Янгиликлар
19
SHuqurqaqta kóshpeli qabıllaw ótkerildi.
Qaraqalpaqstan Respublikası Ádillik ministrliginiń Rejesi hámde Ózbekstan Respublikası Prezidentiniń 2022-jıl 20-aprel kúngi «Mámleketlik xızmetlerin kórsetiwdi ápiwayılastırıw, byurokratik tosıqlardı qısqarttırıw hámde mámleketlik xızmetlerdi kórsetiw milliy sistemasın rawajlandırıwdıń qosımsha is-ilájları haqqında»ǵı PF-113-sanlı pármanınıń «Mámleketlik xızmetlerdi kórsetiwde puqara itibar orayında» (Citizen — centric service) principine tiykar náwbettegi kóshpeli qabıllaw hám mámleketlik xızmetler kórsetiw processi Ellikqala rayonı hákimlik orayınan 230 km uzaqlıqta jaylasqan SHuqurqaq mákán puqaralar jıyınında bolıp ótti.
SHuqurqaq mákán puqaralar jıyınınıń xalqı sanı jámi 686 adamnan ibarat bolıp sonnan xojalıqlar sanı 83, shańaraqlar sanı 141 quraydı, xalıqtıń tiykarǵı dáramat dáregi qorako'lshilik, jılqıshılıq, tuyeshilik hám sharwashılıqtan ibarat. Máhellede bir mektep hám bir mektepge shekemgi bilimlendiriw shólkemi jaylasqan.
Ótkerilgen kóshpeli qabıllaw Qaraqalpaqstan Respublikası Ádillik ministrligi baslaması menen hámde Ózbekstan Respublikası Oliy Májlisi Insán huqıqları boyınsha Wakil (Ombudsman)nıń Qaraqalpaqstan Respublikası boyınsha aymaqlıq wákili menen birgelikte ótkerilip, kóshpeli qabıllawdan gózlengen tiykarǵı maqset eń shetki hám uzaq orınlarda jaylasqan xalıq qatlamınıń múrájátlerin esitiw, olarǵa sıpatlı mámleketlik xızmetler kórsetiw, olardı qıynap kelgen mashqalalardı úyreniw hám sheshiwde ámeliy járdem beriw hámde Mámleketimiz nızamshılıǵında ámelge asırılıp atırǵan jańa reformalardı túsindiriw bolıp tabıladı.
Kóshpeli qabıllawda SHuqurqaq MPJ puqaraları tárepinen 40 tan aslam múrájátler kelip túsip, kelip túsken múrájátler mazmunı boyınsha pensiya támiynatı, balalardı mektepke shekemgi bilimlendiriw mekemesine jaylastırıw ushın dizimge qoyıw, kadastr hújetlerin tayarlaw, elektron sanlı tańbalar alıw hám taǵı basqa mazmundaǵı múrájátlerden ibárat bolıp, qılınǵan múrájátler úyrenilip shıǵıw ushın tiyisli tártipte dizimge alındı.
Sonday-aq, kóshpeli qabıllaw dawamında awıl turǵınlarına biypul medicinalıq xızmetler kórsetilip densawlıqları kórikten ótkerilgen bolsa, Mámleketlik xızmetler orayı tárepinen tiyisli xızmetler de kórsetildi.
Awıl puqaraları jıyını aymaǵında Ellikala rayonı Xalıq bilimlendiriw bólimine qaraslı 33-sanlı ulıwma bilim beriw mektebi hám 27-sanlı Mektepke shekemgi bilimlendiriw mekemesi jaylasqan bolıp Ádillik ministri usı bilim dárgáylarında bolıp, oqıwshı jaslar menen ushrastı. Ushrasıw dawamında bilim oraylarınıń jaǵdayları menen jaqınnan tanısıp sawǵalar tapsırdı.
Nokis Yuridikalıq texnikumı direktorı M.Utepbergenov Ellikala rayonı Xalıq bilimlendiriw bólimine qaraslı 33-sanlı ulıwma bilim beriw mektebiniń pitkeriwshi klass oqıwshıları menen ushrasıp Texnikum iskerligi menen jaqınnan tanıstırıp bul jerde bilim alıp atıǵan jaslarǵa jaratılǵan shárt-sharáyatlar menen bir qatarda pitkeriwshi jaslarǵa qollanılatuǵın imtiyaz hám jeńillikler haqqında keńnen túsinik berdi.
Iláj dawamında puqaralarǵa jańadan qabıl etilgen nızam hám nızam astı hújjetleri mazmunı jarıtılǵan tarqatpa hám kórgizbeli materiallar tarqatıldı.