Янгиликлар
08
Shımbay rayonı ádillik bólimi aralasıwı menen jáne bir xızmetkerdiń buzılǵan huqıqı tiklendi
Shımbay rayonı ádillik bólimine puqara M.M.nıń bala kútimi dem alısınan qaytıp kelgende shtat birligi qısqarǵanlıǵınan narazı bolıp jollaǵan múrájatı úyrenildi.
Úyreniw dawamında rayondaǵı jáne bir mámleketlik mektepke shekemgi bilimlendiriw shólkemi direktorı tárepinen miynet kodeksiniń bir neshe statyaları talapları buzılǵanlıǵı anıqlandı.
Yaǵnıy, tárbiyashı M.M. bala kútimi dem alısına 1 shtat birligindegi tárbiyashı lawazımı menen jiberilgen bolıwına hám miynet nızamshılıǵı talabı boyınsha onıń jumıs ornı hámde lawazımı saqlap qalınıwı lazım bolsa da, shólkem direktorı tárepinen nızam talaplarına qayshı túrde buyrıq shıǵarılǵan.
Atap aytqanda, shólkem direktorı tárepinen M.M. 1 shtat birligindegi tárbiyashı lawazımına emes al, 0,46 shtat birligindegi tárbiyashı lawazımına jumısqa qayta tikleniwi boyınsha buyrıq shıǵarıp, puqaranıń haqlı ráwishte buzılǵan huqıqların tiklep beriwdi sorap shaǵım etiwine sebepshi bolǵan.
Múrájat boyınsha bólim tárepinen tiyisli tártipte tásir sharaları qollanılıp, puqara M.M.niń buzılǵan huqıqları tiklenip beriliwi hám shaǵımnıń qanaatlandırılıwı támiyinlendi.
Palekeev Abat Paraxatovich,
Shımbay rayonı ádillik
bólimi bas másláhátshisi