Янгиликлар
12
Texnikum pitkeriwshilerin joqarı oqıw ornına sáwbet tiykarında oqıwǵa qabıllaw tártibi belgilendi
Texnikum pitkeriwshilerin joqarı oqıw ornına sáwbet tiykarında oqıwǵa qabıllaw tártibi belgilendi
Húkimet qararı (17-san, 11.01.2022-j.) menen, Texnikumlardı tabıslı pitkergen pitkeriwshilerdi joqarı oqıw orınlarınıń bakalavriat tálim baǵdarlarına sáwbet tiykarında oqıwǵa qabıllaw tártibi haqqındaǵı reje tastıyıqlandı.
Reje texnikumlardı tabıslı pitkergen pitkeriwshilerdi óz tarawına sáykes bolǵan bakalavriat tálim baǵdarlarına kiriw imtixanlarısız, jeke tártiptegi sáwbet arqalı joqarı oqıw orınlarınıń 2-kursınan oqıwın dawam ettiriw ushın qabıllaw tártibin belgileydi.
Texnikumdı tabıslı pitkergenler kategoriyasına texnikumdaǵı tolıq oqıw dáwirinde oqıw semestrleri juwmaǵına kóre ózlestiriw bahaları “5 (joqarı)” hám “4 (jaqsı)”, biraq ózlestiriw bahalarınıń keminde 50 procenti (medicinalıq joqarı oqıw orınları ushın keminde 85 procenti) “5 (joqarı)” bolǵan pitkeriwshiler kiredi.
Bul tártip 2021-2022-oqıw jılınan baslap, oqıwshı texnikumdı pitkergen jıldan baslap eki jıl dawamında engiziledi.
Joqarıda atap ótilgen kategoriyaǵa kirmeytuǵın hám texnikumdı pitkergenine eki jıldan kóp bolǵanlar oqıwǵa kiriw niyetin bildirgende olardı joqarı oqıw orınlarınıń bakalavriat tálim baǵdarlarına oqıwǵa qabıllaw ulıwmalıq belgilengen tártipte ámelge asırıladı.
Tálim baǵdarlarınıń dizimi Joqarı hám orta arnawlı bilimlendiriw ministrligi tárepinen tastıyıqlanadı.
Oqıwǵa qabıllaw tólemli kontrakt tiykarında ámelge asırıladı.
Pitkeriwshiler hár jılı 5-iyuldan 25-iyulǵa shekem Joqarı hám orta arnawlı bilimlendiriw ministrliginiń rásmiy veb-saytı arqalı onlayn dizimnen ótedi.
Onlayn dizimnen ótken pitkeriwshilerdiń sistemaǵa júklengen hújjetleri joqarı oqıw orınlarınıń qabıllaw komissiyaları tárepinen hár jılı 5-avgustqa shekem úyrenip shıǵıladı.
Úyreniw nátiyjeleri boyınsha abiturientlerdiń jeke kabineti arqalı olarǵa xabar beriledi.
Pitkeriwshilerdi joqarı oqıw orınlarına oqıwǵa qabıllaw boyınsha ótkeriletuǵın sáwbet procesi hár jılı 10-avgusttan 25-avgustqa shekem, joqarı oqıw orınları tárepinen belgilengen múddette ótkeriledi.
Bul reje joqarı áskeriy, joqarı áskeriylestirilgen bilimlendiriw mákemelerine, Tashkent mámleketlik yuridikalıq universitetine, Ózbekstanda jumıs alıp barıp atırǵan sırt ellerdiń hám mámleketlik emes joqarı bilimlendiriw shólkemleri jáne olardıń filiallarına engizilmeydi.