Янгиликлар
07
“Seniń ornıńa waqtınsha birewdi alıp edim, endi ol azǵana waqıt islesin, úyińde otırıp tur” yaki bala kútimi dem alısınan shıqqan xızmetkerdiń narazılıǵı
Shımbay rayonı ádillik bólimi tárepinen rayondaǵı mámleketlik mektepke shekemgi bilimlendiriw shólkemleriniń birinde tárbiyashı bolıp jumıs islegen hám hámiledarlıq dem alısınan soń bala kútimi dem alısına jiberilgen puqara S.A.nıń jumısqa kirisiwinde tosqınlıq bolıp atırǵanlıǵı haqqındaǵı shaǵımı úyrenildi.
Anıqlanıwınsha, puqara S.A. rayondaǵı mámleketlik mektepke shekemgi bilimlendiriw shólkemleriniń birinde tárbiyashı bolıp jumıs islep kelip, shólkem direktorınıń buyrıǵına tiykar hámiledarlıq dem alısına hám sońınan bala kútimi dem alısına shıǵarılǵan.
Biraq, bala kútimi dem alısı pitiwine baylanıslı óz jumıs ornına barıp jumısqa tikleniwin soraǵanda, jumıs beriwshi tárepinen ámeldegi miynet nızamshılıǵı talapların qopal ráwishte buzıp, “Seniń ornıńa waqtınsha birewdi alıp edim endi ol azǵana waqıt islesin, uyińde otırıp tur” dep S.A.nıń jumısqa kirisiwine tosqınlıq qılǵan.
Solay etip, múrájattı úyreniw dawamında tikkeley ádillik bóliminiń aralasıwı hám nızam sheńberinde tásir shara qollanılıwı nátiyjesinde S.A. aldınǵı lawazımına qayta tiklenip, óz jumısın dawam ettiriwi támiyinlendi.
Shımbay rayonı ádillik
bólimi bas másláhátshisi Palekeev Abat Paraxatovich