Янгиликлар
07
Endi elektron sanlı qol tańbasızda mámleketlik xızmetlerinen paydalanıw múmkin.
Endi elektron sanlı qol tańbasızda mámleketlik xızmetlerinen paydalanıw múmkin.
Xabarıńız bar Respublikamızda mámleketlik xızmetlerdi kórsetiw sistemasın rawajlandırıw, fiziykalıq hám yuridikalıq shaxslar ushın elektron mámlketlik xızmetler kórsetiw kólemin asırıw, xalıqtıń aralıqtan turıp elektron mámleketlik xızmetlerinen ǵárezsiz paydalanıw imkániyatın keńeytiriw, sonday-aq, bul baǵdarda bárshe ushın teń shárayattı jaratıw boyınsha sistemalı reformalar ámelge asırılmaqta.
Álbette, bul process dawamında eskishe hám zaman talaplarına mas kelmeytuǵın tártip-qaǵıydalar biykar etilip, innovaciyalıq mexanizmler payda etilmekte.
Usı jıldıń 30-avgust kúni Ózbekstan Respublikası Ministrler Kabinetiniń «Ózbekstan Respublikasında fiziykalıq shaxslardı identifikaciyalawdıń Mobil-ID sistemasın payda etiw is-ilájları haqında»ǵı qararı qabıl etildi.
Usı qarar elektron kórniste paydalanıw múmkin bolǵan mámleketlik xızmetleri boyınsha xalqımızdıń mákemeler boylap júriwdiń aldın alıwǵa xızmet etedi hámde túrli áweregershilikke hám xızmetten paydalanıw ushın mákemeler hám shólkemlerde uzınnan uzaq náwbet kútip turıwına shek qoyadı.
Xalqımızǵa elede túsinikli bolıwı ushın mobil-ID sisteması shaxstı onıń mobil telefonı nomeri arqalı identifikaciyalawdı názerde tutadı.
Usı orında bir sawal bul jaǵday xalıqqa ne beredi?
Shaxstı identifikaciyalawdıń Mobil-ID sisteması paydalanıwshılarǵa elektron sanlı qol tańbanı qollamaǵan halda barrlıq mámleketlik xızmetlerden paydalanıw imkanın beredi (buǵan kreditlew tarawında kórsetiletuǵın finanslıq xızmetler kirmeydi)
Shaxıstı Mobil-ID sistemasında dizimge alıw qanday ámelge asırıladı?
Shaxıstı Mobil-ID sisteması járdeminde identifikaciyalaw puqaranıń qálewine kóre mámleketli xızmetler orayı yaki notarial keńse tárepinen yamasa Birden-bir interaktiv mámleket xızmetleri portalınıń mobil qurılması arqalı ámelge asırıladı.
Bunda puqara tikkeley mámleketlik xızmetler orayı yaki notarial keńsege múrájat qılǵanında shaxstı tastıyıqlawshı hújjet tiykarında puqaranıń júzi sanlı formatta súwretke túsiriledi, elektron formada qol izi alınadı hám mobil telefon nomeri Birden-bir interaktiv mámleket xızmetleri portalındaǵı jeke kabinetine qosıladı.
Mobil-ID sisteması járdeminde identifikaciyalawdan ótiw ushın paydalanıwshı tárepinen BBIMXPnıń mobil qurılmasınan paydalanılǵanında aralıqtan biometrik identifikaciyalaw (Face-ID) usılı yaki ID-kartadaǵı elektron qol tańba qollanıladı hámde mobil telefon nomeri BIMXPdaǵı jeke kabinetine biypul qosıladı.
Bunda paydalanıwshı aralıqtan turıp Mobil-ID sistemasında identifikaciyadan ótiw ushın BBIMXPnıń mobil qurılmasınan paydalanadı hámde elektron formada sorawnamanı toltıradı.
BBIMXPnıń mobil qurılması arqalı paydalanıwshını Mobil-ID sistemasında identifikaciyadan ótkeriwde usınıs etilip atırǵan mobil telefon nomeri áyne múráját etip atırǵan paydalanıwshı atına rásmiylestirilgen bolıwı zárúr.
Tikeley mámleket xızmetler orayı yaki notarial keńse arqalı puqaralardı Mobil-ID sistemasına identifikaciyalaw 2022-jıl 31-dekabrge shekem biypul, 2023-jıl 1-yanvar sánesinen bazalıq esaplaw muǵdarınıń 2 procenti muǵdarında bir mártelik tólem óndirgen halda ámelge asırıladı.
Paydalanıwshılır Mobil-ID sistemasında identifikaciyadan ótiw ushın Ministrler Kabinetiniń 2022-jıl 12-apreldegi 177-sanlı qararına muwapıq biriktirilgen shaxstıń jeke identifikaciyalıq nomeri hámde Ózbekstan Respublikasındaǵı mobil baylanıs operatorları tárepinen berilgen mobil telefon nomeri (esap balansı aktiv bolǵan jaǵdayda) iye bolıwı zárúr.
Paydalanıwshı bir neshshe telefon nomerine iye bolǵanında onıń tańlawına tiykar tek bir mobil telefon nomeri Mobil-ID sistemasında identifikaciyadan ótkeriledi.
Paydalanıwshılar Mobil-ID sisteması identifikaciyasınan ótkeninen keyin «Tastıyıqlanǵan paydalanıwshı» statusın aladı hám bárshe elektron mámleketlik xızmetlerinen paydalanıwı múmkin boladı (kreditlew tarawında kórsetiletuǵın xızmetlerden tısqarı).
Mobil-ID sisteması identifikaciyadan ótiwdi isenimxat tiykarında yaki wákil arqalı ámelge asırıwǵa jol qoyılmaydı.
Jáne bir ózgesheligi, Mobil-ID sisteması identifikaciyalaw yuridikalıq shaxslarǵa qarata qollanılmaydı
Mobil-ID sistemasınan tómendegi maqsetlerde paydalanıladı:
OneID sisteması arqalı mámleketlik mákemeler hám shólkemleriniń portal hám xabar sistemalarına kiriwde paydalanıwshılardıń shaxstı tastıyıqlaw (autintifikaciyalaw);
Mobil-ID sistemasınan paydalanıp atırǵan paydalanıwshınıń haqıyqıylıǵın tastıyıqlaw (verifikaciyalaw);
elektron mámleketlik xızmetlerinen paydalanıw boyınsha paydalanıwshılar tárepinen berilgen arzalardı tastıyıqlaw;
paydalanıwshı óziniń shaxsına tiyisli maǵlıwmatlardı mámleketlik organları hám shólkemleri «Elektron húkimet» sisteması arqalı alǵanda bul haqqında xabarnamalar qabıl etiw;
paydalanıwshı óziniń shaxsına tiyisli maǵlıwmatlardı mámleket mákemeleri hám shólkeleri, xojalıq birlespeleri, mámleketlik emes shólkemler «Elektron húkimet» sisteması arqalı alıwı ushın ruxsat beriw;
nızamshılıqta názerde tutılǵan basqa jaǵdaylarda.
Mobil-ID sisteması arqalı xızmetlerden paydalanıwda paydalanıwshınıń Mobil-ID sisteması identifikaciyadan ótken mobil telefon nomerine bir mártelik unikal kodlı SMS-xabar jiberiledi hám usı kod sistemaǵa kiritilgende xızmetten paydalanıwǵa razılıǵı tastıyıqlanadı.
Qaǵıyda boyınsha, Mobil-ID sisteması identifikaciyanıń múddeti sheklenbeydi. Shaxs (paydalanıwshı) qálegen waqıtta hám óz qálewine kóre mámleketlik xızmetler orayları yaki BIMXPnıń mobil qurılması arqalı Mobil-ID sisteması identifikaciyasın biykar etiwi múmkin.
Mobil-ID sisteması operatorı Ádillik ministrliginiń «Ádillik organları hám mákemelerinde xabar-kommunikaciya texnologiyaların rawajlandırıw orayı» mámleketlik mákemesi esaplanadı.
Ádillik ministrligi tárepinen fiziykalıq shaxslardı Mobil-ID sisteması identifikaciyalawdı jolǵa qoyıw boyınsha xabar sisteması islep shıǵılıp, iske túsirilgen.
Qısqa qılıp aytqanda, Mobil-ID sisteması xalıqtıń aralıqtan turıp elektron mámleketlik xızmetlerinen ǵárezsiz paydalanıw imkániyatların keńeytedi hám xalıqqa qolaylıqlar jaratadı, mámleketlik xızmetlerin rawajlandırıw tarawındaǵı xalıqaralıq reytinglerde bolsa elimiz ornın jaqsılawǵa xızmet etedi.
Ádillik ministrligi jámiyetshilik penen baylanıslar bólimi.