Янгиликлар
24
Korrupciyaǵa qarsı gúresiw tarawında reyting bahalaw sisteması engiziledi
Korrupciyaǵa qarsı gúresiw tarawında reyting bahalaw sisteması engiziledi
«Korrupciyaǵa qarsı gúresiw jumıslarınıń nátiyjeliligin reyting bahalaw sistemasın engiziw ilajları haqqında»ǵı Prezident qararı (PQ-81-sanlı, 12.01.2022 j.) qabıl etildi.
Qararǵa muwapıq, Korrupciyaǵa qarsı gúresiw jumıslarınıń nátiyjeliligin reyting bahalaw sisteması engiziledi.
Onda reyting bahalaw tómendegi 5 baǵdar boyınsha belgilengen indikatorlar tiykarında ámelge asırıladı:
– mámleketlik shólkemlerde korrupciyaǵa qarsı gúresiw boyınsha mexanizm hám huqıqıy tiykarlardıń islep shıǵılǵanlıǵı hám ámeliyatqa engizilgenligi;
– korrupciyalıq qáwip-qáterlerdi anıqlaw, bahalaw hám olardı azaytıw boyınsha ilajlardıń ámelge asırılǵanlıǵı;
– mámleketlik shólkem basshılarınıń korrupciyaǵa qarsı mawasasız múnásibetti kórsetiwshi háreketleriniń bar ekenligi;
– xızmetkerlerdiń korrupciyaǵa qarsı gúresiwge baylanıslı ishki tártip-qaǵıydalardan xabardarlıǵı hám bul tarawda bilim hám kónlikpelerdi asırıw boyınsha ilajlardıń ámelge asırılǵanlıǵı;
– korrupciyaǵa qarsı gúresiw boyınsha tiyisli taraw yamasa tarmaq kesiminde xalıqtıń huqıqıy sana hám huqıqıy mádeniyatın joqarılatıw, bul illetke qarata mawasasız múnásibetti qáliplestiriwge qaratılǵan úgit-násiyat ilajlarınıń nátiyjeliligi.
Reyting bahalaw sisteması 2022-jıl 1-fevraldan baslap, eksperiment tárizinde, óz jumısında korrupciyaǵa qarsı menedjment sistemasın engizip atırǵan 26 mámleketlik shólkemlerdiń jumısına, 2022-jıl 1-iyulden barlıq mámleketlik shólkemlerdiń jumısına engiziledi.
Reytin bahalaw «E-Anticor.uz» elektron platforması arqalı shólkemlestiriledi.
Korrupciyaǵa qarsı gúresiw jumıslarınıń nátiyjeliligi 0 balldan 100 ballǵa shekem reytingde bahalanıp, jumıs nátiyjeliligi “jaqsı”, “qanaatlandırarlı” hám “qanaatlandırarsız” kategoriyalarǵa ajıratıladı.
Bunda, jumısı:
• “jaqsı” dep bahalanǵan mámleketlik uyımlardıń korrupciyaǵa qarsı gúresiw tarawındaǵı unamlı tájriybesin eń jaydırıw boyınsha ilajlar belgilenedi hám ámelge asırıladı;
• “ qanaatlandırarlı” dep bahalanǵan mámleketlik shólkemlerine olardıń korrupciyaǵa qarsı gúresiw boyınsha jumısların jánede jaqsılaw boyınsha usınıslar kirgiziledi;
• “ qanaatlandırarsız” dep bahalanǵan mámleketlik shólkemlerinde korrupciyaǵa qarsı gúresiwde anıqlanǵan kemshiliklerdi saplastırıw hámde olardıń usı baǵdardaǵı jumısların jaqsılawǵa qaratılǵan ilajlar baǵdarlaması islep shıǵıladı, onıń orınlanıwı boyınsha tiyisli basshılardıń esabatların hár sherekte Korrupciyaǵa qarsı gúresiw boyınsha milliy keńestiń jıynalıslarında esitiledi.
Izbe-iz eki jıl dawamında korrupciyaǵa qarsı gúresiw nátiyjeliligi «qanaatlandırarsız» dep tabılǵan mámleketlik shólkemler basshılarına intizamiy juwapkershilik sharaların qollaw máselesi kórip shıǵıladı.
Dosanov Ernazar Mawlenbergenovich,
Qaraqalpaqstan Respublikası Ádillik ministrligi
bólim baslıǵı