Янгиликлар
12
BEKKEM SHAŃARAQ PERZENT BAXTÍ.
Shańaraq hár birimiz ushın qádirli hám muqáddes sanalǵan ullı dárgáy, Hár bir insan onı kózdiń qarashıǵınday asrap abylaydı desek asırı aytqan bolmaymız. Neke qurıwdan tiykarǵı maqset shańaraqlı bolıp bir-birin qollap quwatlaw, bir-birine súyenish bolıp jasaw, salamat perzent dúnyaǵa keltiriw hám keleshekte olardıń ráhátin kóriw bolıp esaplanadı. Tariyxqa názer salsaq neke qurıw diniy qaǵıydalarǵa tiykarlanǵan, al dinimizde bolsa talaqtı, shańaraq buzılıwın maqsetke muwapıq emes dep esaplaydı, bir sóz benen aytqanda shańaraqtıń buzılmawın, kerisinshe onı saqlap qalıwdı úgit-násiyat etedi.
Joqırıda keltirilgen pikirlerge qaramastan ómir bir tegis emesligi, turmısta hár túrli jaǵdaylardıń ushırasıwı bul muqáddes qádiryattıń buzılıwına alıp keledi. Shańaraqtıń tınıshlıǵın, bir pútinligin saqlaw hár birimizdiń wazıypamız hámde onı asıraw ushın hár birimiz minnetlimiz. Sonlıqtan elimiz keń jámiyetshiligi tárepinen shańaraq buzılıwı hám erli-zayıplılar ajırasıwlarınıń aldın alıw boyınsha turaqlı túrde is-ilájlar alıp barılmaqta.
Erli-zayıplılar ajırasıwı ushın arza bergende, meyli onı sudqa bersin yaki PHAJ bólimine bersin eki jaǵdayda da olardı jarastırıw ushın ózleri jasap turǵan aymaqtaǵı puqaralardıń ózin-ózi basqarıw uyımlarına jiberilip, mákán puqaralar jıyını qasında shólkemlestirilgen jarastırıw komissiyası tárepinen kórip shıǵılıwı hám bul orında ajırasıwdıń aldın alıw ushın tiyisli ilájlar kóredi. Komissiyanıń tájiriybeli, ómirilik sınaqlardan ótken, kópti kórgen hám úlgili aǵzaları aqıl aytıp, násiyatlar beriw menen birge ómir sabaqlarınan mısallar keltirip túsindirıw jumısların alıp baradı.
Áyne usı komissiya kómeginde Nókis rayonı PHAJ bólimi tárepinen ajirasıw jaǵdayına kelgen Tók-taw MPJ da jasawshı, er-jetpegen eki perzenti bar shańaraqtı jarastırıw ilájları kórilip, bul shańaraqtıń birligi saqlap qalındı. Shańaraqlar tınısh hám tatıw bolsa, jámiyetimiz de tınısh boladı hám alǵa ilgerleydi. Bunday shańaraqlarda dúnyaǵa kelgen hár qanday perzent jetik, kámil hám salamat perzentler bolıp er jeteri sózsiz.
Nókis rayonı PHAJ bólimi baslıǵı Tazagul Musaeva