Янгиликлар
02
KONSTITUCIYA-PÁRAWAN TURMÍS TIYKARÍ
Konstituciya sózi latınsha “Constitution”-dúziliw,dúziw degen mánislerdi bildirip mámlekettiń Tiykarǵı nızamı. Ol mámleket dúzilisin, húkimet hám basqarıw organları sistemasın, olardıń wákillikli hám de qáliplestiriw tártibi, saylaw sisteması,puqaralardıń huqıq hám erkinlikleri, jámiyet hám shaxstıń óz-ara munásebetleri, sonıń menen birge, sud sistemasın hám de mámleket hám jámiyettiń óz-ara munásebetlerın belgilep beredi.Konstituciya mámleketimizdegi joqarı yuridikalıq kúshke iye bolǵan huqıqıy hújjet bolıp esaplanadı.Konstituciya tiykarında hám onıń orınlanıwın támiyinlew maqsetinde basqa nızamshılıq hújjetleri qabıl etiledi.
Joqarǵı sovettiń 1993-jıl 9-aprel kúni 12-shaqırıq 12-sessiyasında VI bólim XXVI bap hám 121 statiyadan ibarat Qaraqalpaqstan Respublikası Konstituciyası qabıl etildi.Konstituciyanıń qabıl etiliwi menen jámiyetlik hám mámleket qurılısınıń barlıq salalarındaǵı qatnasıqlardı, milliy nızamshılıǵımızdıń bárshe tarawların tártipke salıwshı anıq huqıqıy sistema jaratıldı. Puqaralardıń huqıq hám erkinlikleriniń kepillikleri mámleket tárepinen kepillendi.
Sonday-aq, Konstituciyada mámleketlik hákimiyattıń bóliniwi tiykarında ámelge asırılıwı, pikirlerdiń kóp túrliligi hámde kóp partiyalılıqqa tiykar jarattı.Tiykarǵı nızamda Qaraqalpaqstan Respublikası óziniń nızam arqalı tastıyıqlanǵan mámleketlik nıshanları–bayraǵına, gerbine hám gimnine iye ekenligi kórsetilgen.1993-jıl 9-aprel kúni jáne bir áhmiyetli hújjet, Qaraqalpaqstan Respublikasınıń mámleketlik gerbi haqqındaǵı Nızamı qabıl etildi.Qaraqalpaqstan Respublikasınıń Mámleketlik gerbi Qaraqalpaqstan Respublikası mámleketlik suverenliginiń nıshanı bolıp, oǵan tereń húrmet kórsetiw hár birimizdiń minnetimiz bolıp tabıladı.Xabarıńız bar keyingi jıllarda mámleketimizde keń kólemli reformalar ámelge asırılmaqta.
Mámleket hám jámiyet rawajlanıwı, sud huqıq tarawındaǵı reformalar nátiyjesinde Konstituciyamızǵa 1994-jıl,1995,1997,2003 hám 2014, 2019 (29-iyun hám 16-dekabrde) hám 2021-jıl 12-fevral kúni ózgeris hám qosımshalar kirgizildi.
Búgingi kúnde biz konstituciyalıq normalardıń ámelde orınlanıwın támiyinlewge, xalqımızdıń turmıs-tárizin jaqsılawǵa, mámleketlik uyımlardıń xalıq aldındaǵı juwapkershiligin asırıwǵa qaratılǵan bir qatar nızam hújjetleri qabıl etilip atırǵanlıǵınıń gúwası bolmaqtamız.
Juwmaq ornında sonı atap ótiwimiz kerek, Konstituciyamızdıń 15-statyasında Qaraqalpaqstan Respublikasında Ózbekstan Respublikası menen Qaraqalpaqstan Respublikası Konstituciyalarınıń hám nızamlarınıń sózsiz ústinligi moyınlanatuǵınlıǵı,46-statyada puqaralar Konstituciyanı hám nızamlarǵa ámel etiwge, basqa adamlardıń huqıqların, erkinliklerin, ar-namısın hám qádir-qımbatın húrmetlewge minnetli ekenligi belgilep berilgen.
Kegeyli rayonı Yuridikalıq
xızmet kórsetiw orayı
bas yuristkonsulti I.Aleuatdinov