Янгиликлар
30
Bir múrájat izinen
Fizikalıq hám yuridikalıq shaxslardıń múrájatları menen islewde onıń huqıq hám máplerin támiyinlew maqseti joqarı tursa, insán qádiri ulıǵlanadı. Múrájatı nızamlı sheshim tapsa, olardıń mámleket organlarına isenimi jáne de artadı. Shomanay rayonı turǵını, pensioner Abdibay Baydullaev ta júreginde úlken úmit penen Shomanay rayonı ádillik bólimine múrájat qılıp keldi. Puqara A.Baydullaev 38 jıldan aslamıraq waqıt dawamında miynet etip kelgen, tilekke qarsı jumıs beriwshiniń itibarsızlıǵı aqıbetinde islegen dáwirleriniń ayırım jılları pensiya tayınlawda esapqa alınbaǵanlıǵınan narazı.
Bul múrájat ádillik bólimi tárepinen nızamshılıq talapları tiykarında úyrenildi. Úyreniw dawamında pensiya organı xızmetkerdiń mámleket tárepinen sociallıq qamsızlandırılǵan halda islegen jumısı boyınsha byudjetten tısqarı Pensiya qorına qamsızlandırıw tólemleri tólenbegenligin sebep qılıp 26 jıl 6 ay 25 kún is sjatı pensiya tayınlawda esapqa alınbaǵanlıǵı anıqlandı.
Ózbekstan Respublikası Respublikasınıń 1993-jıl 3-sentyabrdegi “Puqaralardıń mámleketlik pensiya támiynatı haqqında”ǵı 938-XII-sanlı Nızamınıń 37-statyasına tiykar 2019-jıl 1-yanvarǵa shekem bolǵan dáwir ushın – iskerlik túri, mal-múlk hám xojalıq júritiw formalarına qaramastan, xızmetker mámleket tárepinen sociallıq qamsızlandırılǵan halda orınlaǵan hár qanday is, eger ol Ózbekstan Respublikası Qarjı ministrligi janındaǵı byudjetten tısqarı Pensiya qorına qamsızlandırıw tólemlerin tólegen bolsa is stajına esaplanadı dep belgilengen.
Sonday-aq, usı Nızamnıń 42-statyasında miynet dáptershesi is stajın tastıyıqlawshı tiykarǵı hújjet bolıp tabıladı dep belgilengen bolsa, Ózbekstan Respublikası Ministrler Kabinetiniń 2011-jıl 8-sentyabrdegi 252-san qararı menen tastıyıqlanǵan “Mámleketlik pensiyaların tayınlaw hám tólew tártibi haqqında”ǵı Qaǵıydanıń 2-bántinde is stajı — miynet dáptershesi hám jumıs ornınan, xızmetten, oqıwdan yáki arxivten berilgen basqa hújjetler boyınsha anıqlanǵan, jumıstaǵı tánepislerge qaramastan, nızam hújjetlerine muwapıq pensiya támiynatı huqıqın beretuǵın miynet iskerligi hám basqa iskerliktiń ulıwma dawamlılıǵı túsiniledi, 59-bántinde miynet dáptershesi is stajın tastıyıqlaytuǵın tiykarǵı hújjet esaplanadı dep kórsetilgen.
Joqarıdaǵılardan kelip shıǵıp, Shomanay rayonı ádillik bólimi tárepinen puqara Abdibay Baydullaevtıń máplerin gózlep hámde Nókis rayonlar aralıq hákimshilik sudına shaǵım arza kiritildi.
Nátiyjede, sud qararı qararı menen byudjetten tısqarı Pensiya qorınıń háreketlerin nızamǵa muwapıq emes dep tabıw hámde puqara A.Baydullaevqa pensiya tayınlawda esapqa alınbaǵan 26 jıl 6 ay 25 kún is sjatın qayta esaplaw minnetlemesi júkletiliwi belgilendi.
Shomanay rayonı ádillik
bólimi baslıǵı w.w.a. A.Seydabullaev