Янгиликлар
20
Nızamshılıqtaǵı_jańalıqlar
“Kózi kórmeytuǵın hám ázzi kóretuǵın balalar ushın qánigelestirilgen mektep-internatlarda bilimlendiriwdiń sapasın arttırıw jáne olardıń jumısın bunnan bılay da jetilistiriw ilajları haqqında”ǵı Prezident qararı qabıllandı.
Qararǵa kóre, kózi kórmeytuǵın hám ázzi kóretuǵın balalar ushın qánigelestirilgen mektep-internatları Ishki isler ministrligine biriktirilip, «Nurlı mákan» qánigelestirilgen mektep-internatları («Nurlı mákan» mektepleri) dep ataladı.
Respublikalıq kóz kesellikleri klinikalıq emlewxanası, Respublikalıq qánigelestirilgen kóz mikroxirurgiyası orayı, Tashkent medicinalıq akademiyası, Tashkent pediatriya medicina institutı jáne basqa da medicinalıq mákemelerdiń maman shıpakerlerin tartqan halda, «Nurlı mákan» mektepleriniń oqıwshıların emlew-salamatlandırıw hám reabilitaciyalaw ámeliyatı jolǵa qoyıladı.
Sonday-aq, oqıwshılarǵa zorlıq jáne olar arasında óz janına qastıyanlıq etiw jaǵdaylarınıń aldın alıw boyınsha profilaktika jumısların sistemalı jolǵa qoyıw sheńberinde barlıq «Nurlı mákan» mektepleriniń aymaǵına videobaqlaw úskeneleriniń ornatıladı hám olar tiyisli aymaqlıq ishki isler uyımlarına integraciya etiledi.
2022-2023-oqıw jılınan baslap:
▫️ «Nurlı mákan» mektepleriniń Brayl jazıwındaǵı sabaqlıqlar hám oqıw qollanbalar, kórkem sonday-aq, balalar ushın mólsherlengen ádebiyatlar, hár qıylı qánigelik hám baǵdarlardaǵı baspa hám audiokitaplarǵa bolǵan talabı hár altı ayda úyreniledi hám sol tiykarda ádebiyatlar dizimi qáliplestirilip barıladı;
▫️ kózi kórmeytuǵın hám ázzi kóretuǵın balalar ushın belgilengen wálayat hám respublika pán olimpiadaları pitkeriwshi klasslardıń oqıwshıları ushın óz aldına shólkemlestiriledi;
▫️ «Nurlı mákan» mektepleriniń oqıwshıları ushın málimleme texnologiyaları, shet tillerin, kásip-óner hám isbilermenlikti úyretiw boyınsha oqıw kursları shólkemlestiriledi;
▫️ joqarı bilimlendiriw mákemeleriniń tiyisli qánigelik hám baǵdarları boyınsha Brayl álipbesi tiykarındaǵı ádebiyatlardı basıp shıǵarıw sisteması jolǵa qoyıladı;
▫️ kózi kórmeytuǵın hám ázzi kóretuǵınlar ushın sabaqlıqlar hám oqıw-metodikalıq kompleksler basıp shıǵaratuǵın baspa-tipografiya kárxanaları menen deklaraciya etilgen bahalar tiykarında belgilengen tártipte shártnamalar dúziwge ruqsat beriledi.
2022-jıl sentyabrden baslap «Nurlı mákan» mektepleriniń oqıwshıların kásip-ónerge úyretiw jáne pitkeriwshilerdiń kásip iyelewin támiyinlew maqsetinde mákemelerde ul hám qız balalar ushın ayrıqsha zamanagóy úskenelengen sociallıq hám turmıslıq baǵdardaǵı kompleks (oqıw ustaxana)ler shólkemlestiriledi.
Sonday-aq, inklyuziv tálim sisteması engizilgen bilimlendiriw mákemelerinde kózi ázzi kórmeytuǵın hám ázzi kóretuǵın balalardıń jaqın tuwısqanlarına olar menen birge sabaqlarda qatnasıw múmkinshiligi jaratıladı.
2022-jıldıń aqırına shekem «Nurlı mákan» mektepleri ushın ózbek sóylew sintezatorı hám basqa da semantikalıq-esitiw quralları menen únles túrde milliy dizayndaǵı arnawlı kompyuter baǵdarlamaları jaratıladı hám oqıw procesinde qollanıladı.
2022-jıldıń aqırına shekem «Qáwipsiz jol hám qáwipsiz piyada» respublikalıq qorınıń qarjıları esabınan «Nurlı mákan» mektepleri aymaǵında «Jol háreketi qaǵıydaların úyretiw arnawlı maydansha»ların shólkemlestirsin jáne kózi kórmeytuǵın hám ázzi kóretuǵın balalar jasaytuǵın aymaqlarda dawıslı svetoforlar hám innovaciyalıq jol belgilerin ornatıw ilajları kóriledi.