Янгиликлар
01
Arnawlı elektron sistema arqalı ayırım iskerlik túrlerin licenziyalaw hám arnawlı elektron sistema arqalı ruxsat etiw túrine iye bolǵan ayırım hújjetlerdi beriw tártiplerindegi jańalıqlar
Búgingi kúnde Respublikamız rawajlanǵan mámleketler qatarında turar eken, hár bir tarawda ózine jarasa zaman menen teńbe-teń túrde reformalar ámelge asırılıp kelinbekte. Yaǵnıy “Málimleme texnologiyaları ásiri”nde ózine say elektronlasqan túrde jumıs alıp barıw hám bunıń nátiyjesi arqalı bir qansha jetiskenliklerge erisiw maqset etip qoyıldı.
Solar qatarı 2022-jıl 21-fevral kúni Ózbekstan Respublikası Ministrler Kabinetiniń “Arnawlı elektron sistema arqalı ayırım iskerlik túrlerin licenziyalaw tártibi haqqındaǵı birden-bir rejeni tastıyıqlaw haqqında”ǵı hám usı jıldıń 22-fevral kúni “Arnawlı electron sistema arqalı ruxsat etiw túrine iye bolǵan ayırım hújjetlerdi beriw tártipleri haqqındaǵı birden-bir rejesin tastıyıqlaw haqqında”ǵı qararları qabıl etilip, bul qararlar tiykarında tastıyıqlanǵan reje menen licenziya alıw talap etiletuǵın iskerlikti «Licenziya» málimleme sisteması arqalı licenziyalaw, licenziatlar iskerligin qadaǵalaw hám olardıń esabatın júrgiziw tártibi belgilendi.
Bul qararlar menen baylanıslı «Licenziya» atamasına qısqasha túsinik berip ótetuǵın bolsaq bul – fizikalıq yaki yuridikalıq shaxsqa beriletuǵın, licenziya talapları hám shártlerine májbúriy túrde ámel etilgen jaǵdayda, iskerliktiń licenziyalanatuǵın túrin yaki onıń kishi túrin ámelge asırıw huqıqın beriwshi hújjet esaplanadı.
«Licenziya» málimleme sisteması – licenziyalaw, ruxsat beriw hám xabardar etiw tártipleri menen baylanıslı barlıq jarayanlardı óz ishine alǵan, keńseler ara electron óz-ara sheriklik etiw imkániyatına iye bolǵan electron sistema bolıp esaplanadı.
Talapker licenziya alıw ushın arza hám oǵan qosımsha etiletuǵın hújjetlerdi «Licenziya» málimleme sisteması yaki Ózbektsan Respublikası Birden-bir interaktiv mámleketlik xızmetleri portal arqalı electron túrde jiberedi.
Arzalar joqarıda aytıp ótilgen tártipte dem alıs hám bayram kúnlerine qaramastan hár kúni 24 saat dawamında jiberiliwi múmkin. Bunda arzalar jumıs waqtınan keyin yaki dem alıs hám bayram kúnleri túskeninde náwbettegi jumıs kúni arzalardıń licenziyalawshı organǵa túsken hám licenziyalawshı organ tárepinen qabıl etilgen kún esaplanadı.
Ámelge asırılıwı ushın licenziya alıw talap etiletuǵın iskerlik túrleri menen licenziya almastan shuǵıllanıw, sonıń menen birge ruxsat etiw túrine iye hújjetti alıw talap etiletuǵın iskerlikti (háreketlerdi) ruxsat etiw túrine iye hújjetsiz ámelge asırıw qadaǵan etiledi. Al, licenziya alınıwı hám ruxsat etiw túrine iye bolǵan hújjet talap etiletuǵın iskerlik túrleri bolsa, Ózbekstan Respublikasınıń “Licenziyalaw, ruxsat beriw hám xabardar etiw tártipleri haqqında”ǵı nızamı menen belgilep berildi. Mine usı nızam menen belgilengen qaǵıydalardan tısqarı, licenziya sheklenbegen múddetke beriledi.
Bunnan tısqarı joqarıda aytıp ótilgen Ministrler Kabinetiniń qararı menen tastıyıqlanǵan reje tiykarında – iskerlikti ámelge asırıw talapları hám shártleri, licenziya alıw ushın arza beriw hám onı kórip shıǵıw tartibi, licenziyanı qayta rásmiylestiriw, múddetin sozıw hám ózgertiw tártibi, licenziyanıń ámel qılıwın toqtatıp turıw, biykar etiw hám toqtatıw, licenziyalanatuǵın iskerliklerdi qadaǵalaw tártibi, licenziyalawshı organlar qararı hám olardıń lawazımlı shaxslarınıń háreketleri (háreketsizligi) ústinen shaǵım etiw hám onı kórip shıǵıw tártibi, licenziyalar reestrin júrgiziw sıyaqlı talaplar belgilep berildi.
Joqarıda atap ótilgen normativ-huqıqıy hújjetlerdegi talaplar tiykarında óz iskerligimizdi nızamlı tártipte jolǵa qoysaq, álbette hesh qanday tosıqlarǵa ushıramastan alǵa rawajlanıwımızǵa isenimimiz kámil túrde jumıs alıp barǵan bolar edik hám bunıń tiykarında jetiskenliklerimiz benen mámleketimizdiń rawajlanıwına óz úlesimizdi qosıwımız anıq dep isenim bildiremiz.
Xojeli rayonı Yuridikalıq xızmet
kórsetiw orayı baslıǵı N.Berdiniyazova