Янгиликлар
11
XOJELI RAYONÍ ÁDILLIK BÓLIMI TÁREPINEN 2021–JÍL DAWAMÍNDA ÁMELGE ASÍRÍLǴAN JUMÍSLARÍ BOYÍNShA ESABATÍ
XOJELI RAYONÍ ÁDILLIK BÓLIMI TÁREPINEN 2021–JÍL DAWAMÍNDA ÁMELGE ASÍRÍLǴAN JUMÍSLARÍ BOYÍNShA ESABATÍ
Birden bir mámleketlik huqıqıy siyasattı júrgiziw, norma dóretiwshiligi jumısların muwapıqlastırıw, mámleketlik hám xojalıq basqarıw, jergilikli mámleketlik hákimiyatı uyımları jumıslarında huqıqtı qollaw ámeliyatın izshil hám bir túrde támiyinlew boyınsha ilajlardı ámelge asırıw ádillik uyımlarınıń tiykarǵı wazıypalarınan biri bolıp esaplanadı.
Bul baǵdarda 2021-jılda bólim tárepinen bir qatar jumıslar ámelge asırıldı.
Bólimge jıl dawamında 243 xat hám hújjetler kelip tústi.
Buyrıq tiykarında mámleketlik organları hám shólkemlerinde jámi 32 úyreniw hám monitoring alıp barılıp, 2262 nızam buzılıw jaǵdayları anıqlandı. Úyreniwler dawamında tiyisli mámleketlik organları hám shólkemlerine 53 usınıs, 65 eskertiw hámde 20 hákimshilik usınıslar kiritildi. Sonday-aq usınıslar tiykarında xızmetkerlerdiń 48 mln. 446 mıń sumnan aslam is-haqıları óndirilip berildi.
Atap aytqanda, Insan huqıqların qorǵaw tarawında:
Bólimge jámi 186 múrájatlar kelip túsip, 182 múrájaat óz sheshimin tawıp, 4 múrájat tiyisliligi boyınsha jiberildi. Sudlarǵa 728,9 mln. sumlıq dawa arzalar kirgizilip, puqaralardıń huqıqları tiklendi.
Bólimge kelip túsken múrájatlar analizlengende eń kóp múrájatlar miynet hám sociallıq qorǵaw máselelerine baylanıslı ekenligi anıqlandı.
Ádillik bólimi tárepinen usı jıl dawamında rayondaǵı mekeme hám shólkemlerde xızmetkerlerdiń miynet huqıqlarına ámel etiliwi boyınsha 1109 sorawnama ótkerildi. Sorawnamalardı ótkeriw dawamında islewshi xızmetkerlerden múrájatler qabıl etildi.
Bul múrájatlardı kórip shıǵıw nátiyjeleri boyınsha hám tiyisli shólkemlerde ótkerilgen monitoringlarda anıqlanǵan nızambuzıwshılıqlardı saplastırıw boyınsha tiyisli shólkemlerge eskertiw, usınıs, sudlarǵa dawa arzalar hámde lawazımlı shaxslardı hákimshilik juwapkershilikke tartıw boyınsha hákimshilik usınıslar kirgizildi.
Sonıń menen bir qatarda, bólim tárepinen shólkemlestirilgen qabıllawlarda 18 múrájatlar tiyisli tártipte kórip shıǵılıp, unamlı sheshimlerin taptı.
Huqıqıy ekspertiza tarawında:
Bólim tárepinen rayondaǵı jergilikli mámleketlik hákimiyatı uyımlarınıń 11 qarar joybarları huqıqıy ekspertizadan ótkerilip, mámleketlik esapqa alınıwı támiyinlengen.
Belgilengen talaplarǵa ámel etpey usınılǵan 1 qarar joybarı huqıqıy ekspertizadan ótkerilmey qaytarıldı.
Huqıqıy úgit-násiyat hám aǵartıwshılıq tarawında:
Puqaralardıń huqıqıy sana hám huqıqıy mádeniyatın joqarılatıwǵa baylanıslı jumıslardıń nátiyjeliligin elede asırıw, puqaralardıń jámiyetlik–siyasiy ózgerisler menen sáykes túrde huqıqıy bilimlerin asırıp barıwdıń zamanagóy usılların engiziw maqsetinde 2019–jıldıń 9–yanvar kúni Ózbekstan Respublikası Prezidentiniń 5618–sanlı Pármanı qabıl etildi.
Usı Párman menen “Jámiyette huqıqıy mádeniyattı joqarılatıw Koncepciya”sı tastıyıqlandı.
Bul salada bólim tárepinen 1850 úgit–násiyat jumısları, sonıń ishinde televidenie, radio hám gazetlarda 64 márte, veb-sait hámde sociallıq tarmaqlarda 1345 ten artıq úgit-násiyat jumısları alıp barıldı.
Huqıqıy úgit–násiyat ilajları puqaralardan kelip túsip atırǵan múrájatların tereń tallaw arqalı xalqımızdıń kúndelikli turmısında ushırasatuǵın máseleler, yaǵnıy materiallıq járdem, jer, úy–jay alıw, kommunal xojalıq, jeńillikler, aliment, miynet nızamshılıǵı, jumısqa jaylastırıw, bilim alıw hám basqalar boyınsha úgit-násiyat jumısları mánzilli túrde alıp barıldı.
Atap aytqanda, “Biypul huqıqıy másláhát penen hár bir úyge” uranı astında jańa huqıqıy másláhát beriw sistemasın shólkemlestiriw arqalı xalıqtın huqıqıy sawatsızlıǵın joq etiw maqsetinde bólim xızmetkerleri tárepinen barlıq mákan hám awıl puqaralar jıyınlarında úyme–úy júrip puqaralarǵa huqıqıy másláhátler berildi. Úyme–úy júriw dawamında múrájatlar qabıl etilip, sonnan barlıq múrájatlar bólim tárepinen sheshildi.
Sonday-aq, Qaraqalpaqstan Respublikası Ádillik ministrligi, Jınayat isleri boyınsha sudı, Puqaralıq isleri boyınsha sudı, Hákimshilik sudı, Ekonomikalıq sudı hám “Madad” mámleketlik emes, kommerciyalıq emes shólkemi ortasında “Qaraqalpaqstan Respublikasında jınayatlardı boldırmaw, jınayatshılıq profilaktikasın elede jetilistiriw, ádil sudlawdı támiyinlew hám korrupciyasız aymaqqa aylandırıw boyınsha birge islesiw Memorandumı” imzalanıp, búgingi kúnde bólim tárepinen rayon sudı imaratındaǵı “Xalıqqa biypul huqıqıy járdem” xanalarında fizikalıq hám yuridikalıq shaxslarǵa huqıqıy járdemler kórsetilip kelinbekte.
Xalıqtıń huqıqıy másláhátke bolǵan mútájligin támiyinlew maqsetinde, @Xujayli_adliya_bulimi telegram kanalı arqalı puqaralardıń huqıqıy sana hám huqıqıy mádeniyatın joqarılatıwǵa baylanıslı jumıslar turaqlı ráwishte alıp barılmaqta.
F.Naranova,
Xojeli rayonı ádillik bólimi baslıǵı