Янгиликлар
02
Prezident Pármanı menen - jedel rawajlanıw deregi jaratıldı.
Prezident Pármanı menen - jedel rawajlanıw deregi jaratıldı.
Ózbekstan Respublikası Prezidentiniń 2022-jıl 31-avgustta «Qaraqalpaqstan Respublikasında isbilermenlik, innovaciyalıq texnologiyalar hám infrastrukturanı jedel pátlerde rawajlandırıw arqalı xalıqtıń abadanlıǵın arttırıwdıń qosımsha ilajları haqqında»ǵı PP-213-sanlı pármanı qabıl etildi.
Qabıl etilgen Pármannıń tiykarǵı maqseti, Qaraqalpaqstan Respublikasınıń sociallıq, ekonomikalıq, sonıń ishinde, óndiris hám investiciya potencialınan nátiyjeli paydalanıw, isbilermenlik jumısın rawajlandırıw hám joqarı qosımsha qunǵa iye básekiles ónimler islep shıǵarıwdı xoshametlew, isbilermenlerge kórsetiletuǵın finanslıq xızmetler kólemin keńeytiw, infrastrukturalıq sharayatlardı jaratıp beriw arqalı xalıqtıń bántligin támiyinlew hám aymaqtıń ekonomikalıq hám sociallıq rawajlanıwın jańa basqıshqa alıp shıǵıw bolıp tabıladı.
Bunda, Qaraqalpaqstan Respublikasında aymaqtıń investiciyalıq hám isbilermenlik ortalıǵın jaqsılaw hámde jaslar bántligin támiyinlew baǵdarı sheńberinde qatar qolaylıq hám imkániyatlar ortalıǵı jaratıladı.
Pármanǵa kóre, Qaraqalpaqstan Respublikasınıń barlıq rayonlarında jaylasqan hám usı aymaqta jumıs alıp barıp atırǵan isbilermenlik subektleri ushın 2023-jıldıń 1-yanvarınan 2028-jıldıń 1-yanvarına shekemgi dáwirde payda salıǵı, aylanıstan alınatuǵın salıq, yuridikalıq táreplerdiń múlkine salınatuǵın salıq hám yuridikalıq táreplerden alınatuǵın jer salıǵı boyınsha salıq stavkaları 50 payızǵa azaytılǵan halda esaplanıwı belgilengen. Sonday-aq, sociallıq salıq stavkası kemeytilip, 1 (bir) payız muǵdarındaǵı salıq stavkasında belgilengen.
Párman talabına tiykar, jeke tártiptegi isbilermenler tárepinen tólenip atırǵan sociallıq salıqlar qalalar aymaǵında jumıs alıp barıp atırǵanlar ushın 12 esege, rayonlar aymaǵında jumıs alıp barıp atırǵan isbilermenlerge 6 esege azaytılıp, jılına bazalıq esaplaw muǵdarınıń bir esesi muǵdarında belgileniwi názerde tutılǵan.
Isbilermenlik tarawın rawajlandırıwǵa qaratılǵan bunday jeńillikler álbette bul tarawda xızmet alıp barıwshı hámde óz isbilermenligin jolǵa qoymaqshı bolǵan hár bir puqara ushın oǵada qolay ortalıqtı jaratıwı sózsiz.
Párman talabına kóre, 2022-jıl 1-oktyabrden 2028-jıl 1-yanvarǵa shekem Qaraqalpaqstan Respublikasında islep shıǵarılǵan ónimlerdi sırt mámleketerge eksport etiwde, sonıń ishinde, eksport qılınatuǵın ónimlerdi islep shıǵarıw ushın satıp alınǵan shiyki zattı respublika boylap tasıwda transport qárejetleriniń 70 payızı Sırtqı sawda, investiciyalar, jergilikli sanaattı rawajlandırıw hám texnikalıq jaqtan tártipke salıw máseleleri boyınsha Húkimet komissiyası tárepinen belgilengen dizimge tiykarlanıp Eksporttı xoshametlew agentligi tárepinen qaplap beriledi.
Sonday-aq, Pármanda Qaraqalpaqstan Respublikasındaǵı jas isbilermenlerge óndiris hám xızmet kórsetiw ushın zárúr ásbap-úskeneler satıp alıw maqsetinde Húkimet komissiyasınıń qararına tiykarlanıp tikkeley, Investiciyalar hám sırtqı sawda ministrligi janındaǵı Jas isbilermenlerdi qollap-quwatlaw qorı arqalı 7 jıl múddetke qarız qarjıları usınıladı, hámde ajıratılǵan bul kredit qarjıları Qaraqalpaqstan Respublikası Ministrler Keńesiniń usınısları tiykarında Húkimet komissiyası tárepinen bólistirilip beriledi.
Sonıń menen qatar, Qaraqalpaqstan Respublikasında Isbilermenlik tarawın rawajlandırıw ushın 95 million AQSh dolları muǵdarındaǵı kredit liniyası kommerciyalıq banklerge 7 jıl múddetke, sonıń ishinde, 3 jıllıq jeńilletilgen dáwir menen jıllıq 10 payız stavkada milliy valyutada ajıratılıwı belgilengen.
Bunnan tısqarı, kommerciyalıq bankler tárepinen kreditler islep shıǵarıw hám xızmet kórsetiw tarawındaǵı joybarlardı ámelge asırıw (buǵan turaq jay qurılısı, sawda, dáldalshılıq tarawındaǵı joybarlar, sonday-aq, akcizastı tovarlar islep shıǵarıwshılar, mámleketlik kárxanalar hám ustav qorında (ustav kapitalında) mámleketlik úlesi bolǵan yuridikalıq tárepler hám aylanıs qarjıların tolıqtırıw jaǵdayları kirmeydi) ushın jıllıq 14 payızlı stavkada, 7 jılǵa shekemgi múddetke, sonıń ishinde, 2 jılǵa shekemgi jeńilletilgen dáwir menen 10 milliard sumǵa shekemgi muǵdarda ajıratıladı.
Pármanda, Qaraqalpaqstan Respublikasında jaylasqan hám usı aymaqta jumıs alıp barıp atırǵan isbilermenlik subektlerine biypul tiykarda járdemlesiwshi «Investorlarǵa járdem orayı»n hámde «Investorlarǵa járdem orayı» janında awıl xojalıǵına mólsherlengen bos turǵan uchastkalardan maydanı keminde 10 gektar bolǵan óndirislik texnoparkin shólkemlestiriw wazıypası belgilep berilgen.
Pármanda belgilep berilgen bunday imkaniyatlar Qaraqalpaqstan Respublikasında óz iskerligin jolǵa qoyǵan yaki isbilermenlik penen shuǵıllanıwdı qálewshi subektler ushın qolay ortalıqtıń jaratılıwı, tarawdıń jedel rawjlanıwına, eń baslısı xalıqtıń, sonıń ishinde, jaslar bántliginiń támiyinleniwi menen bir qatarda ondaǵı belgilengen wazıypalar orınlanıwı arqalı xalıqtıń abadan turmıs sharayatın elede jaqsılaw barısıeda ayrıqsha orın iyleydi.
Qaraqalpaqstan Respublikası Ádillik ministrligi.
2-sentyabr 2022-jıl