Янгиликлар
29
Juwapkershiligi sheklengen jámiyet
Juwapkershiligi sheklengen jámiyet
Juwapkershiligi sheklengen jámiyet dep, bir yamasa bir neshe shaxs tárepinen shólkemlestirilgen, ustav fondı shólkemlestiriw hújjetleri menen belgilengen muǵdarlarda úleslerge bólingen xojalıq jámiyetine aytıladı. Bunda qatnasıwshılar jámiyettiń májbúriyatları boyınsha juwapker bolmaydı hám jámiyettiń iskerligi menen baylanıslı zıyanlar ushın ózleri qosqan úlesler muǵdarı sheńberinde juwapker boladı.
Juwapkershiligi sheklengen jámiyet belgilengen tártipte mámleketlik dizimnen ótkerilgen waqıttan baslap yuridikalıq shaxs statusına iye boladı.
Jámiyet óziniń firma atı jazılǵan shtamp hám blankalarǵa, óziniń emblemasına hám basqada belgilerge iye bolıwǵa haqlı bolıp, óziniń ekrin balansında esapqa alınatuǵın ayrıqsha mal-múlkke iye bolıwı, májbúriyatlarǵa iye bolıwı, sudda dawager hám juwapker bolıwı múmkin.
Sonday-aq, jámiyet nızam menen qadaǵan etilmegen hár qanday xızmet túrleri menen shuǵıllanıwǵa haqlı, tek ǵana belgilengen ayrım iskerlik túrleri menen licenziya tiykarında shuǵıllanıwı múmkin.
Yuridikalıq hám fizikalıq shaxslar jámiyettiń qatnasıwshıları boladı. Nızamda ayrım túrdegi fizikalıq shaxslardıń jámiyette qatnasıwı qadaǵan etiliwi yamasa shekleniwi múmkin.
Jámiyet bir shaxs tárepinen shólkemlestiriliwi múmkin bolıp, ol jámiyettiń birden-bir qatnasıwshısına aylanadı. Jámiyet bir qatnasıwshı sıpatında bir shaxstan ibárat basqa xojalıq jámiyetke iye bolıwı múmkin emes hám qatnasıwshılar sanı eliw adamnan aspawı lazım.
Eger jámiyet qatnasıwshılarınıń sanı belgilengen normadan asıp ketse, jámiyet bir jıl ishinde ashıq akcionerlik jámiyet yamasa islep shıǵarıw kooperativi etip qayta dúziliwi kerek.
Jámiyettiń shólkemlestiriw shártnaması hám ustavı jámiyettiń shólkemlestiriw hújjetleri bolıp esaplanadı. Eger jámiyet bir shaxs tárepinen shólkemlestirilse, usı shaxs tastıyıqlanǵan ustav jámiyettiń shólkemlestiriw hújjeti esaplanadı. Jámiyet qatnasıwshılarınıń sanı eki hám onnan artıq shaxsqa kóbeyse, olar ortasında shólkemlestiriw shártnaması dúziliwi kerek.
Jámiyettiń ustav fondınıń (ustav kapitalı) kóbeytiwge ol tolıq tólengennen keyin jol qoyıladı. Bunda ustav fondın kóbeytiw jámiyet qatnasıwshıları ulıwma jıynalısınıń jámiyet qatnasıwshıları ulıwma dawısları sanınıń keminde úshten eki bóleginen ibárat kópshilik dawısı menen qabıl qılınǵan qararǵa tiykar ámelge asırıladı. Bunda jámiyettiń ustavında bunday qarardı qabıl qılıw ushın dawıslardıń bunnan kóbirek sanı zárúrligi názerde tutılǵan bolmawı kerek.
Jámiyet qatnasıwshılarınıń ulıwma jıynalısı jámiyet basqarıwınıń joqarı organı bolıp esaplanadı.
Qatnasıwshılardıń ulıwma jıynalıs bayanlamasında qatnasıwshılar ulıwma jıynalısı ótkeriletuǵın waqtı hám ornı, jıynalısta qatnasıp atırǵan qatnasıwshılar iye bolǵan dawıslardıń ulıwma sanı, jıynalıstıń baslıǵı hám xatkeri hám kún tártibi kórsetiledi.
Juwapkershiligi sheklengen jámiyet Nızam hújjetlerinde belgilengen táripte ıqtiyarıy táripte yamasa sudtıń qararına tiykar saplastırılıwı múmkin.
Qanlıkól rayonı ádillik bólimi MXO bólim baslıǵı: D.Qudenov