Янгиликлар
27
QARAQALPAQSTAN RESPUBLIKASI KONSTITUCIYASINA 29 JIL
QARAQALPAQSTAN RESPUBLIKASI KONSTITUCIYASINA 29 JIL
Konstituciya mámleketimizdegi joqarı yuridikalıq kúshke iye bolǵan xuqıqıy xújjet bolıp esaplanadı. Konstituciya tiykarında xám onıń orınlanıwın támiyinlew maqsetinde basqa nızamshılıq xújjetleri kabıl etiledi.
1985-1990-jıllarda SSSRda alıp barılǵan qayta qurıw jámiyetlik-siyasiy, social-ekonomikalıq xám mámleketlik turmıstı ózgertip jiberdi. Usınıń nátiyjesinde Ózbekstanda, sonıń menen bir qatarda Qaraqalpaqstanda da jámiyettiń xám mámlekettiń dáwir talabına sáykes rawajlanıw processine unamlı tásir tiygizetuǵın, onı retlestiretuǵın xám tártipke salatuǵın yuridikalıq xújjet bolıw kerek edi.
Mine usınday jámiyetlik-siyasiy awxalda Qaraqalpaqstan Respublikası Joqarǵı soveti tárepinen dúzilgen Konstituciyalıq komissiya Konstituciya joybarın islep shıqtı.
Konstituciya joybarı 2 márte pútkil xalıqlıq dodalawǵa qoyıldı.
1993-jıl 9-aprel kúni Joqarǵı sovettiń 12-shaqırıq 12-sessiyasında Qaraqalpaqstan Respublikası Konstituciyasın qabıl etiw xaqqındaǵı Nızam qabıl etildi.
Konstituciyanıń qabıl etiliwi menen jámiyetlik hám mámleket qurılısınıń barlıq salalarındaǵı qatnasıqlardı, milliy nızamshılıǵımızdıń bárshe tarawların tártipke salıwshı anıq huqıqıy sistema jaratıldı. Puqaralardıń huqıq hám erkinlikleriniń kepillikleri mámleket tárepinen kepillendi.
Sonday-aq, Konstituciyada mámleketlik hákimiyattıń bóliniwi tiykarında ámelge asırılıwın belgiledi, pikirlerdiń kóp túrliligine hámde kóp partiyalılıqqa tiykar jarattı.
Mámleket siyasatındaǵı túpkilikli ózgerislerdi ózinde sáwlelendirgen Konstituciyada bazar qatnasıqlarına tiykarlanǵan jámiyettiń ekonomikalıq negizi bolǵan jeke múlkshilik, erkin isbilermenlik sıyaqlı institutlar bekkem huqıqıy tiykarǵa iye boldı.
Konstituciyamızda Qaraqalpaqstan Respublikası óziniń nızam arqalı tastıyıqlanǵan mámleketlik nıshanları – bayraǵına, gerbine hám gimnine iye ekenligi kórsetilgen.
1993-jıl 9-aprel kúni jáne bir áhmiyetli hújjet, Qaraqalpaqstan Respublikasınıń mámleketlik gerbi haqqındaǵı Nızamı qabıl etildi.
Qaraqalpaqstan Respublikasınıń Mámleketlik gerbi Qaraqalpaqstan Respublikası mámleketlik suverenliginiń nıshanı bolıp tabıladı.
Konstituciya 6 bólim, 26 bap, 121-statyadan ibárat.
Xabarıńız bar keyingi jıllarda mámleketimizde keń kólemli reformalar ámelge asırılmaqta. Mámleket hám jámiyet rawajlanıwı, sud huqıq tarawındaǵı reformalar nátiyjesinde Konstituciyamızǵa 1994-jıl, 1995, 1997, 2003 xám 2014, 2019 (29-iyun hám 16-dekabrde) hám 2021-jıl 12-fevral kúni ózgeris xám qosımshalar kirgizildi.
Búgingi kúnde húrmetli Prezidentimizdiń Qaraqalpaqstan Respublikasın rawajlandırıwǵa baylanıslı qabıl etilip atırǵan hújjetleri, respublikamızǵa saparı daӯamında belgilep bergen ӯazıypaları tiykarında tek ǵana paytaxt Nókis qalasında emes, al eń shetki rayon hám aӯıllardıń kelbeti, onda jasaӯshı puqaralardıń turmıs tárizi ózgermekte.
Qońırat rayonı ádillik bólimi baslıǵı
3-dárejeli ádillik másláhatshısı
Mambedullayev Jamiy Allamuratovich