Янгиликлар
22
«Jaslar dápteri»ne kimler kiritiledi hám olarǵa nızamshılıqta qanday jeńillikler bar?
«Jaslar dápteri»ne kimler kiritiledi hám olarǵa nızamshılıqta qanday jeńillikler bar?
Mámleketimizde sociallıq qorǵawǵa mútáj, jumıssız hám sociallıq aktiv bolmaǵan jaslar menen «Jaslar dápteri»n júritiw arqalı islew sistemasın jánede jedellestiriw, olardı hár tárepleme qollap-quwatlaw, sonday-aq, joqarı bilim beriw shólkemleri studentleri arasında intellektual salamat básekini payda etiw, student hám jaslardıń bilim hám kúsh-jigerin jánede asırıw hámde olardı hoshametlew maqstinde Ózbekstan Respublikası Ministrler Kabinetiniń 2022-jıl 7-iyun kuni «Jaslar máselelerin úyreniw hám sheshiw sistemasın jánede jedellestiriw is-ilájleri haqqında»ǵı 312 sanlı qararı qabıl etildi.
Usı qarar menen «Jaslar dápteri»n júritiw arqalı jaslar máselelerin sistemalı sheshiw hám olardı sociallıq qollap-quwatlaw tártibi haqqında»ǵı Reje tastıyıqlandı.
«Jaslar dápteri» — sociallıq, ekonomikalıq, huqıqıy, psixologik qollap-quwatlawǵa, bilim hám kásip úyreniwge qájeti hám intási bolǵan, jumıssız jaslardıń máselelerin anıqlaw hám qadaǵalawdı alıp barıw boyınsha maǵlıwmatlar bazasına aytıladı.
«Jaslar dápteri»ne 14 jasqa tolǵan hám 30 jastan aspaǵan tómendegi kategoriyadaǵı jaslar kiritiledi:
- shańaraq aǵzası «Temir dápter», «Xayallar dápteri» yaki «Sociallıq qorǵaw jalǵız reestri»ne kiritilgen;
- sociallıq qorǵawǵa mútáj bolǵan;
- baǵıwshısın joǵaltqan, jetim yaki ata-ana qaramaǵınan ayırılǵan;
- ózine qarsı qáwenderlik yaki amangerlik belgilengen;
- ózgeler ǵamhorlıǵına mútáj bolǵan jumısqa jaramsız;
- I yaki II topar mayıplıǵı bolǵan;
- penzentinde I yaki II topar mayıplıǵı bolǵan;
- fizikalıq hám ruwhıy rawajlanıwında kemshiligi bolǵan;
- ata-anasınıń birinde I yaki II topar mayıplıǵı bolǵan, ekinshisi bolsa jumıs iskerligin toqtatqan halda keselge qarawǵa májbúr bolǵan yaki ata-anasınıń hár ekewinde de I yaki II topar mayıplıǵı bolǵan;
- júzege kelgen jaǵdaylar sebepli awır turmıs shárayatında qalǵan;
- zorlıq hám ekspluataciya, tábiyǵıy apatlar, avariyalar, órtler hám basqa ayrıqsha jaǵdaylar aqıbetinde ómirine, den-sawlıǵına, mulkine zıyan jetken;
- «Miyirbanlıq úyi», balalar qalashası yaki shańaraqlıq balalar úyinde tárbiyalanǵan;
- haq tólenetuǵın jumısqa yaki is haqı (miynet dáramatı) keltiretuǵın shınıǵıwǵa iye bolmaǵan;
- dawalanıwǵa mútáj bolǵan kesel jaslar;
- jazanı ótew mákemelerinen qaytqan;
- belgili jasaw jerine iye bolmaǵan;
- psixologik máslahatqa mútáj;
- nekesi dizimge alınǵanlıǵına 3 jıldan aspaǵan jas shańaraq;
- diyhanshılıq yaki tamarqa hojalıǵın júritip atırǵan;
- jas isbilermen yaki ózin-ózi bánt etken shaxs sıpatında salıq xızmeti uyımlarında dizimnen ótken jaslar kiritiledi.
«Jaslar dápteri»ne jaslar jasap turǵan jeri boyınsha kiritiledi. Bunda jaslardıń jasap turǵan jeri boyınsha esapta turmawı olardı «Jaslar dápteri»ne kiritiwden bas tartıw ushın tiykar esaplanbaydı.
Joqarıda keltirilgen kategoriyadaǵı arza beriwshiler elektron platforma arqalı:
- arza beriwshiniń tuwrıdan-tuwrı ózi tárepinen elektron platformaǵa tiyisli maǵlıwmatlar kiritiw;
- arza beriwshi tárepinen Jaslar isleri agentliginiń «1093» qısqa nomerli Call-orayǵa murájet etiw;
- jaslar jetekshisiniń kómeginde elektron platformaǵa arza beriwshiniń tiyisli maǵlıwmatların kiritiw jolı menen «Jaslar dápteri»ne kiritiledi.
Arza beriwshi jasap turǵan aymaqtaǵı jaslar jetekshisi onıń «Jaslar dápteri»ne kiritiw haqqındaǵı múrájetin ush kun muddette úyrenip shıǵadı hám arza beriwshiniń «Jaslar dápteri»ne kiritiliwin tastıyıqlaydı yaki bas tartadı.
Arza beriwshiniń usı múrájeti tiykarında onıń maǵlıwmatı tiyisli integraciya qılınǵan maǵlıwmatlar bazaları arqalı tastıyıqlanǵan jaǵdaylarda arza beriwshi «Jaslar dápteri»ne avtomatik turde kiritiledi hám bunda jaslar jetekshisiniń tastıyıqlawı talap etilmeydi.
Arza beriwshige «Jaslar dápteri»ne kiritilgenligi yaki kiritiw bas tartılǵanlıǵı haqqında tiykarlanǵan habar, sol qatardan, SMS-xabarnama jiberiledi.
Arza beriwshi «Jaslar dápteri»ne kiritilgende sistema tárepinen avtomatik túrde arza beriwshi usı Rejege muwapıq almaqshı bolǵan járdem túrin alıw haqqındaǵı arza onıń atınan toltırıladı hám usı járdem túrin beriw yaki bermew boyınsha usınıs beriw ushın arza beriwshiniń jasap turǵan aymaqtaǵı jaslar jetekshisine jiberiledi, usı Rejeniń 3-babı 2, 4, 5, 6, 10, 13-paragraflarında belgilengen subsidiya hám járdem túrleri buǵan kirmeydi.
«Jaslar dápteri»ne kiritilgen jaslardıń social-ekonomikalıq máselelerin sheshiw maqsetinde rayon hám qalalarda «Jaslar dápteri»ne kiritilgen jaslardı qollap-quwatlaw qorı shólkemlestirilgen.
Usı qarardıń orınlanıwın qadaǵalaw Ózbekstan Respublikası Jaslar isleri agentligi hám Ministrler Kabinetiniń Jaslardı qollap-quwatlaw hám jámiyet shólkemleri máseleleri xatkeriyatı juwapker etip belgilengen.
Esletpe: «Jaslar dápteri»ne kiritilgen shaxslarǵa nızamshılıqta qanday jeńillikler berilgenligi haqqında usı jıldıń dekabr ayında qosımsha maǵlıwmat beriledi.
Salamat BAZARBAEV,
Kegeyli rayonı Ádillik bólimi
Yuridikalıq xızmet kórsetiw orayı
bas yuriskonsultı.