Янгиликлар
27
Bir múrájat izinen
Nızamsız jumıstan bosatılǵan puqara qayta jumısqa tiklendi.
Taqıyatas rayonı ádillik bólimine puqara D.Yu Taqıyatas rayonı Xalıq bilimlendiriw bólimine qaraslı 10-sanlı orta arnawlı bilimlendiriw mektebi direktorı tárepinen tiykarsız jumıstan bosatıw haqqında eskertiw xatı berilip, jumıstan bosatılǵanlıǵınan narazı bolıp, arza menen múrájat etken.
Bólim juwaplı xızmetkerleri tárepinen múrájat úyrenilip shıǵılǵanda, mektep dirktorı tárepinen 2022-jıl 11-aprelde “Miynet shártnamasın biykar etiw haqqında” buyrıq qabıl etilgenligi hám oqıtıwshı bolıp islep kelgen D.Yu menen dúzilgen miynet shártnaması Ózbekstan Respublikasınıń Miynet kodeksiniń 100-statyası ekinshi bólimine kóre biykar etilgenligi hámde bul buyrıq nızam talapları buzılǵan halda shıǵarılǵanlıǵı anıqlanǵan.
Miynet kodeksiniń 100-statyası talabına tiykar belgisiz múddetke dúzilgen miynet shártnamasın da, múddeti tamamlanǵanǵa shekem múddetli miynet shártnamasın da jumıs beriwshiniń baslaması menen biykar etiw tiykarlı bolıwı kerek ekenligi belgilengen, sonday-aq, usı statyanıń 2-bólimi 2-bántine tiykar xızmetkerdiń mamanlıǵı jeterli bolmaǵanlıǵı yaki densawlıǵı jaǵdayına bola orınlap kelgen jumısına ılayıq bolmay qalıwı miynet shártnamasın biykar etiwdiń tiykarlılıǵın bildiriwi belgilengen.
Puqara D.Yudıń mamanlıǵı jeterli emesligi haqqında yaki densawlıǵı tómenlegeniligi haqqında birde-bir hújjet bolmasa da mektep direktorı baslaması menen miynet shártnaması biykar etilgen hám bul boyınsha buyrıq shıǵarıp nızam buzıw jaǵdayına jol qoyǵan.
Joqarıdaǵılarǵa tiykar Taqıyatas rayonı ádillik bólimi tárepinen Nókis rayonlar aralıq puqaralıq isleri boyınsha sudına dawa arza kirgizilip, sudtıń 20.06.2022-jılǵı biyligine tiykar puqara D.Yu óz jumıs ornına qayta tiklendi hámde nızamǵa qayshı ráwishte jumıstan bosatılıp májbúriy bos júrgen dáwiri hámde puqaraǵa keltirilgen ruwxıy zıyan óndiriliwi de belgilendi.
Bunnan tısqarı mektep direktorına Ózbekstan Respublikası Hákimshilik juwapkershilik haqqındaǵı Kodeksiniń 49-statyasına tiykar bazalıq esaplaw muǵdarınıń 5 esesi muǵdarında járiyma jazası tayınlandı.
Qaraqalpaqstan Respublikası Ádillik ministrligi Jámiyetshilik penen baylanıslar xızmeti.