi, sebebi olardıń tiykarǵı maqseti elimizde jasap atırǵan hár bir puqaranıń huqıq hám erkinliklerin tolıq támiyinlew hám demokratiyalıq huqıqıy mámleketti qurıwdan ibarat.
Qanlıkól rayonı ádillik bólimi
PHAJ bólimi baslıǵı P.Avezova