Янгиликлар
17
Qaraqalpaqstan Respublikası Ádillik ministrligi tárepinen 2021-jıl dawamında islengen jumıslar
Qaraqalpaqstan Respublikası Ádillik ministrligi tárepinen 2021-jıl dawamında islengen jumıslar
Birden-bir mámleketlik huqıqıy siyasattı júrgiziw, norma dóretiwshiligi jumısın muwapıqlastırıw hám nátiyjeliligin asırıw, nızamlar hám basqa normativ-huqıqıy hújjetlerdin orınlanıwı boyınsha mámleketlik hám xojalıq basqarıw uyımları, jergilikli mámleketlik hákimiyatı uyımları, mámleketlik shólkemleri jumısın muwapıqlastırıw hám metodikalıq basshılıqtı ámelge asırıw, mámleketlik uyımları hám shólkemleriniń aymaqlıq bólimleri jumısında huqıqtı qollaw ámeliyatın izbe-iz hám birdey támiyinlew boyınsha ilajlardı ámelge asırıw ádillik uyımlarınıń tiykarǵı wazıypalarınan biri bolıp esaplanadı. Bul baǵdarda 2021-jıl dawamında ministrlik hám rayon (qala) ádillik bólimleri tárepinen bir qatar jumıslar ámelge asırıldı.
Atap aytqanda, Insan huqıqların qorǵaw tarawında:
Ministrlikke jámi 4 692 múrájatlar kelip túsip, sudlarǵa 9 mlrd. 363 mln sumlıq dawa arzalar kirgizilip, puqaralardıń huqıqları tiklendi.
Nókis “Múriwbet” mayıplıǵı bolǵan shaxslar ushın hayallar internat úyi hám Shımbay “Múriwbet” mayıplıǵı bolǵan shaxslar ushın erler internat úyine mayıplılıqtıń rásmiylestiriliwi hám olarǵa jaratılǵan shárt-shárayatlar úyrenilgende tómendegiler anıqlandı.
Ózbekstan Respublikası Prezidentiniń 2021 jıl 25 martdaǵı PF-6195-san Pármanında belgilengen talaplar óz waqıtında orınlanbastan, Shımbay “Múriwbet” mayıplıǵı bolǵan shaxslar ushın erler internat úyi kitapxanası internet tarmaǵına jalǵanbaǵan hám mayıplıǵı bolǵan shaxslar ushın kóteriw platformaları menen támiyinlenbegen.
Sonıń menen birge, internat úyleriniń juwapker xızmetkerleri tárepinen mayıplıǵı bolǵan shaxslardı salamatlandırıw hám qollap-quwatlaw boyınsha wazıypalar jeterli dárejede orınlanbastan ayırım qáte - kemshiliklerge jol qoyılmaqta.
Yaǵnıy, Nókis “Múriwbet” mayıplıǵı bolǵan shaxslar ushın hayallar internat úyi hám Shımbay “Múriwbet” mayıplıǵı bolǵan shaxslar ushın erler internat úyinde qáwenderlikke alınǵanlarǵa grafik tiykarında massajlar alıp barılmaǵan bolsada, massaj jumısları ámelge asırılǵanlıǵı haqqında tiyisli jurnallardı toltırıw ámeliyatı jolǵa qoyılǵan.
Bunnan basqa, qáwenderlikke alınǵanlarǵa kiyim-kenshek, ayaq kiyim, basqa buyımlar hám tastıyıqlanǵan normalar boyınsha jumsaq úskenelerdi tarqatıwda hámde internat úylerine xızmetkerlerdi jumısqa qabıllaw hám lawazımınan azat etiwde ámeldegi nızamshılıq talaplarına ámel etilmesten ayırım nızam buzılıw jaǵdaylarına jol qoyılǵanlıǵı anıqlandı.
Úyreniw dawamında, internat úyleri qáwenderlikke alınǵanlarǵa tiyisli medicinalıq járdemlerdi kórsetiw ushın tómendegi texnikalıq qurallarǵa hám qániygelerge mútájligi anıqlandı.
Shımbay “Múriwbet” mayıplıǵı bolǵan shaxslar ushın erler internat úyi texnikalıq qurallardan – 2 dana DARSONA, 2 dana UVCH-30-M3-SU, 2 dana UZT, 2 dana ELEKTROSON, 4 dana ELEKTROFOREZ, 2 dana MASSAJ KUSHETKASI, 1 dana UZI, 1 dana EKG hám 2 dana medicinalıq nasilkaǵa hámde qániygelerden – terapevt (0.25 sh.b), nevropotolog (0.5 sh.b), dermatolog (0.5 sh.b), psixiator (0.5 sh.b) hám náwbetshi (1.25 sh.b) shıpakerlerine hámde tis hám UZI shıpakeri shtat birliklerine;
Sonday-aq, Nókis “Múriwbet” mayıplıǵı bolǵan shaxslar ushın hayallar internat úyi texnikalıq qurallardan – 1 dana UVCH-30-M3-SU hám qániygelerden – nevropotolog (0.5 sh.b), psixiator (0.5 sh.b), náwbetshi (2.25 sh.b) hám terapevt (0.25 sh.b) shıpakerlerine mútájligi barlıǵı anıqlandı.
Puqaralardıń pensiya támiynatınan paydalanıw tarawındaǵı ótkerilgen úyreniw dawamında tómendegiler anıqlandı.
Yaǵnıy, Pensiya qorınıń ayırım rayon (qala) bólimleri tárepinen puqaralarǵa pensiya tayınlawda olardıń is stajların hám islep tapqan tabısların tolıq esapqa almastan pensiya tayınlaǵanlıǵı halatları anıqlandı.
Usınday qáte-kemshilikler sebepli, Pensiya qorınıń Moynaq rayonı bólimi tárepinen puqara Z.Seytmuratovaǵa 229.858 sum, Nókis qalası bólimi tárepinen puqara Z.Turdievaǵa 74.537 sum, L.Aytmuratovaǵa 214.303 sum, D.Bekpolatovaǵa 25.306 sum, T.Nızanovqa 667.056 sum, Taqıyatas rayonı bólimi tárepinen puqara M.Dosjanovaǵa 1.194.251 sum, Bozataw rayonı bólimi tárepinen puqara S.Sipatdinovaǵa 844.913 sum muǵdarda kem pensiya esaplanǵan.
Máselen, puqara T.Nızanovtıń is stajın esaplawda onıń “Jayxun MTP”da 2005-jıl 30-yanvardan 2008-jıl 31-dekabrge shekem islegen dáwirlerindegi is stajları qosıp esaplanbaǵan. Nátiyjede, puqaraǵa 2021-jıl 26-yanvardan baslap 667.056 sum muǵdarında kem pensiya tayınlanǵan.
Ózbekstan Respublikası Prezidentiniń 2020-jıl 18-fevral kúngi PP-5938-sanlı Pármanına muwapıq puqaralardıń ózin-ózi basqarıw uyımları xızmetkerleriniń lawazım is haqısına 30 payız qosımsha arnawlı ústeme pulları tólengenligi jaǵdayı monitoring qılınǵanda Qaraqalpaqstan Respublikası aymaǵında jaylasqan 384 puqaralardıń ózin-ózi basqarıw uyımlarında búgingi kúnde jumıs alıp barıp atırǵan yaki jumıs islegen 1306 xızmetkerlerge jámi 6.997.804.734 sum muǵdarında arnawlı ústeme pulları tólenbesten qalǵanlıǵı anıqlandı.
Atap aytqanda, Ellikqala rayonında 125 xızmetkerge 769.689.279 sum, Beruniy rayonında 125 xızmetkerge 640.856.287 sum, Bozataw rayonında
20 xızmetkerge 71.485.105 sum, Ámiwdarya rayonında 143 xızmetkerge 870.878.502 swm, Tórtkúl rayonında 132 xızmetkerge 478.684.562 sum, Taqıyatas rayonında 42 xızmetkerge, Xojeli rayonında 103 xızmetkerge 595.767.480 sum, Qońırat rayonında 117 xızmetkerge 693.522.736 sum, Shomanay rayonında
39 xızmetkerge 168.017.439 sum, Nókis rayonında 37 xızmetkerge
137.883.509 sum, Qanlıkól rayonında 34 xızmetkerge 121.208.164 sum, Kegeyli rayonında 53 xızmetkerge 171.878.935 sum, Moynaq rayonında 41 xızmetkerge 191.346.935 sum, Taxtakópir rayonında 52 xızmetkerge 226.635.156 sum, Qaraózek rayonında 47 xızmetkerge 165.357.617 sum hám Nókis qalasında 196 xızmetkerge 1.694.593.028 sum arnawlı ústeme pulları tólenbegen.
Sonnan, usı uyımlardan 2020-2021-jıllarda jumıstan bosap ketken jámi 87 xızmetkerge jámi 301.487.333 sum muǵdarındaǵı arnawlı ústeme pulları tólenbesten qalǵanlıǵı anıqlandı. Bul anıqlanǵan jaǵdaylar boyınsha ministrlik tárepinen tiyisli tásir shara jumısları alıp barılmaqta.
Ózbekstan Respublikası Prezidenti hújjetleri hám tapsırmalarıniń orınlanıwın qadaǵalaw tarawında:
Ózbekstan Respublikası Prezidenti Administraciyası baslıǵı tárepinen Ózbekstan Respublikası Prezidentiniń Párman, qarar, biylik hám tapsırmalarıniń orınlanıwın 2021-jıl dawamında mánzilli hám tematikalıq úyreniw Baǵdarlamasına tiykar 5 tarawda yaǵnıy: Pensiya támiynatı hám xalıqtı sociallıq qorǵaw, ekonomikalıq tarmaqlar hám sociallıq tarawdıń obyektlerin energiya resursları menen támiynlew, xalıqtıń bántligin támiynlew, xalıq bilimlendiriw hám statistika tarawlarında mánzilli hám tematikalıq úyreniwler ótkerildi jánede olarda 6 nızam, 27 párman, 43 qarar hám 4 bayan orınlanıwı analiz etildi.
Bunnan tısqarı, ministrlik tárepinen 4 Párman, 20 qarar hámde 5 bayanda belgilengen 500 den aslam tapsırmalardıń orınlanıwı monitoring etildi.
Usı úyreniw ilajları nátiyjesinde 900 den aslam nızambuzılıw jaǵdayları anıqlanıp, kemshiliklerdi saplastırıw boyınsha ministrlik tárepinen 23 usınıs kiritildi.
Kiritilgen usınıslar nátiyjesinde 29 juwaplı shaxslar intizamiy juwapkershilikke tartıldı hám puqaralarǵa 486 mln. sum pul qarjıları tólep berildi.
Máselen: Ózbekstan Respublikası Prezidentiniń 2019-jıl 3-maydaǵı PQ-4306-san qararında belgilengen ústeme pullarınıń tóleniwi úyrenilgende, tiykarǵı olimpiadalar respublika basqıshında jeńimpaz bolıp, búgingi kúnde bilimlendiriw mákemelerinde oqıtıwshı bolıp jumıs islep atırǵan pedagoglarǵa 100 payız ústeme haqı tólenbegenligi anıqlandı.
Anıqlanǵan jaǵdaylar boyınsha ministrlik tárepinen Xalıq bilimlendiriw ministrligine usınıs kiritildi. Usınısqa tiykar, anıqlanǵan kemshilikler saplastırılıp 15 oqıtıwshıǵa 472 mln. sum muǵdarındaǵı ústeme pulları tólep berildi.
Sonday-aq, 2021-jıldıń oktyabr ayında Ózbekstan Respublikası Prezidentiniń 2021-jıl 3-fevraldaǵı PF-6155-san Pármanı menen tastıyıqlanǵan Mámleketlik Baǵdarlamanıń orınlanıwı monitoring etilgende, 2-10 jastaǵı
338 582 balalarǵa gelmintoz profilaktikası boyınsha arnawlı preparatlar tarqatılıwı belgilengen bolsa da, ámelde tek ǵana usı preparatlardıń 268 mıń (79,8%) balalarǵa tarqatıp berilgenligi anıqlandı.
Usı jaǵday boyınsha ministrlik tárepinen Den-sawlıqtı saqlaw ministrligine usınıs kiritildi. Nátiyjede 11 xızmetker intizamiy juwapkershilikke tartıldı hámde preparatlardı tolıq tarqatıw boyınsha is-ilajlar belgilendi.
Bul tarawda ministrlik tárepinen turaqlı túrde nızamshılıq hújjetleri, Ózbekstan Respublikası Prezidentiniń Párman, qarar, biylik hám tapsırmalarınıń orınlanıwın shólkemlestiriw boyınsha juwapker mákeme hámde shólkemlerge huqıqıy–metodikalıq járdem kórsetilip kelinbekte.
Bunnan basqa, ministrlik tárepinen 2021 jıl dawamında jámi 287 kóshpeli qabıllawlar shólkemlestirilip, 700 den aslam múrájatlar tiyisli tártipte kórip shıǵılıp, unamlı sheshimlerin taptı.
Sonı ayrıqsha atap ótiw orınlı, ministrlik tárepinen máhállebay principi tiykarında, huqıqıy úgit-násiyatlawdıń pútkilley jańa sistemasın engiziw maqsetinde, sud, advokatura, notariat, Jaslar-tv, Nukus-FM teleradiokanalları menen birgelikte xalıqtıń huqıqıy sawatlılıǵın elede asırıw maqsetinde, birge islesiw Memorandumları imzalanıp, tiyisli ilajlar ámelge asırılıp kelinbekte.
Atap aytqanda, “Biypul huqıqıy másláhát penen hár bir úyge” uranı astında 350 artıq máhállelerde puqaralarǵa 6000 ǵa jaqın huqıqıy másláhatler berildi.
Bunnan tısqarı, ministrlik tárepinen sud imaratlarında shólklemlestirilgen “Xalıqqa biypul huqıqıy járdem” xanalarında puqaralarǵa biypul yuridik járdemler kórsetildi.
Mámleket ekonomikasınıń tiykarǵı drayveri esaplanǵan isbilermenlik subyektleriniń huqıq hám nızamlı máplerin támiynlewde ministrlik tárepinen jolǵa qoyılǵan “Fermerge járdem” huqıqıy akciyası sheńberinde 640 tan aslam ilajlar ámelge asırıldi.
Ministrlik tárepinen xalıqtı qıynap kiyatırǵan máseleler hámde eń kóp berilip atırǵan sorawlardıń huqıqıy sheshimleri hám de mámleketimiz tárepinen qabıl etilip atırılǵan nızamshılıq hújjetleriniń mazmun-mánisin operativ jetkeriw maqsetinde, “Qaraqalpaqstan”, “Jaslar-tv”, “Nukus-Fm” teleradiokanalları menen birgelikte “Qaraqalpaqstan Onlayn”, “Siz bilesiz be?”, “Kúnniń teması”, “Huqıq hám jámiyet”, “Assalawma Áleykum, Qaraqalpaqstan”, kórsetiwleri hám “Xabar” baǵdarlaması arqalı videobloglar, tele kórsetiwler tayarlanıp, efirge turaqlı ráwishte beriliwi támiynlendi.
Huqıqtı qollaw ámeliyatın úyreniw jaǵdayı boyınsha.
Nızamlardıń durıs orınlanıwı boyınsha 1 227 mámleketlik uyım hám shólkemlerde 400 ge jaqın úyreniwler ótkerilip, 110 mıńnan aslam nızam buzıwshılıq jaǵdayları anıqlandı.
Úyreniwler nátiyjelerine kóre, 925 usınıslar (Xalıq bilimlendiriw shólkemlerine 258, Den sawlıqtı saqlaw mekemelerine 115, Miynet qatnasıqları tarawında 89, jergilikli hákimiyat organlarına 157 hámde basqa kárxana, mákemelerge 608 usınıslar kiritilgen), 322 hákimshilik usınıslar (Xalıq bilimlendiriw shólkemlerinen 114 shaxs, Mektepke shekemgi bilimlendiriw shólkemlerinen 78 shaxs hámde basqada mekeme kárxanalardan 130 shaxs),
1 374 eskertiwler tiyisli uyım hám shólkemlerge usınılıp, orınlanıwı támiyinlendi hámde 419 juwaplı xızmetkerler intizamiy juwapkershilikke tartıldı, (sonnan, 2 shaxstıń miynet shártnaması biykar etilgen) 7 shaxs jınayıy juwapkershilikke tartıldı.
Sonday-aq, usınıs nátiyjelerine kóre, mámleketlik uyımlardıń 269 qararları biykar etilip, puqaralardıń 6 mlrd 487 mln sum muǵdarındaǵı pul qarjıları qaytarıldı.
Huqıqıy xızmet kórsetiw tarawında xalqımızǵa 187 mıńnan artıq notarial xızmetler kórsetilip, 36,7 mlrd sumǵa jaqın mámleketlik bajı pulları óndirildi.
Sonday-aq, kórsetilgen pullı huqıqıy xızmetler ushın 14,3 mlrd muǵdarındaǵı pul qarjıları óndirilgen.
Keyingi jıllarda notariat institutın rawajlandırıw, onı jánede jetilistiriw hám xalqımızǵa kórsetiletuǵın huqıqıy xızmetlerdiń sapasın asırıw maqsetinde bir qatar normativ hújjetler qabıl etildi, “Notarius” avtomatlastırılǵan málimleme dizimi eńgizildi. Nátiyjede, bir notarial háreketti ámelge asırıwǵa sarplanatuǵın waqıt ortasha 40 minuttan 20 minuttqa qısqardı.
Sonday-aq, Ózbekstan Respublikası Ministrler Kabinetiniń 2020-jıl 16-marttaǵı 156-sanlı qararınıń talaplarına muwapıq, usı jıldıń basınan Ózbekstan Respublikası Ádillik ministriliginiń janındaǵı Joqarı mamanlıq komissiyasınıń imtixanınan tabıslı ótken 2 talabanǵa jeke ámeliyat penen shuǵıllanıw huqıqın beriwshi licenziyalar berildi.
Sonıń menen birge, ministrlik tárepinen ótkerilgen tekseriwler nátiyjesinde 1 notarius licenziyasınıń ámel etiwi tamamlandı, 22 notariustıń licenziyasınıń ámel etiwi waqtınsha toqtatıldı.
Maǵlıwmat ushın: házirde Qaraqalpaqstan Respublikası aymaǵında 53 jeke ámeliyat penen shuǵıllanıwshı notariuslar óz jumısların alıp barmaqta.
Ózbekstan Respublikası “Mediaciya haqqında”ǵı Nızam talaplarına kóre, Qaraqalpaqstan Respublikası Ádillik ministrligi tárepinen professional mediatorlar reestri júrgiziliwi muwapıqlastırılıp barıladı, mediatorlardı tayarlaw arnawlı oqıw kursların tamamlaǵan jámi 18 jeke ámeliyat penen shuǵıllawshı notariuslar professional mediatorlar reestrine kiritildi.
Maǵlıwmat ushın: házirde Qaraqalpaqstan Respublikası Ádillik ministrligi tárepinen jámi 22 mediator professional mediatorlar reestrine kiritilgen.
Advokatura tarawında:
Búgingi kúnde Respublika aymaǵında jámi 82 advokatlıq dúzilmeleri óz iskerligin kórsetip atırǵan bolsa, sonnan 2 advokatlar kollegiyası, 5 advokatlar firması hámde 75 advokatlıq byurolarında jámi 115 advokatlar jumıs islep kelmekte. Bunda 10.000 adamǵa ortasha 1,15 advokat tuwrı keledi.
Advokatlar tárepinen 2021 jıl dawamında xalıqqa 1068 biypul másláhát berildi. Jıl dawamında jámi 13 talabanǵa advokatlıq licenziyaları berilip,
6 advokatlıq byurosı mámleketlik dizimnen ótkerildi.
Yuridikalıq xızmetlerdiń jumısların muwapıqlastırıw tarawında:
Ózbekstan Respublikası Prezidentiniń 2021-jıl 29-iyun kúni qabıl etilgen «Mámleketlik uyımları hám shólkemlerine yuridikalıq xızmet kórsetiw iskerligin elede jetilistiriw is-ilájları haqqında»ǵı PQ-5168-sanlı qararına tiykar, 2021-jıldıń 1-oktyabr sánesinen baslap Respublikamızdıń barlıq rayon (qala)larında Yuridikalıq xızmet kórsetiw orayları shólkemlestirildi.
Yuridikalıq xızmet kórsetiw orayları tárepinen 12 mámleketlik uyımlardıń rayon (qala)lıq bólimlerine yuridikalıq xızmet kórsetpekte.
Usı oraylarǵa 2021-jıl oktyabr-dekabr aylarında jámi 23.454 hújjet (sonnan, 15883 buyrıqlar hám 7350 shártnamalar) kelip tústi. Usı hújjetlerge 21784 dana yuridikalıq juwmaq berildi, 1449 dana hújjetler tiyisli nızam talaplarına ámel qılınbaǵanlıǵı sebebli qaytarıldı hámde nátiyjede tiyisli nızamlarǵa muwapıqlastırıp yuridikalıq juwmaqlar berildi.
Maselen: joqarıda atap ótilgen Qarardıń 6-bántinde oraylar tárepinen yuridikalıq xızmet kórsetiliwi belgilengen shólkemler tárepinen oraylar menen kelispegen halda yuridikalıq tústegi hújjetler qabıl etiliwine jol qoyılmaw hámde yuridikalıq kúshke iye emes jánede olar qabıl etilgen waqıttan baslap hesh qanday huqıqıy áqibetlerdi keltirip shıǵarmaytuǵinlıǵı kórsetilgen bolsada, Nókis qalası Xalıq bilimlendiriw bólimi tárepinen usı jıldıń oktyabr ayınan baslap Nókis qalası yuridikalıq xızmet kórsetiw orayı kelisimin almastan jámi 30 ishki buyrıq hám 3 miynet shártnamaların rásmiylestirgenligi anıqlandı.
Huqıqıy ekspertiza tarawında:
Ádillik ministrligi hám rayon (qala) ádillik bólimleri tárepinen Qaraqalpaqstan Respublikası Joqarǵı Keńesi, Ministrler Keńesi hám jergilikli mámleketlik hákimiyatı uyımlarınıń 268 qarar joybarları huqıqıy ekspertizadan ótkerilip, sonnan normativ túsdegi qararlardıń 132 qarar mámleketlik esapqa alınıwı támiyinlendi. Belgilengen talaplarǵa ámel etilmey usınılǵan rayon (qala) hákimleriniń 27 qarar joybarları huqıqıy ekspertizadan ótkerilmey qaytarıldı.
Mámleketlik emes kommerciyalıq emes shólkemleri tarawında:
Respublikada 2021-jıldıń 12 ayı halatına, jámi 641 mámleketlik emes kommerciyalıq emes shólkemleri bar bolıp, sonnan 435 mámleketlik, 206 esap dizimnen ótkerilgen hámde 64 diniy shólkemler óz iskerligin kórsetpekte. Sonday-aq, 2021-jıl dawamında 10 meshit mámleketlik dizimnen ótkerilgen bolsa, sonıń ishinde Qaraqalpaqstannıń eń shetki, shegaralas aymaqlarınıń biri esaplanǵan Qońırat rayonı «Qaraqalpaqstan» posyolka puqaralar jıyınında qurılǵan «Berdaq baba» meshiti mámleketlik dizimnen ótkerildi.
Mámleketlik emes kommerciyalıq emes shólkemler tarawında 2021-jıl dawamında jámi 23 úyreniwler ótkerilgen bolıp, 252 nızambuzılıw jaǵdayları anıqlandı.
Mámleketlik emes kommerciyalıq emes hámde diniy shólkemlerge 29 eskertiw, 26 usınıslar kiritilgen, usınıslarǵa tiykar 7 shaxs intizamiy hám 6 shaxs hákimshilik juwapkershilikke tartıldı.
Bunnan tısqarı, mámleketlik emes kommerciyalıq emes shólkemleri tárepinen ótkerilgen ilajlar hám shet el shólkemlerinen kelip túsken pul qarjıları hám mal-múlkeleri boyınsha ministrlik tárepinen belgilengen tártipte monitoring jumısları alıp barılıp, sonnan maqsetke muwapıq emes dep tabılǵan pul qarjıları da anıqlanıp, qabıl etiwge kelisim beriwden bas tartıldı.
Huqıqıy úgit-násiyat hám aǵartıwshılıq tarawında:
Puqaralardıń huqıqıy sana hám huqıqıy mádeniyatın joqarılatıwǵa baylanıslı jumıslardıń nátiyjeliligin elede asırıw, puqaralardıń jámiyetlik-siyasiy ózgerisler menen sáykes túrde huqıqıy bilimlerin asırıp barıwdıń zamanagóy usılları engizilmekte.
Yaǵnıy, 2021-jıl dawamında tikkeley ministrlik hám rayon (qala) ádillik bólimleri tárepinen jámi 19 357 úgit-násiyat ilajları ámelge asırıldı.
Usınnan ǵalaba xabar quralları arqalı ótkerilgen ilajlar sanı 12 040 (sonnan televidenie 647, radio 620, gazeta hám jurnallar 189 hámde veb-sayt hám basqa elektron ǵalaba qurallarında 10584) quraydı.
Sonday-aq, awızeki huqıqıy ilajlardıń jámi sanı 6 334 (1832 bayanatlar, 804 dóńgelek sáwbetler, 1008 seminarlar, 4 konferenciya, 2686 úyme-úy barıp ótkerilgen úgit-násiyat ilajları) úgit- násiyat ilajları ámelge asırıldı.
Kórgizbeli huqıqıy úgit-násiyat materialları sanı 972 (25396 tirajda) hámde 156 videorolikler hám videobloglar, jazba huqıqıy úgit-násiyat ilajları 11 (1404 tirajda)di quraydı.
Nızam hújjetlerdi mámleketlik organlar hám shólkemlerge jetkeriw boyınsha:
Ministrlikke jámi 1 236 normativ-huqıqıy hújjetler kelip túsip, Ministrler Kabineti tárepinen tastıyıqlanǵan dizim boyınsha jámi 121 mákeme hám shólkemlerge jetkerildi.
Ministrlik tárepinen huqıqıy úgit-násiyat hám aǵartıwshılıq salasındaǵı mámleketlik uyımları hám shólkemleriniń jumısların elede janlandırıw maqsetinde, jıl dawamında 170 ten aslam tásir sharaları qollanılǵan.
2021-jılda mámleketimizde úlken siyasiy mapaz, Ózbekstan Respublikası Prezidenti saylawı bolıp ótti. Saylaw uchastkaları baslıǵı hám aǵzalarınıń saylaw nızamshılıǵı boyınsha bilim dárejesin asırıw maqsetinde shólkemlestirilgen seminar-treninglerge ministrligimiz sistemasındaǵı
19 xızmetker trener sıpatında belsene qatnastı. Derlik 5 ay dawam etken oqıw processlerinde Nókis qalası hám rayonlarda 900 ge jaqın seminar-treninglerdi alıp bardı.
Sonıń menen bir qatarda, ótken 2021-jıl dawamında korrupicyaǵa qarsı gúresiw tarawındaǵı úgit-násiyat ilajları da jedellik penen ámelge asırıldı.
Bul baǵdarda eń birinshi gezekte mámleketlik xızmetshiler hám keleshek iyeleri esaplanǵan jaslarımız ushın seminarlar ótkerildi.
Ministrlik basshılıǵında Qaraqalpaq mámleketlik universiteti Yuridika fakultetiniń studentlerinen ibarat “Street law” toparı hám Yuridika texnikumnıń “Ádillik qanatları” kewilli úgit-násiyat toparı aǵzaları tárepinen “Tártipli aydawshı”, “Tutınıwshı huqıqıńızdı bilesiz be?”, “Saylaw huqıqıńızdan paydalanıń”, “Biz korrupciyaǵa qarsımız”, “Mámleketlik nıshanlardı húrmet eteyik” atamasında bir qatar huqıqıy úgit-násiyat ilajları ámelge asırıldı.
Úyreniwler dawamında anıqlanǵan nızambuzılıwshılıq jaǵdayların saplastırıw maqsetinde, tásir sharaların qollaw menen sheklenbesten, ámeldegi nızam hújjetlerin jetilistiriw boyınsha 2021-jıl dawamında jámi 515 ten aslam usınıslar berildi.
Birden-bir mámleketlik huqıqıy siyasattı júrgiziw, norma dóretiwshiligi jumısın muwapıqlastırıw hám nátiyjeliligin asırıw, nızamlar hám basqa normativ-huqıqıy hújjetlerdin orınlanıwı boyınsha mámleketlik hám xojalıq basqarıw uyımları, jergilikli mámleketlik hákimiyatı uyımları, mámleketlik shólkemleri jumısın muwapıqlastırıw hám metodikalıq basshılıqtı ámelge asırıw, mámleketlik uyımları hám shólkemleriniń aymaqlıq bólimleri jumısında huqıqtı qollaw ámeliyatın izbe-iz hám birdey támiyinlew boyınsha rejelerimiz turaqlı ráwishte ámelge asırılıwı belgilep alındı.
Zamir Xodjaxmetov,
Ministrlik bólim baslıǵı