Янгиликлар
07
Miynet nızamshılıǵında miynetti qorǵaw talapları
2016-jıl 22-sentyabr kúni Ózbekstan Respublikasınıń «Miynetti qorǵaw haqqında»ǵı Nızamı jańa redakciyada qabıl etildi. Bul Nızamnıń tiykarǵı maqseti miynetti qorǵaw tarawındaǵı qatnasıqlardı tártipke salıwdan ibarat.Miynetti qorǵaw talapları Miynet kodeksi, miynetti qorǵaw haqqındaǵı nızam hújjetleri hám basqa normativ-hújjetler, sonday-aq, texnik standartlar menen belgilenedi.
Sonıda aytıp ótiw lazım bolǵan ahmiyetli normativ-huqıqıy hújjetler, bular Ózbekstan Respublikası Ministrler Kabinetiniń 2000-jıl 12-iyuldegi 267-sanlı qararı menen tastıyıqlanǵan «Miynetti qorǵaw qaǵıydaların islep shıǵıw, kelisiw hám tastıyıqlaw» tártibi hám 2014-jıl 15-sentyabrdegi 263-sanlı qararı menen tastıyıqlanǵan «Jumıs orınların miynet sharayatları hám asbap-úskenelerdiń jarahatlaw qáwipsizligi boyınsha attestaciyadan ótkeriw tártibi haqqında» darejesi bolıp esaplanadı.
Ámeldegi Miynet kodeksiniń 13-babı miynetti qorǵaw tiykarlarına arnalǵan bolıp, sonıń ishinde kodekstiń 211-statyası miynetti qorǵaw boyınsha talaplardı óz ishine alǵan.Barlıq kárxanalar hám shólkemlerde qáwipsizlik hám gigiena talaplarına juwap beretuǵın miynet sharayatları jaratılǵan bolıwı kerek hám bunday sharayatlardı jaratıp beriw jumıs beriwshiniń minnetlemesine kiredi.
Miynetti qorǵaw talapların buzǵanlıq ushın jumıs beriwshi juwapker boladı.
Jumıs beriwshi barlıq jańadan jumısqa kirip atırǵan hám basqa jumısqa ótkerilip atırǵan xızmetkerler ushın miynetti qorǵaw boyınsha jol-jobalar beredi.Puqaralardı olardıń den-sawlıǵı jaǵdayına kóre oǵan tuwrı kelmeytuǵın jumısqa qabıl etiw hám xızmetkerlerdi basqa sonday jumısqa ótkeriw qadaǵan etiledi.Miynetti qorǵawdıń halatı ústinen mámleketlik qadaǵalawdı hám tekseriwlerdi mámleketlik uyımları ámelge asıradı.
Miynetti qorǵawdıń norma hám qaǵıydalarına ámel etiliwi ústinen jámáátlik tekseriwdi kásiplik awqamlar hám xızmetkerlerdiń basqa wákillikli organları ámelge asıradı.Jumıs beriwshi tárepinen jeterli miynet sharayatları jaratılmaǵanda yaki miynetti qorǵaw talapları buzılǵanda, bul boyınsha múrájatlar miynet boyınsha mámleketlik texnik inspektorları tárepinen qadaǵalawǵa alınıp, belgilengen tártipte úyrenip shıǵıladı.
Miynetti qorǵaw tarawında xızmetkerlerdiń huqıqları:
•talaplarǵa say jumıs orınǵa iye bolıw;
•jumıs beriwshiden tiyisli maǵlıwmatlar alıw;
•jeke qorǵanıw quralların biypul alıw;
•qáwipli jaǵdaylar saplastırılıwına shekem jumıslardı orınlawdan bas tartıw;
•mámleketlik qadaǵalaw organına sorawnama beriw;
•miynettiń qáwipsiz usılları boyınsha oqıw;
•belgilengen tártipte jeńillikler hám kompensaciyalar alıw hám basqalar.
Miynetti qorǵaw tarawında jumıs beriwshiniń minnetlemeleri:
•hár bir jumıs ornında múnásip miynet sharayatın támiyinlew;
•xızmetkerler qáwipsizligin támiyinlew;
•ziyanli hám qáwipli islep shıǵarıw faktorları boyınsha qadaǵalawdı ámelge asırıw;
•miynet sharayatları haqqında xızmetkerlerdi xabardar etip barıw;
•belgilengen tártipte miynetti qorǵaw xızmetin shólkemlestiriw;
•ayırım kategoriyadaǵı xızmetkerlerdi sút, azıq-awqat, jeke qorǵanıw quralları menen biypul támiyinlew;
•xızmetkerlerdiń tayarlıqtan ótiwi hám mamanlıǵın asırıwın támiyinlew hám basqalar.
Miynet sharayatı qolaysız jumıslarda bánt bolǵan xızmetkerlerge biypul beriletuǵın azıq-awqat ónimler hám qurallar:
• sút hám oǵan teń bolǵan basqa azıq-awqat ónimleri;
• emlew-profilaktika azıq-awqatı;
• gazli duzlı suw (ıssı cexlarda islewshiler ushın);
• arnawlı bas-kiyim, arnawlı ayaq-kiyim, basqa jeke qorǵanıw hám gigiena quralları.
Joqarıdaǵılardan kelip shıǵıp, miynetti qorǵaw talaplarına ámel etiwimiz hár birimizdiń qáwipsizligimizdi támiyinlew ushın minnetleme sıpatında áhmiyetli orındı iyeleydi.
Xojeli rayonı Yuridikalıq xızmet kórsetiw
orayı bas yuriskonsultı RustamTajibaev