Янгиликлар
27
Nızamshılıqtaǵı_jańalıqlar
“Xızmetler tarawın rawajlandırıwǵa baylanıslı qosımsha ilajlar haqqında”ǵı Prezident qararı (PQ-104-san, 27.01.2022-j.) qabıllandı
Qararǵa kóre, xızmetler tarawın rawajlandırıwdıń baslı baǵdarları belgilendi. Atap aytqanda:
kapital óńlanǵan, sırtqı jaqtılandırıw, suwǵarıw hám drenaj sisteması modernizaciya qılınǵan, piyada hám velosiped jolları qurılǵan, xalıq tıǵız kósheler sawda, xızmet kórsetiw, den alıw hám kewil ashar kóshelerge aylandırıladı;
Tashkent, Nókis qalaları, wálayatlar orayları hám basqa qalalarda kóbi menen hár 3-5 máhálle ushın máhálleler aralıq sawda-xızmet kóshesi shólkemlestiriledi;
Tashkent, Samarqand hám Namangan qalalarında bilimlendiriw hám medicina mákemeleri jaylasqan aymaqlarda qánigelesken klasterler shólkemlestiriledi.
Qararǵa kóre, 2022-jıl 1-aprelden 2025-jıl 1-yanvarǵa shekem usaqlap satıw sawda hám ulıwma awqatlanıw, miymanxana (jaylastırıw) xızmetleri, avtotransportta jolawshı hám júk tasıw, transport quralların ońlaw hám olarǵa texnikalıq xızmet kórsetiw, kompyuter xızmetleri, turmıslıq texnikanı ońlaw, agro hám veterinariya xızmetlerin kórsetiwshi hámde kewil ashar orınlarda xızmetler kórsetiwshi isbilermenler ushın sociallıq salıq 1 procent etip belgilendi.
Isbilermenlerge 2022-jıl 1-yanvardan 2027-jıl 1-yanvarǵa shekem miymanxana hám maydanı 5 mıń kvadrat metrden joqarı bolǵan sawda kompleksleri boyınsha:
jer salıǵı hám mal-múlk salıǵı stavkası 90 procentke kemeytiriledi;
payda salıǵın esaplawda imaratlardıń bahası 2 jıl amortizaciya qárejetleri sıpatında shegirip taslanadı.
2022-jıl 1-aprelden 2025-jıl 1-yanvarǵa shekem 28 rayon hám qalalarda ulıwma awqatlanıw, miymanxana, sawda, kewil ashar, turoperator hám turagent xızmetlerin kórsetip atırǵan isbilermenler ushın:
aylanbadan alınatuǵın salıq - 1 procent;
mal-múlk hám jer salıǵı esaplanǵan summanıń 1 procenti muǵdarında belgilenedi.
Sonday-aq, 2022-jıl 1-iyuldan usı rayonlar hám qalalarda turizm obektlerin qurıw ushın jer uchastkaların elektron onlayn-aukcion sawdasına shıǵarıw tártibi engiziledi.
Máhálleler aralıq sawda-xızmet kósheleri boyında jaylasqan turaq jay obektleri tiyisli xızmet kórsetiw túrleri boyınsha turaq emes jay obekti toparına ótkerilgende 2024-jıl 1-yanvarǵa shekem olarǵa salıstırǵanda mal-múlk salıǵı hám jer salıǵınıń fizikalıq shaxslar ushın ornatılǵan stavkası saqlap qalınadı.
2022-jıl 1-yanvardan uyalı baylanıs operatorları ushın uyalı baylanıs xızmetlerine salınatuǵın akciz salıǵı stavkası 10 procent etip ornatıladı.
Qararǵa kóre, Ózbekstanǵa alıp kiritiletuǵın ayırım tovarlar (dawıs, kórinis yamasa basqa maǵlıwmatlardi uzatıw yamasa qabıllaw apparaturası, maǵlıwmatlardı saqlawshı apparatlar, proektorlar, karnaylar, qulaqshınlar) 2022-jıl 1-fevraldan 2025-jıl 1-yanvarǵa shekem bajıxana bajıdan azat etiledi.
2022-2023-jıllar dawamında “Jańa Ózbekstan” massivlerinde 640 xızmet kórsetiw obektleri shólkemlestiriledi.
Sonday-aq, mámleketlik emes mektep hám baqshalardı qurıw shárti menen tiyisli rayon (qala) larda jer uchastkaları elektron onlayn-aukcion sawdasına shıǵarıladı.
Xızmetler salasındaǵı jańa joybarlar ushın 14 payız stavkada bir joybar boyınsha 2 milliard sumǵa shekem kredit ajıratıladı.