Янгиликлар
17
Qaraózek rayonı ádillik bólimi tárepinen 2021-jıl dawamında ámelge asırılǵan jumısları boyınsha málimleme
Qaraózek rayonı ádillik bólimi tárepinen 2021-jıl dawamında ámelge asırılǵan jumısları boyınsha málimleme
Búgingi kúnde mámleketimizde barlıq tarawlarda keń kólemli reformalar ámelge asırılmaqta.
Sol qatarda Ádillik organları sistemasın tártipke salıw boyınsha da bir qatar huqıqıy hújjetler qabıl etildi.
Birden-bir mámleketlik huqıqıy siyasattı júrgiziw, norma dóretiwshiligi jumısların muwapıqlastırıw, mámleketlik hám xojalıq basqarıw, jergilikli mámleketlik hákimiyatı uyımları jumıslarında huqıqtı qollaw ámeliyatın izshil hám bir túrde támiyinlew boyınsha ilajlardı ámelge asırıw ádillik uyımlarınıń tiykarǵı wazıypası esaplanadı.
Sonıń menen birge qabıl etilip atırǵan nızamshılıq hújjetleri orınlanıwın nátiyjeli shólkemlestiriw hám monitoring etiwdiń tásirsheń sistemasın jaratıw maqsetinde usı jıldıń 10-fevral kúni Ózbekstan Respublikası Prezidentiniń “Nızamshılıq hújjetleri orınlanıwın nátiyjeli shólkemlestiriwde mámleketlik basqarıw uyımları hám jergilikli atqarıwshı hákimiyat uyımları basshılarınıń jeke juwapkershiligin kúsheytiriwge baylanıslı qosımsha ilajlar haqqında”ǵı 6166-sanlı Pármanı qabıl etildi.
Bul párman menen hám Ádillik ministrligine tómendegi qosımsha wazıypalar júkletilip, olar:
● nızam hújjetleri hám tapsırmalarınıń óz waqıtında, tolıq hám sapalı ámelge asırılıwın támiynlew boyınsha mánzilli hám tematikalıq tallaw (analiz) úyreniwlerdi alıp barıw hám orınlardaǵı jaǵday monitoringin júritiw;
● mámleketlik uyımları hám shólkemleriniń nızam hújjetleri hám tapsırmalar orınlanıwın támiyinlew boyınsha iskerligin ǵalaba xabar quralları hám sociallıq tarmaqlarda “Prezident qararları – turmısta hám qadaǵalawda” atamasında jarıtıw hám dodalaw jumısların shólkemlestiriw;
● nızam hújjetleri hám tapsırmalarınıń ámelde orınlanıwına tosqınlıq etip atırǵan mashqalalar hám faktorlardı anıqlaw;
● mámleketlik uyımları hám shólkemlerine nızam hújjetleri hám tapsırmalar orınlanıwı boyınsha huqıqıy-metodikalıq kómeklesiwden ibarat.
Bul baǵdarda 2021-jıl dawamında Qaraózek rayonı ádillik bólimi tárepinen bir qatar jumıslar ámelge asırıldı.
Atap aytqanda, fizikalıq hám yuridikalıq shaxslardan 100 artıq arza hám shaǵımlar kelip tusip 70 (70 %) qanaatlandırıldı, 24 múrájatqa huqıqıy túsinik berildi, 5 múrájat kórmesten qaldırıldı.
Ádillik bólimi tárepinen 15 kóshpeli qabıllawlar ótkerilip, puqaralardan 15 múrájat qabıllandı.
Sudlarǵa puqaralardıń mápin gózlep 191 mln 942 mıń sumlıq 33 dawa arzalar kirgizilip, puqaralardıń huqıqları tiklendi.
Ádillik bólimine kelip túsken múrájatlar analizlengende eń kóp múrájatlar miynet hámde sociallıq qorǵaw máselelerine baylanıslı ekenligi anıqlandı.
Nızamlardıń orınlanıwı boyınsha 37 mekeme hám kárxanalarda 27 úyreniwler ótkerilip, úyreniw nátiyjesinde 3002 nızam buzıwshılıq jaǵdayları anıqlandı.
Úyreniwler nátiyjesinde anıqlanǵan nızambuzılıw jaǵdayları boyınsha 2021 jılda mákeme hám shólkemlerge jámi 39 usınıslar kiritilip, nızambuzılıwlarǵa jol qoyǵan 20 shaxs intizamiy hám 18 shaxs hákimshilik juwapkershilikke tartıldı. Sonıń menen birge mekeme hám shólkemlerge 82 eskertiwler kiritildi.
Ádillik bólimi tárepinen Qaraózek rayonı hákimliginiń 4 qarar joybarı hám Xalıq deputatları Qaraózek rayonlıq Keńesiniń 6 qararlar joybarları huqıqıy ekspertizadan ótkerilip mámleketlik esapqa alındı.
Bólim tárepinen nızamshılıqqa ózgeris hám qosımshalar kiritiw hám de nızamshılıqtı jetilistiriw boyınsha 17 usınıslar kiritildi.
Puqaralardıń huqıqıy sana hám huqıqıy mádeniyatın joqarılatıwǵa baylanıslı jumıslardıń nátiyjeliligin jáne de asırıw, puqaralardıń jámiyetlik-siyasiy ózgerisler menen sáykes túrde huqıqıy bilimlerin asırıp barıwdıń zamanagóy usılların engiziw maqsetinde 2019-jıldıń 9-yanvar kúni Ózbekstan Respublikası Prezidentiniń 5618-sanlı Pármanı qabıl etildi. Párman menen “Jámiyette huqıqıy mádeniyattı joqarılatıw Koncepciya”sı tastıyıqlandı.
2021-jıl dawamında ádillik bólimi tárepinen 584 úgit-násiyat jumısları (250 ǵalaba xabar qurallarında, 318 awızeki, 16 kórgizbeli huqıqıy úgit-násiyat) alıp barıldı.
Jańadan qabıl etilgen 1194 normativ-huqıqıy hújjetler rayonlıq mekeme hám shólkemlerine elektron formada jetkerilip berildi.
Ádillik bólimi tárepinen mámleketlik uyımlardıń huqıqtı qollaw ámeliyatın úyreniw tiykarınan normativ-huqıqıy hújjetler orınlanıwın támiyinlew, nadurıs yamasa qarama-qarsılıqlı qollaw ámeliyatına alıp keletuǵın normalardı óz waqtında anıqlaw hám saplastırıw boyınsha isler ámelge asırılmaqta.
Qaraózek rayonı ádillik
bólimi baslıǵı O.Djumaniyazov