Янгиликлар
10
“Mámleketlik puqaralıq xızmeti haqqında”ǵı Nızam qabıl etildi
“Mámleketlik puqaralıq xızmeti haqqında”ǵı Nızam qabıl etildi
Mámleketlik puqaralıq xızmeti – mámleketlik xızmettiń bir túri bolıp, Ózbekstan Respublikası puqaralarınıń mámleketlik puqaralıq xızmeti lawazımlarındaǵı mámleketlik uyımlar wákillikleri ámelge asırılıwın támiyinlewge baylanıslı haqı tólenetuǵın kásiplik iskerlik esaplanadı.
Mámleketlik puqaralıq xızmetker degende mámleketlik puqaralıq xızmeti lawazımında óz iskerligin ámelge asırıp atırǵan shaxs esaplanadı.
Mámleketlik puqaralıq xızmetkerleriniń mámleketlik reestri Ózbekstan Respublikası Prezidenti tárepinen tastıyıqlanadı hámde Ózbekstan Respublikası Prezidenti janındaǵı Mámleketlik xızmetti rawajlandırıw agentligi tárepinen júrgiziledi.
Nızam menen mámleketlik uyımlarda puqaralıq xızmetin ótew tártibi, usı tarawdaǵı mámleketlik basqarıwı, mámleketlik xızmetkerlerdiń huqıqıy statusı belgilendi.
Mámleketlik puqarlıq xızmetin ótewde usı Nızam menen tártipke salınbaǵan múnásibetlerge Miynet kodeksi qollanıladı.
Mámleketlik xızmetke mámleketlik tildi biletuǵın, tiyisli mamanlıq talaplarına juwap beretuǵın Ózbekstan puqaraları qabıl etiledi.
Tómendegi shaxslar mámleketlik puqaralıq xızmetine qabıl etilmeydi:
- on segiz jasqa tolmaǵan shaxslar, eger mámleketlik puqaralıq xızmeti lawazımına baylanıslı mamanlıq talaplarında basqasha qaǵıyda belgilenbegen bolsa;
- sud tárepinen qatnasıq uqıplılıǵına iye emes yamasa qatnasıq uqıplılıǵı sheklengen dep tabılǵan shaxslar;
- sudtıń qararı menen belgili múddetke mámleketlik puqaralıq xızmeti lawazımların iyelew huqıqınan ayırılǵan shaxslar;
- korrupciyaǵa baylanıslı jınayatlardı islewde sud tárepinen ayıplı dep tabılǵan shaxslar;
- medicinalıq juwmaqqa tiykar densawlıǵınıń jaǵdayı mámleketlik puqaralıq xızmeti lawazımın iyelew imkaniyatın bermeytuǵın shaxslar.
Mámleketlik xızmetker óz basshısınıń nızamsız tapsırma hám talapların orınlawdan bas tartıw, korrupciya haqqında xabar bergende mámleket qorǵawında bolıw huqıqına iye.
Mámleketlik xızmetker isbilermenlik penen shuǵıllanıwı, olardıń shólkemlestiriwshisi bolıwı, Ózbekstannan tısqarıda esapbetler ashıw, shet elde kóshpes múlk alıwı, shet el mámleketiniń puqaralıǵın alıw, pedagogikalıq, ilimiy hám dóretiwshilik jumısınan basqa haq tólenetuǵın iskerlik penen shuǵıllanıw, óz xızmet wákilliklerin fizikalıq hám yuridikalıq shaxslardıń máplerin gózlep orınlaw yamasa orınlamaw esesine olardan qanday da bir sıylıq, sawǵa yamasa payda alıwı qadaǵan etiledi.
Mámleketlik xızmetker dáramatları hám mal-múlki haqqında deklaraciya beriwi kerek.
Prezident tárepinen tastıyıqlanatuǵın mámleketlik puqaralıq xızmeti lawazımlarınıń reestri Mámleketlik xızmetin rawajlandırıw agentligi tárepinen júrgiziledi.
Mámleketlik xızmetkerler ushın 5 kúnlik jumıs háptesi hám háptesine 40 saattan aspaytuǵın jumıs dawamlılıǵı belgilenedi.
Mámleketlik xızmetkerlerge haqı tólew tómendegilerden ibarat:
▫️bazalıq lawazım aylıǵı;
▫️kóp jıllıq xızmeti ushın qosımsha tólem;
▫️mamanlıq dárejesi ushın qosımsha tólem;
▫️eń áhmiyetli nátiyjelik kórsetkishlerine eriskenligi ushın ústeme;
▫️esabat dáwiri juwmaqları boyınsha xoshametlewshi tólemler.
Mámleketlik xızmetkerlerge sógis, járiyma, jumıstan bosatıw menen bir qatarda mamanlıq dárejesin tómenletiw hám lawazımın tómenletiw tárizindegi intizamiy sharalar da qollanıladı.
Mámleketlik xızmetkerlerge 27 kúnnen kem bolmaǵan jıllıq tiykarǵı dem alıs beriledi.
Nızam rásmiy járiyalanǵan kúnnen baslap 3 ay ótkennen keyin kúshke kiredi.
Zebo Bazarbaeva,
Qaraqalpaqstan Respublikası
Ádillik ministrligi aǵa másláhátshisi