Янгиликлар
22
Puqaralar nızamsız is-háreketlerdi islemeń, bunday hareketler islengenlik ushın hákimshilik hám jınayıy juwapkershilik belgilengen
Puqaralar nızamsız is-háreketlerdi islemeń, bunday hareketler islengenlik ushın hákimshilik hám jınayıy juwapkershilik belgilengen.
Ózbekstan Respublikasında alıp barılıp atırǵan ashıqlıq hám óz erk-ıqrarın nızamlı túrde bildiriw ikaniyatı jaratılganlıǵına qaramastan, 2022-jıldıń 1-2-iyul kúnleri Nókis qalasında bir topar shaxslar tárepinen Qaraqalpaqstan Respublikasınıń mámleketlik basqarıw uyımların iyelewge urınıwǵa qaratılǵan nızamsız háreketler júz berdi.
Populistlik súrenlerdi nıqap etip, puqaralardıń sanası hám isenimin manipuliyaciyalap, tártipsizliklerdiń shólkemlestiriwshileri hákimiyat wákilleriniń nızamlı talaplarına boysınbay, puqaralardı Qaraqalpaqstan Respublikasınıń hákimshilik imaratları aldındaǵı orınǵa jıynaldı.
Úshinshi kúshler tárepinen Ózbekstandaǵı jámiyetlik-siyasiy jaǵdaydı turaqsızlandırıw, onı izden shıǵarıwǵa urındı.
Húrmetli zamanlaslar, Ózbekstan hám Qaraqalpaqstan Respublikası Konstituciyalarına muwapıq, puqaralar Konstituciya hám nızamlarǵa boysınıwǵa, basqa adamlardıń huqıqları, erkinlikleri, abıroyı hám qádir-qımbatın húrmet etiwge minnentli dep kórsetilgen.
Sonıń menen bir qatarda, Konstituciyada hár kim pikirlew, sóz hám isenim erkinligine, hár kim ózi qalegen maǵlıwmattı izlew, alıw hám onı tarqatıw huqıqına iye ekenligi, ámeldegi konstituciyalıq dúzimge qarsı qaratılgan málimleme hám nızam menen belgilengen basqa sheklewler buǵan kirmeytuǵınlıǵı kórsetilgen.
Usılardan kelip shıǵıp, puqaralardı nızamsız is-háreketlerdi islemewge, bunday hareketler ushın hákimshilik hám jınayıy juwapkershilik belgilengenligin esletip ótemiz.
Ózbekstan Respublikasınıń Hákimshilik juwapkershilik haqqındaǵı kodeksiniń 201-statyasında jıynalıslar, mitinglar, kóshe júrisleri yamasa shıǵıwlardı shólkemlestiriw, ótkeriw tártibin buzıw:
- bazalıq esaplaw muǵdarınıń alpıs esesinen seksen esesine shekem muǵdarda járiyma salıwǵa yamasa on bes sutkaǵa shekem múddetke hákimshilik qamaqqa alıwǵa sebep boladı.
Jınayat kodeksiniń 217-statyasında usı háreketlerdi olardıń shólkemlestiriwshisi tárepinen buzıw usı háreketler ushın hákimshilik jaza qollanılǵannan keyin islengen bolsa:
- bazalıq esaplaw muǵdarınıń eki júz esesinen úsh júz esesine shekemgi muǵdarda járiyma yamasa úsh júz alpıs saatqa shekem májbúriy jámiyetlik jumıslar yamasa bir jıldan úsh jılǵa shekem erkinlikti sheklew yamasa úsh jılǵa shekem erkinlikten ayırıw jazası menen jazalanadı.
Ózbekstan Respublikasınıń Hákimshilik juwapkershilik haqqındaǵı kodeksiniń 202-statyasında ruqsat etilmegen jıynalıslar, mitingler, kóshe júrisleri hám shıǵıwlar qatnasıwshılarına imaratlar yamasa basqa múlk (baylanıs quralları, kóbeytiriletuǵın hám basqa túrdegi texnikalıq úskeneler, transport)ti beriw yamasa sonday ilajlardı ótkeriw ushın sharayatlar jaratıw:
- puqaralarǵa bazalıq esaplaw muǵdarınıń eliw esesinen júz esesine shekem, lawazımlı shaxslarǵa bazalıq esaplaw muǵdarınıń jetpis esesinen bir júz eliw esesinen shekemgi muǵdarda járiyma salıwǵa sebep boladı dep kórsetilgen.
Usı kodekstiń 2022-statyasında jámiyetlik tártipke yamasa qáwipsizlikke qáwip salıwshı jalǵan málimlemeni tarqatıw, sonıń ishinde ǵalaba xabar qurallarında, telekommunikaciya tarmaqlarında yamasa Internet dúnya júzlik málimleme tarmaǵında tarqatıw:
- bazalıq esaplaw muǵdarınıń eliw esesinen júz esesine shekemgi muǵdarda járiyma salıwǵa sebep boladı.
Sonday-aq, milliy, rasalıq, etnikalıq yamasa diniy jek kóriwshilikti úgit-násiyatlawshı materiallardı tarqatıw maqsetinde tayarlaw, saqlaw yamasa tarqatıw hákimshilik hám jınayıy juwapkershilikke sebep boladı.
Qaraqalpaqstan Respublikası Ádillik ministrligi