Янгиликлар
01
2022-jıl 1-fevraldan baslap nızamshılıqta neler ózgeredi?
1. Fizikalıq shaxslarǵa ózin-ózi bánt etken shaxs sıpatında óziniń xojalıǵında balıq jetistiriwdi jolga qoyıwına ruhsat beriledi. 2022-jıl 1-fevraldan 2025-jıl 1-yanvarǵa shekem balıqshılıqtı intensivlestiriw ushın zárur bolǵan ásbap-úskeneler hám texnologiyalar (aerator, basseyn, avtokormushka, UZV), sonday-aq, qayta islew uskenelerin islep shıǵarıwdı jolǵa qoyǵan, biraq dáramatınıń 80 payızınan artıǵın bul úskenelerdi islep shıǵarıwdan alatuǵın subektler ushın:
- payda salıǵı (kommerciyalıq banklerde jaylastırılǵan pullardan alınǵan payızlardan tısqarı);
- yuridikalıq shaxslardan alınatuǵın jer salıǵı;
- yuridikalıq shaxslardıń mal-múlk salıǵı hám suw resurslarınan paydalanǵanlıǵı ushın salıq stavkaları 50 payızga azaytıladı.
2. Jetim hám ata-ana qaramaǵınan ayırılǵan balalar elektron sistema arqalı anıqlanadı.Húkimettiń 26-san qararına tiykar, «Mehr dápteri»ne kiritilgen jetim hám ata-ana qaramaǵınan ayırılǵan balalarǵa tiyisli maǵlıwmatlar «Elektron húkimet» sisteması mákemeler aralıq integraciyalasıw platforması arqalı anıqlanadı.
3. Korrupciyaǵa qarsı guresiw jumıslarınıń nátiyjeligin reyting bahalaw sisteması engiziledi. Ózbekstan Respublikası Prezidentiniń PQ-81 sanlı qararına muwapıq, 2022-jıl 1-fevraldan baslap korrupciyaǵa qarsı guresiw jumıslarınıń nátiyjeligin reyting bahalaw sisteması, eksperiment jol menen tiyisli dizimde keltirilgen hám óz jumısında korrupciyaǵa qarsı menedjment sistemasın engizip atırǵan mámleketlik shólkemlerdiń jumısına engiziledi.
4. Jańa hákim orınbasarı lawazımı engiziledi. Ózbekstan Respublikası Prezidentiniń PQ-76 sanlı Qararına kóre, 2022-jıl 1-fevraldan baslap: Wálayat hám rayon (qala) hákimleriniń kapital qurılıs, kommunikaciyalar hám kommunal xojalıq máseleleri boyınsha orınbasarı lawazımı qısqartılıp, qurılıs, kommunikaciyalar, kommunal xojalıq, ekologiya hám kóklemzarlastırıw máseleleri boyınsha orınbasarı lawazımı engiziledi.
5. 2022-jıl 1-fevraldan baslap Ózbekstannıń barlıq aymaqlarında suw esaplaǵıshsız ishimlik suwınan paydalanıp atırǵan tutınıwshılarǵa 4 túrdegi tutınıw normaları qollanıladı:
- ishimlik suwın kóshe kalonkasınan tasıp ishiwshiler ushın adam basına kúnlik – 50 litr;
- ishimlik suw tarmaǵına jalǵanǵan, suw beriw kestesi tiykarında suw beriletuǵın xojalıqlar ushın adam basına kúnlik – 200 litr;
- ishimlik suw tarmaǵına jalǵanǵan xojalıqlar ushın adam basına kúnlik – 350 litr;
- suw sebiw hám suwǵarıw maydanınıń hár 1 metr kvadratı ushın – 15 litr;
6. Sertifikatqa iye oqıtıwshılar 50% muǵdarında ústeme haqı aladı. 2022-jıl 1-fevraldan baslap tálim tili rus tili bolmaǵan ulıwma bilim beriw mákemelerin (klasslar)de xızmet etip atırǵan keminde C1 hám onnan joqarı dárejedegi milliy yaki oǵan teńlestirilgen sáykes dárejedegi xalıq aralıq tán alınǵan sertifikatqa iye rus tili páni oqıtıwshılarına 50% muǵdarında ústeme tólenedi.
Kegeyli rayonı Yuridikalıq xızmet kórsetiw
orayı bas yuriskonsultı. Bazarbayev S.