Янгиликлар
01
Ipoteka kreditleri tiykarında turaq-jay satıp alıw ushın subsidiya alıw ushın qanday hújjetler usınıladı?
Subsidiya — ipoteka kreditleri tiykarında turaq-jay satıp alıw ushın baslanǵısh tólem hám (yamasa) kredit payızınıń bir bólegin qaplaw maqsetinde mámleket byudjetinen puqara ushın bankte onıń atına ashılǵan tiyisli esap betine ótkerilgen pullar.
Arza beriwshi— ipoteka kreditleri boyınsha baslanǵısh tólem hám (yamasa) payız qárejetleriniń bir bólegin qaplaw ushın subsidiya alıw maqsetinde arza menen múrájat etiwshi 18 jasqa tolǵan Ózbekstan Respublikası puqarası.
Arza beriwshi ipoteka kreditleri boyınsha subsidiya alıw ushın qálegen rayon (qala) Mámleketlik xızmetleri oraylarına ózi kelip múrájat etedi yamasa Birden-bir interaktiv mámleketlik xızmetleri portalında mámleket xızmetinen electron tárizde paydalanıw ushın dizimnen ótedi.
Arzanı kórip shıǵıwshı juwapker shólkemler:
• medicina birlespesi;
• ishki isler bólimi (basqarması);
• qarjı bólimi;
• mámleketlik salıq inspekciyasi;
• xalıq bántligine kómeklesiw orayı;
• jer dúziw hám kóshpes múlk kadastrı mámleketlik kárxanası;
• rayon (qala) máhelle hám shańaraqtı qollap-quwatlaw bólimleri;
• Ózbekstan jaslar awqamınıń rayon (qala) keńesi;
• rayon (qala) hákimligi;
• qatnasıwshı kommerciyalıq bankleri.
Usınıs etiletuǵın hújjetler:
• fizikalıq shaxstıń jeke identifikaciya nomeri maǵlıwmatları;
• shańaraq aǵzalarınıń fizikalıq shaxstıń jeke identifikaciya nomeri maǵlıwmatları hám neke belgilengenligi gúwalıǵı (tolıq shańaraq hám neke hámde erjetken perzentler bar bolǵan jaǵdayda) hám (yamasa) perzentler tuwılǵanlıǵi haqqındaǵı gúwalıqlar (jas óspirim perzentler bar bolǵan jaǵdayda) nusqaları;
• belgilengen tártipte neke biykar etilgenligi haqqındaǵı gúwalıq yamasa neke haqıyqıy emes dep tán alınǵanlıǵı haqqında sud sheshimi (neke belgilengen jaǵdayda) yamasa shańaraqlıq jaǵdayı haqqında puqaralıq halatı aktlerin jazıw uyımları arxivinen málimleme nusqası (neke belgilengen yamasa belgilenbegen jaǵdayda);
• turaqlı jasaw ornı boyınsha dizimge alınǵan jerinen kadastr nomeri hám túrine tiyisli maǵlıwmatlar (eger turar jayı turaqlı jasaw ornı boyınsha dizimge alınǵan jeri menen tuwrı kelse);
• turaqlı jasaw ornı boyınsha dizimge alınǵan jerinen úy dápteriniń yamasa kvartiralar boyınsha kartochkanıń (17-forma) nusqası (eger turar jayı turaqlı jasaw ornı boyınsha dizimge alınǵan jeri menen tuwrı kelse);
• arza beriwshi hám birgelikte qarız alıwshılardıń tabısı hám uslap qalınǵan dáramat salıqları haqqındaǵi málimleme (qosımsha dáramatlar bolsa salıq deklaraciyası).
• Mámleketlik xızmetleri orayınan subsidiya beriw haqqında unamlı xabarnamanı alǵan talaban xabarnamada kórsetilgen satıp alınıwı múmkin bolǵan turaq-jaydıń joqarı muǵdarınan aspaǵan muǵdarı turaq-jaydı ipoteka krediti arqalı satıp alıw boyınsha qurılıs (pudrat) shólkemi menen shártnama dúzedi.
Subsidiyalar muǵdarı:
• awıllıq orınlarda — birinshi bes jıl dawamında ipoteka krediti boyınsha payız tólemleri menen baylanıslı qárejetlerdi qaplaw ushın — 10 procentlik punktten asqan bólegine;
• qalalarda — baslanǵısh tólemlerdıń bir bólegin tólew menen baylanıslı qárejetlerdi qaplaw ushın turaq-jaydıń esaplanǵan muǵdarınıń 10 payız muǵdarında hám birinshi bes jıl dawamında kredit boyınsha payızlardı qaplaw ushın — Tashkent qalasında 12 payızlıq punktten asqan bólegine, Qaraqalpaqstan Respublikası hám wálayatlar qalalarında 10 payızlıq punktten asqan bólegine tólenedi.
Shomanay rayonı ádillik bólimi
bas másláhátshisi E.Kannazarov