Янгиликлар
06
Ólimdi dizimge alıw menen baylanıslı kompleks mámleketlik xızmet.
Ólimdi dizimge alıw menen baylanıslı kompleks mámleketlik xızmet.
Bul dúnyada hár bir nárseniń baslanıwı hám tamalanıwı bolǵanı sıyaqlı, insan ómiri de sanawlı bolıp, waktı kelip insan da bul dúnyanı tárk etedi. Puqaralardıń jeke hám múlkiy huqıqların qorǵaw maqsetinde bunday jaǵdaylar tiyisli organlar tárepinen dizimge alınıwı nızamshılıǵımızda belgilep qoyılǵan.
Ózbekstan Respublikası Shańaraq kodeksiniń 223-statyasına muwapıq puqara qaytıs bolsa Puqaralıq halatı aktlik jazıw organlarında (PHAJ) dizimge alınıwı belgilep qoyılǵan. Hátteki bala tiri tuwılıp, bir neshe minut jasasa da ólimi dizimge alınıwı tiyis. Ásirese óz waqtında dizimge alınıwı úlken áxmiyetke iye. Sebebi bul, ólimi haqqında gerbli guwalıq beriw ushın tiykar bolıp xızmet etedi. Ólim haqqındaǵı guwalıq shaxstıń ólimin hám onıń huqıq uqıplılıǵınıń tamamlanǵanlıǵın tastıyıqlawshı birden-bir hújjet bolıp esaplanadı.
Puqara qaytıs bolǵannan soń yaki óli jaǵdayda tabılǵannan soń úsh kúnnen keshiktirmey PHAJ organlarına arza beriliwi tiyis. Bunday arza marhumnıń miyrasxorları yaki jaqın aǵayinleri tárepinen, ayırım jaǵdaylarda medicinalıq mekemeler tárepinen beriliwi múmkin. Nızam boyınsha ólimdi puqaralıq halatı aktlerin jazıw organlarında dizimge almay turıp marhumdı jerlew qadaǵan etilgen.
Ózbekstan Respublikası Ministrler Kabinetiniń 2022-jıl 25-fevral kúngi 89 sanlı qararı menen «Ólimdi dizimge alıw menen baylanıslı kompleks mámleketlik xızmetlerdi kórsetiw boyınsha reglament»i qabıl etildi. Usı jıldıń 1-iyulınan baslap Ózbekstan Respublikasında ólimshilik jaǵdayları boyınsha kompazit xızmet kórsetiw jolǵa qoyıldı. Bunda medicinalıq mekemeler tárepinen qaǵaz formasında medicinalıq maǵlıwmatnamalardı beriw tártibi biykar etilip, elektron sistema arqalı medicinalıq maǵlıwmatnama PHAJ bólimlerine jiberiledi. PHAJ organları tárepinen dizimge alınǵan ólim boyınsha medicinalıq mekeme tárepinen QR-kod (matrik shtrixli kod) túsirilgen maǵlıwmatnama beriledi. Bul maǵlıwmatnama eki dana bolıp, birewi qábirstanǵa al, ekinshisi bankten ólim jaǵdayı ushın beriletuǵın bir mártelik pul alıw ushın bolıp tabıladı. Marhumnıń jaqınları qálegen waqıtta PHAJ organına múrájat etip ólimi haqqında gerbli guwalıqtı alıwı múmkin.
Bul ólim jaǵdaylarınıń óz waqtında dizimnen ótiwin támiyinleydi hám keleshekte kóshpes hám kósher múlklerdi miyras sıpatında rásmiylestiriwde kelip shıǵatuǵın hár túrli mashqalalardıń aldın alıwǵa unamlı tásirin tiygizedi.
Nókis rayonı PHAJ bólimi baslıǵı
T.Musaeva