Янгиликлар
18
Mámleketlik bayraqqa 30 jıl
Mámleketlik bayraqqa 30 jıl
Ózbekstan Respublikasınıń Mámleketlik bayraǵı Ózbekstan Respublikası Mámleketlik suverenitetiniń nıshanı, xalıqaralıq qatnasıqlarda Ózbekstan Respublikasınıń simvolı bolıp tabıladı.
Búgin Ózbekstan Respublikasınıń Mámleketlik bayraǵı qabıl etilgenligine 30 jıl tolmaqta.
Ózligimizdi, ǵárezsizligimizdi, usı elge tiyisliligimizdi ańlatıwshı bul nıshan hár bir insannıń qálbinde eriksiz watanǵa degen muxabbattı, maqtanıshtı payda etedi.
Ózbekstan Respublikasınıń Mámleketlik bayraǵı haqqındaǵı Nızam 1991-jıl 18-noyabr kúni qabıl etildi. Nızam mámleketlik bayraqtıń kórinisi, jaylastırılatuǵın orınları hám olarǵa baylanıslı tártipler, bayraq belgisinen paydalanıwǵa bolmaytuǵın jaǵdaylar hám bayraqqa húrmetsizlik etkenlik ushın juwapkershilik máselelerin tártipke saladı.
Ózbekstan Respublikası mámleketlik bayraǵınıń jaylastırılıwında álbette nızamshılıq talaplarına ámel etiliwi lazım.
Máselen, Ózbekstan Respublikasınıń Mámleketlik bayraǵı menen bir waqıtta Qaraqalpaqstan Respublikasınıń Mámleketlik bayraǵı kóterilgende, Ózbekstan Respublikasınıń Mámleketlik bayraǵı (imarattıń aldınǵı tárepine qarap turǵanda) shep tárepten kóteriliwi kerek. Olardıń ólshemleri hám kóteriliw bálentlikleri bir-birine qarata birdey bolıwı lazım.
Ózbekstan Respublikasınıń Mámleketlik bayraǵı menen bir waqıtta shet el mámleketleri hám (yamasa) xalıqaralıq shólkemlerdiń bayraqları kóterilgende olar birdey bálentlikke jaylastırılıwı hámde birdey ólshemge iye bolıwı kerek.
Ózbekstan Respublikasınıń Mámleketlik bayraǵı imaratlardıń tiykarǵı kirer jerinde yamasa bunıń ushın qolaylı orında, yamasa kiydiriletuǵın sapta, yamasa flagshtokta bayraqtıń sabı imarattıń fasadı menen qosa 45 gradustan aspaytuǵın múyeshti payda etiwi kerek.
Kóterilgen Ózbekstan Respublikası Mámleketlik bayraǵınıń borlatı jerden eń keminde 2,5 metr bálentlikte bolıwı lazım.
Ózbekstan Respublikasınıń Mámleketlik bayraǵı haqqındaǵı Nızam menen bayraqtıń sxematikalıq hám reńli kórinisi tastıyıqlanǵan.
Ózbekstan Respublikasınıń Mámleketlik bayraǵı hám onıń kórinisi úlken-kishiligine qaramastan usı Nızam menen tastıyıqlanǵan reńli hám sxematikalıq kóriniske bárqulla anıq sáykes keliwi tiyis.
Usı Nızam orınlanıwın támiyinlew tiyisli mámleketlik uyım hám basqa shólkemlerdiń basshıları juwapkershiligine, al basqa mámleketlik uyım hám shólkemler tárepinen orınlanıwı ústinen qadaǵalaw ishki isler uyımları tárepinen ámelge asırıladı.
Óz gezeginde Sırtqı isler ministrligi Ózbekstan Respublikasınıń diplomatiyalıq wákilxanaları, konsullıq mákemeleri, sonday-aq xalıqaralıq shólkemler janındaǵı wákilxanaları tárepinen orınlanıwı ústinen qadaǵalawdı ámelge asıradı.
Mámleketlik bayraqtıń táriyplemesi túsirilgen belgilerden Ózbekstan Respublikasına tiyislilikti belgilew maqsetinde predmetlerde, oqıw-tárbiya processinde, sonday-aq Ózbekstan Respublikası mámleketlik sıylıqlarınıń elementi sıpatında paydalanılıwı mumkin.
Al, Ózbekstan Respublikasınıń Mámleketlik bayraǵınıń táriyplemesi túsirilgen belgilerden islep shıǵarıp atırǵan yamasa realizaciya etilip atırǵan tovarlardı (jumıslardı, xızmetlerdi) ótkeriw ushın kommerciyalıq maqsetlerde paydalanıw, sonday-aq, mámleketlik emes kommerciyalıq emes shólkemlerdiń belgileri Ózbekstan Respublikasınıń Mámleketlik bayraǵına uqsas bolıwı múmkin emes.
Ózbekstan Respublikasınıń puqaraları, sonday-aq Ózbekstanda turǵan basqa da shaxslar Ózbekstan Respublikasınıń Mámleketlik bayraǵın húrmetlewi shárt.
Ózbekstan hám Qaraqalpaqstan Respublikalarınıń Mámleketlik bayraq, gerb hám gimni haqqındaǵı nızamshılıq hújjetlerin buzıw, Mámleketlik nıshanlarǵa húrmetsizlik etiw hákimshilik hám jınayıy juwapkershilikke sebep boladı.
Ózbekstan Respublikasınıń Hákimshilik juwapkershilik haqqındaǵı kodeksine tiykar, Ózbekstan Respublikası hám Qaraqalpaqstan Respublikasınıń Mámleketlik bayraǵı, Mámleketlik gerbi hám mámleketlik gimni haqqındaǵı nızamshılıqtı buzıw:
puqaralarǵa bazalıq esaplaw muǵdarınıń úsh esesine shekem, lawazımlı shaxslarǵa bolsa- úsh esesinen jeti esesine shekem;
áyne usınday huqıqbuzarlıq hákimshilik jaza qollanılǵannan keyin bir jıl dawamında qayta islense:
puqaralarǵa bazalıq esaplaw muǵdarınıń úsh esesinen bes esesine shekem, lawazımlı shaxslarǵa - jeti esesinen on esesine shekem járiyma salıwǵa sebep boladı.
Ózbekstan Respublikasınıń Jınayat kodeksine tiykar, mámleketlik nıshanlarǵa húrmetsizlik etiw - bazalıq esaplaw muǵdarınıń jigirma bes esesine shekem muǵdarda járiyma yaki úsh júz alpıs saatqa shekem májbúriy jámiyetlik jumıslar yamasa úsh jılǵa shekem miynet penen dúzetiw jumısları menen jazalanadı.
Nókis rayonı Ádillik bólimi bas másláhátshisi
A.Abdikadirova