Янгиликлар
24
Ózbekstan Respublikası Konstituciyasında shańaraq institutı
Mámleket rawajlanıwında shańaraq zárúrli áhmiyetke iye institutlardan biri bolıp tabıladı.Jámiyetti quraytuǵın tiykarǵı xalıq qatlamları shańaraq dep atalıwshı “birlespe” tiykarında qáliplesedi.Ózbekstanda kúshli, turaqlı hám párawan mámleket negizi retinde shańaraq institutın bekkemlew hámde bul tarawda nızamshılıq hám normativ-huqıqıy bazanı jánede jetilistiriw ústin turatuǵın wazıypalardan etip belgilengen.
Atap ótiw kerek, mámleketimizdiń tiykarǵı nızamı bolǵan Konstituciyada shańaraq hámde shańaraqqa tiyisli múnásibetler qáwipsizligi huqıqıy tárepten bekkemlenip qoyılǵan.Atap aytqanda, tiykarǵı nızamımızda “Shańaraq” babı bar bolıp, onda shańaraq jámiyet hám mámleket qorǵawında bolatuǵınlıǵı, nekeniń qálewlik hámde teń huqıqlılıqqa tiykarlanıwı, ata-analar óz perzentlerin er jetkenge shekem baǵıw hám tárbiyalaw, óz gezeginde, er jetken, miynetke uqıplı perzentler ata-anaları haqqında ǵamxorlıq etiwge májbúrligi kórsetilgen.
Álbette, shańaraqtıń bekkemligi, ondaǵı saw ortalıqtıń turaqlılıǵı, sózsiz, perzentler kámalına xızmet etedi. Hám kerisinshe, shańaraqtaǵı saw bolmaǵan ortalıqtıń tiykarǵı jábirleniwshileride kóbinese balalar boladı.
Saw bala saw shańaraqta tuwıladı, kámalǵa jetedi. Jurtımızda shańaraqlardı sociallıq qorǵaw, hayal-qızlardıń iskerligin asırıw jolında alıp barılıp atırǵan is-ilájlar, jetkinshek baxtı ıǵbalına qaratılǵan. Sebebi, analar hám balalar sawlıǵı, shańaraq institutınıń rawajlanıwı mámlekettiń, jámiyettiń potencialın hámde keleshegin belgileydi.
A.S.Allamuratov,
Xojeli rayon ádillik bólimi bas másláhátshisi