Янгиликлар
14
14-dekabr - Qaraqalpaqstan Respublikasınıń Mámleketlik bayraǵı qabıl etilgen kún
14-dekabr - Qaraqalpaqstan Respublikasınıń Mámleketlik bayraǵı qabıl etilgen kún
1992-jıl 14-dekabr kúni Qaraqalpaqstan Respublikasınıń Mámleketlik bayraǵı haqqındaǵı Nızam qabıl etildi.
Qaraqalpaqstan Respublikası Konstituciyası hám usı Nızamǵa tiykar, Qaraqalpaqstan Respublikasınıń Mámleketlik bayraǵı Qaraqalpaqstan Respublikasınıń mámleketlik suverenliginiń simvolı bolıp tabıladı.
Qaraqalpaqstan Respublikası aymaǵında ótkeriletuǵın xalıq aralıq konferenciyalarda, kórgizbelerde, sport jarıslarında Qaraqalpaqstan Respublikasın tanıtadı.
Qaraqalpaqstan Respublikası Mámleketlik bayraǵı Turaqlı túrde:
Qaraqalpaqstan Respublikası Joqarǵı Keńesiniń;
Qaraqalpaqstan Respublikası Ministrler Keńesiniń;
Qaraqalpaqstan Respublikası Konstituciyalıq baqlaw komitetiniń;
respublika mámleketlik basqarıw uyımlarınıń;
Qaraqalpaqstan Respublikası Oraylıq saylaw komissiyasınıń;
jergilikli mámleketlik hákimiyat uyımlarınıń;
sudlardıń;
prokuratura uyımlarınıń imaratlarında;
Qaraqalpaqstan Respublikasınıń Joqarǵı Keńesi, Ministrler Keńesi, Konstituciyalıq baqlaw komiteti, sudlardıń, mámleketlik basqarıw uyımlarınıń, Oraylıq saylaw komissiyasınıń hám jergilikli mámleketlik hákimiyat uyımlarınıń májilisler zalında hám usı uyımlardıń basshılarınıń xızmet xanalarında kóteriledi.
Ózbekstan Respublikasınıń hám Qaraqalpaqstan Respublikasınıń nızamları menen belgilengen bayram kúnlerinde – Qaraqalpaqstan Respublikası Ministrler Keńesiniń, rayon hám qala hákimleriniń qararları menen belgilengen oraylıq kóshelerde, maydanlarda, basqa da jámiyetlik orınlarda hám obektlerinde;
Ózbekstan Respublikasınıń Prezidenti saylawı, Ózbekstan Respublikası Oliy Majlisiniń Nızamshılıq palatası deputatların, Senat aǵzaların, Qaraqalpaqstan Respublikası Joqarǵı Keńesi deputatlarınıń, xalıq deputatları rayonlıq, qalalıq Keńesleriniń deputatların saylaw yamasa referendum kúnleri dawıs beriw imaratları hám xanalarda kóteriledi;
Qaraqalpaqstan Respublikası húkimetiniń buyrıǵı boyınsha;
sport maydanlarında – Qaraqalpaqstan Respublikasınıń chempionatları hám birinshilikleri, milliy saylandı komandalardıń qatnasıwında Qaraqalpaqstan Respublikası aymaǵında xalıq aralıq sport jarısların ótkeriw waqtında hám milliy saylandı komandalarınıń wákilleri bolǵan jarıs jeńimpazların sıylıqlaw máresimleri waqtında Ózbekstan Respublikası Mámleketlik bayraǵı kóterilgennen keyin;
Qaraqalpaqstan Respublikasınıń Mámleketlik bayraǵı oǵan bolǵan tiyisli dárejedegi húrmet támiynlengen halda ulıwmalıq bayramlar hám saltanatlı máresimler waqtında kóteriliwi múmkin.
Qaraqalpaqstan Respublikasınıń Mámleketlik bayraǵınıń táriyplemesi túsirilgen belgilerden Qaraqalpaqstan Respublikasına tiyislilikti belgilew maqsetinde predmetlerde, oqıw-tárbiya processinde, sonday-aq Qaraqalpaqstan Respublikası mámleketlik sıylıqlarınıń elementi sıpatında paydalanılıwı mumkin.
Qaraqalpaqstan Respublikası Mámleketlik bayraǵınıń elementlerin mámleketlik emes shólkemleri hújjetleriniń rekvizitleri yamasa reklama materiallarına kirgiziliwine jol qoyılmaydı.
Qaraqalpaqstan Respublikasınıń Mámleketlik bayraǵınıń táriyplemesi túsirilgen belgilerden islep shıǵarıp atırǵan yamasa realizaciya etilip atırǵan tovarlardı (jumıslardı, xızmetlerdi) ótkiziw ushın kommerciyalıq maqsetlerde paydalanıw mumkin emes.
Mámleketlik emes kommerciyalıq emes shólkemlerdiń belgileri Qaraqalpaqstan Respublikasınıń Mámleketlik bayraǵına uqsas bolıwı mumkin emes.
Qaraqalpaqstan Respublikasınıń Mámleketlik bayraǵı menen bir waqıtta Ózbekstan Respublikasınıń Mámleketlik bayraǵı kóterilgende Qaraqalpaqstan Respublikasınıń Mámleketlik bayraǵı (imarattıń aldıńǵı jaǵına qarap turǵanda) oń tárepinen kóteriliwi kerek.
Qaraqalpaqstan Respublikasınıń Mámleketlik bayraǵı menen bir waqıtta bir neshe mámleketler hám (yamasa) xalıq aralıq shólkemlerdiń bayraqları kóterilgende Qaraqalpaqstan Respublikasınıń Mámleketlik bayraǵı xalıq aralıq huqıq normalarına muwapıq kóteriledi.
Qaraqalpaqstan Respublikasınıń Mámleketlik bayraǵı jaylarda úlken kirer awızdıń tóbesinde yamasa bunıń ushın qolaylı orında, yamasa kiydiriletuǵın sapta, yamasa flagshtokta kóteriledi, bunda bayraqtıń sabı jaydıń fasadı menen qosa 45 gradustan aspaytuǵın múyeshti payda etedi.
Kóterilgen Qaraqalpaqstan Respublikası Mámleketlik bayraǵınıń borlatı jerden eń keminde 2,5 metr bálentlikte bolıwı kerek.
Qaraqalpaqstan Respublikasınıń Mámleketlik bayraǵı hám onıń táriyplemesi kólemine qaramastan usı Nızamǵa qosa tigilgen reńli hám sxematikalıq táriyplerine bárqulla tuwrı keliwi tiyis.
Qaraqalpaqstan Respublikasınıń puqaraları, sonday-aq Qaraqalpaqstandaǵı basqa da adamlar Qaraqalpaqstan Respublikasınıń Mámleketlik bayraǵın húrmetlewi shárt.
Esletip ótemiz, Ózbekstan Respublikası hám Qaraqalpaqstan Respublikasınıń Mámleketlik bayraǵı, Mámleketlik gerbi hám mámleketlik gimni haqqındaǵı nızamshılıqtı buzıw, mámleketlik nıshanlarǵa húrmetsizlik etiw Jınayıy hám hákimshilik juwapkerishilikke sebep boladı.
Usı qılmıs Ózbekstan Respublikasınıń Hákimshilik juwapkershilik haqqındaǵı kodeksine tiykar:
Puqaralarǵa bazalıq esaplaw muǵdarınıń úsh esesine shekem, lawazımlı shaxslarǵa bolsa- úsh esesinen jeti esesine shekem járiyma;
Áyne usınday huqıqbuzarlıq hákimshilik jaza qollanılǵannan keyin bir jıl dawamında qayta islense:
Puqaralarǵa bazalıq esaplaw muǵdarınıń úsh esesinen bes esesine shekem, lawazımlı shaxslarǵa - jeti esesinen on esesine shekem járiyma salıwǵa sebep boladı.
Ózbekstan Respublikasınıń Jınayat kodeksine tiykar, mámleketlik nıshanlarǵa húrmetsizlik etiw
Bazalıq esaplaw muǵdarınıń jigirma bes esesine shekem muǵdarda járiyma yamasa úsh júz alpıs saatqa shekem májbúriy jámiyetlik jumıslar yamasa úsh jılǵa shekem miynet penen dúzetiw jumısları menen jazalanadı.