Янгиликлар
28
Miynetti qorǵaw menen baylanıslı qaǵıydalar
Miynetti qorǵaw menen baylanıslı qaǵıydalar
Miynetti qorǵaw mámleketimizdiń eń áhmiyetli ekonomikalıq hám social baǵdarlarınan biri esaplanadı. Miynetti qorǵaw bul miynet etiw barısında insan ómiri hám densawlıǵı qáwipsizligi, jumıs islew qábiletiniń saqlanıwın támiyinlewge qaratılǵan huqıqıy, sociallıq-ekonomikalıq, shólkemlestiriwshilik, texnikalıq, sanitariya-gigienalıq, emlew-profilaktikalıq hámde reabilitaciyalıq ilajlar hám qurallar sisteması.
Qáwipsiz hám gigiena talaplarına juwap beretuǵın miynet sharayatların jaratıp beriw jumıs beriwshiniń wazıypasina kiredi. Jumıs beriwshige miynetti qorǵaw talapların buzǵanlıǵı ushın nızamshıliqta juwapkershilik belgilengen.
Puqaralardı densawlıq jaǵdayı boyınsha ózine say kelmeytuǵın jumısqa qabıl etiw hám xızmetkerlerdi basqa sonday jumısqa ótkeriw qadagan etiledi.
Puqaralardıń densawlıǵı hám ómirine joqarı dárejede qáwip tuwdırıw múmkinligi aldınan belgili bolǵan jumısqa qabıl etiw hámde xızmetkerlerdi basqa sonday jumısqa ótkeriw payıtında jumıs beriwshi olardı bul haqqında eskertiwi tiyis.
Xızmetker jumıs beriwshiden miynet sharayatları haqqında, sonıń menen birge, kásiplik kesellikler menen keselleniw itimalı barlıǵı, sol ushın ózine beriliwi tiyis bolǵan jeńillikler hám kompensaciyalar, sonday-aq jeke hám jámáátlık qorǵanıw quralları haqqında maǵlıwmat alıw huqıqına iye. Jeke qorǵanıw quralları menen támiyinleniwi jumıs beriwshiniń qarjıları esabınan ámelge asırıladı.
Xızmetker jumıs barısında miynetti qorǵawga baylanısli talaplardıń buzilıwı aqibetinde óz ómiri hám densawlıǵı ushın qáwip júzege kelgen jaǵdayda jumıs beriwshige xabar beredi. Miynetti qorǵawǵa derek talaplarǵa ámel etiwdi tekseriwshi hám qadaǵalawshı uyımlar tárepinen bunday jaǵday tastıyıqlansa jumis beriwshi tárepinen bul jaǵdaydı saplastırıw ilajları kóriledi. Xızmetker óz ómiri hám densawlıǵı ushın qáwip tuwdırıwshı jaǵdaylar saplastırılmaǵansha tiyisli jumıstı orınlawdan bas tartıw huqıqına iye hámde usı dáwirde onıń ortasha aylıǵı saqlanıp qaladı.
Sonıń menen bir qatarda nızamshılıqta miynetti qorgaw talaplarına tiyisli xızmetkerdiń de minnetlemeri belgilengen.
Bunnan tısqarı nızam hújjetlerinde miynet sharayatı awır, zıyanlı hám qáwipli jumıslarda bánt bolǵan xızmetkerler, sonday-aq xızmetkerlerdiń ayırım kategoriyaları (hayallar, on segiz jasqa tolmaǵan shahslar, miynet qábileti sheklengen shahslar) ushın miynetti qorǵaw salasındaǵı qatnasıqlardı tártipke salıwdıń ózine tán ózgeshelikleri belgilengen.
Dauletova Gumsha
Nókis qalası Yuridikalıq xızmet kórsetiw orayı bas yuriskonsultı