Янгиликлар
30
Ózbekstan Respublikası Miynet kodeksinde belgilengen dem alıs hám bayram kúnlerı
Insaniyat payda bolıwı jáne onıń rawajlanıwı dáwirinde neshe zamanlar ótsede, miynet munasábetleri hesh qashan óz aktuallıǵın joǵatpaǵan. Ásirese, kárxana, shólkem hám mekemelerde ekonomikalıq qıyınshılıq júzege kelip, bul processler jáne de quramalastı.Barlıq xızmetkerlerge, sonday-aq orındaslıq tiykarında islep atirǵan xızmetkerlerge, dem alıw hám jumıs qábiletin qayta tiklew ushın jumıs ornı hám ortasha mıynet haqı saqlanǵan halda 15 jumıs kúninen kem bolmaǵan 48 jumıs kúninen kóp bolmaǵan múddet menen jıllıq miynet dem alısı beriledi.Sonday-aq bárshe xizmetkerlerge jası, densawlıǵı, jaǵdayı hám miynet sharayatlarına qarap jıllıq uzaytırılǵan tiykarǵı dem alıs hám jıllıq qosımsha dem alıslar beriledi.
Xızmetkerlerge jası hám densawlıǵın jaǵdayın esapqa alıp, jıllıq uzaytırılǵan tiykarǵı dem alısı 18 jasqa tolmaǵan shaxslarǵa 30 kalendar' kún hámde islep atirǵan I hám II topar mayıplarına 30 kalendar kúni esabinan jıllıq uzaytırılǵan dem alis beriledi.Sonıń menen birge ayırım taypadaǵı xızmetkerlerge olardıń miynet wazıypalarınıń ayriqsha tárepleri hám qásiyetlerine hámde taǵı basqa jaǵdaylardı itibarǵa alıp, nızam hújjetlerine muwapıq uzaytırılǵan dem alıslar belgilenedi.
Jıllıq qosımsha dem alıslar xizmetkerge miynet sharayatı qolaysız hám ayriqsha bolǵan jumıslarda bánt bolǵan hámde qolaysız tábiyiy-ıqlım sharayatlarında jumıs islep atırǵan xızmetkerlerge beriledi.
Jıllıq tiykarǵı dem alıs birinshi jumıs jılı ushın 6 aydan keyin beriledi. Jumıs jılı kalendar jılınan ayrıqsha túrde miynet shártnamasına qaray jumıs baslanǵan kúnnen baslap esaplanadı hámde jıllıq tiykarǵı dem alıs ekinshi hám odan keyingi jumıs jılları ushın kalendar jıl baslanǵanǵa shekem jumıs beriwshi tárepinen kásiplik awqam yamasa xızmetkerlerdıń basqa wákillik organı menen kelisip tastıyıqlanatuǵın dem alıslar kestesine muwapıq jumıs jılınıń qálegen waqtında beriledi. Xızmetker jumıs beriwshi menen kelisip dem alıslar kestesindegi waqtın ózgertiwi múmkin. Xızmetker dem alıs baslanıwınan keminde 15 kún aldın xabardar etiliwi kerek ham dem alıs jumıs jılı tawsılǵanǵa shekem beriliwi kerek.
Ózbekstan Respublikası Miynet kodeksinın’ 131-statyasında 1 yanvar — Jańa jıl,8 mart — Hayal-qızlar kúni,21 mart — Nawriz bayramı, 9 may — Yad hám qádirlew kúni,1 sentyabr — Ǵárezsizlik kúni, 1 oktyabr — Oqıtıwshı hám tárbiyashılar kúni, 8 dekabr — Konstituciya kúni, Ruwza hayt (Iyd al-Pitir) diniy bayramınıń birinshi kúni, Qurban hayt (Iyd al-Adha) diniy bayramınıń birinshi kúni bayram kúnleri esaplanadi hám usı bayram kúnleri qarsaǵinda barlıq xizmetkerlerge kúndelikli jumıs múddetinen keminde bir saatqa qısqartırıladı.
Taqıyatas rayonı
ádillik bólimi bas másláhátshisi B.Ikmetullaev