Янгиликлар
29
Jetim balalar hám ata-ana qaramaǵınan ayrılǵan balalardı sociallıq qorǵaw
Jetim balalar hám ata-ana qaramaǵınan ayrılǵan balalardı sociallıq qorǵaw
Mámleketimiz tárepinen jetim balalar hám ata-ana qaramaǵınan ayrılǵan balalardı sociallıq qorǵaw hámde olardı úy-jay menen támiyinlew máselelerine ayrıqsha itibar qaratılǵan.
Usı orında, Ózbekstan Respublikası Prezidentiniń 2021-jıl 9-avgustta «Jetim balalar hám ata-ana qaramaǵınan ayrılǵan balalardı mámleket tárepinen qollap-quwatlawdıń jańa sistemasın islep shıǵıw is-ilajları haqqında»ǵı PQ-5216-sanlı qararı, usı qarar tiykarında Ministrler Kabinetiniń 2021-jıl 25-oktyabrde «Jetim balalar hám ata-ana qaramaǵınan ayrılǵan balalardı sociallıq qollap-quwatlawǵa baylanıslı qosımsha
is-ilajlar haqqında»ǵı 656-sanlı qararı qabıl etildi.
Joqarıda atap ótilgen, Prezidentimizdiń 9-avgust 2021-jıldaǵı PQ-5216-sanlı qararınıń 15-bánti talaplarına tiykar, jetim balalar hám ata-ana qaramaǵınan ayrılǵan balalar hámde olardı perzentlikke yaki amangerlikke, qáwenderlikke, patronatqa alǵan puqaralarǵa Yuridikalıq xızmet kórsetiw orayları tárepinen biypul yuridikalıq xızmet kórsetiw yaki huqıqıy másláhátler beriw wazıypası júkletilgen.
Mine usı baǵdarda, jetim balalar hám ata-ana qaramaǵınan ayrılǵan balalar hámde olardı perzentlikke yaki amangerlikke, qáwenderlikke, patronatqa alǵan puqaralar menen ushırasıw ótkerilip, bul puqaralarǵa Yuridikalıq xızmet kórsetiw orayınıń wazıypaları, maqseti hám baǵdarları menen keńnen tanıstırılıp, puqaralar tárepinen ámeliyatta ózleriniń qızıqtırǵan yaki mashqalaǵa aylanıp atırǵan máseleleri boyınsha bergen sorawlarına ámeldegi nızam hújjetleri talapları tiykarında huqıqıy túsinikler berildi.
Endi biz bul puqaralar menen tek ǵana auditoriyalarda ushırasıp qoymastan, Orayǵa kelgen puqaralarǵa yaki olardıń jasaw mánzillerine barıw arqalıda yuridikalıq xızmet kórsetiliwi támiyinlenedi.
Statistik esabatlarǵa kóre, búgingi kúnde Kegeyli rayonında 55 shańaraqlardıń
70 balaları ámengerlik hám qáwenderlikke, (sonnan: 31 bala ámengerlik, 39 bala qáwenderlik) 169 bala perzentlikke berilgen.
Yuridikalıq xızmet kórsetiw orayı tárepinen ámengerlik hám qáwenderlikke berilgen balalar rayondaǵı biriktirilgen juwapker sektorlar kesiminde úyrenilgende:
- 1-sektor aymaǵında 14 bala;
- 2-sektor aymaǵında 22 bala;
- 3-sektor aymaǵında 19 bala;
- 4-sektor aymaǵında 18 bala jasap kelmekte.
Ózbekstan Respublikası Ministrler Kabinetiniń 2021-jıl 25-oktyabr kúni «Jetim balalar hám ata-ana qaramaǵınan ayrılǵan balalardı sociallıq qollap-quwatlawǵa baylanıslı qosımsha is-ilajlar haqqında»ǵı 656-sanlı qararı qabıl etilgen.
Qarar talaplarına muwapıq, 2022-jıl 1-yanvardan baslap:
- jetim balalar hám ata-ana qaramaǵınan ayrılǵan balalardıń úy-jayga mútájlıǵı «Sociallıq qorǵaw birden-bir reestri» axborot sisteması arqalı anıqlanıwı;
- jetim balalar hám ata-ana qaramaǵınan ayrılǵan balalardı perzentlikke, ámengerlikke (qáwenderlikke, patronatqa) alıw «Amangerlik hám qáwenderlik» elektron platforması arqalı onlayn múrájatına tiykar ámelge asırılatuǵınlıǵı belgilengen.
Qarardıń 24-bántinde «Ózlerine biriktirilgen turar jayǵa iye bolmaǵan hám turaq jayǵa mútájler sıpatında esapta turǵan jetim balalar hám ata-ana qaramaǵınan ayrılǵan balalarǵa olar 18 jasqa tolgan jılda kóp kvartiralı úy-jaylardan ulıwma maydanı
25 kvadrat metrden kem bolmaǵan 1 xanalı, er jetken jetim balalar hám ata-ana qaramaǵınan ayrılǵan balalar ortasında neke dúzilgen jaǵdaylarda, 50 kvadrat metrden kem bolmaǵan 2 xanalı kvartiralar ajıratılıwı»- belgilengen.
Jetim balalar hám ata-ana qaramaǵınan ayrılǵan balalar ortasında neke dúzilgen jaǵdayda shańaraqtıń ekinshi aǵzası hám úy-jay menen támiyinlengen dep esaplanadı hám teń múlk huqıqına iye boladı.
Sonday-aq, nágiranlıǵı bolǵan jetim balalar hám ata-ana qaramaǵınan ayrılǵan balalar kvartiralar kóp qabatlı úylerdiń úshinshi qabatına shekem ajıratıladı.
Sonıda ayrıqsha atap ótiwdi lazım dep bilemen, úy-jay beriw tuwrısındaǵı qarar tiykarında rayon-qala hákimligi jetim balalar hám ata-ana qaramaǵınan ayrılǵan balalarǵa joqarıdaǵı qarar menen tastıyıqlanǵan belgilengen úlgidegi order beredi, order berilgen úy-jayga kóship kiriw ushın tiykar esaplanadı.
Orderler jetim balalar hám ata-ana qaramaǵınan ayrılǵan balalarǵa «onlayn-náwbet» axborot sistemaǵa kóre qatań izbe-izlik tiykarında beriledi.
Order berilgen kúnnen 10 kúnnen keshikpey jetim balalar hám ata-ana qaramaǵınan ayrılǵan balaǵa, belgilengen tártipte, orderde kórsetilgen úy-jay notarial rásmiylestirilip beriledi.
Order tiykarında alınǵan úy-jaylar jetim balalar hám ata-ana qaramaǵınan ayrılǵan bala atına rásmiylestiriledi, rásmiylestirilgen sáneden baslap on jıl múddetke úy-jaydı satıwǵa, almastırıwǵa yaki basqasha túrdegi ózlestiriwge jol qoyılmaydı.
JETIM BALALARDÍ SOCIALLÍQ QORǴAW MÁSELESIne húkimetimiz tárepinen ayrıqsha itibar karatılǵan.
Usı orında, Ózbekstan Respublikası Prezidentiniń 2021-jıl 9-avgusttaǵı “Jetim balalar hám ata-ana qaramaǵınan ayırılǵan balalardı mámleket tárepinen qollap-quwatlawdıń jańa sistemasın engiziw is-ilajları haqqında”ǵı PQ-5216-sanlı qararı qabıl etildi.
Qarardıń 15-bántine tiykar, Xalıq deputatları rayon hám qala Keńesleriniń baslaması menen, jetim balalar hám ata-anası qaramaǵınan ayrılǵan balalardı amangerlik hám qáwenderlikke alǵan «Sociallıq qorǵaw birden-bir reestri» axborot sistemasında dizimge alınǵan shańaraqlarǵa usı balalar 18 jasqa tolǵanǵa shekem Qaraqalpaqstan Respublikası byudjeti qosımsha derekleri esabınan bazalıq esaplaw muǵdarınıń bes esesi muǵdarında materiallıq járdem pulı tólew ámeliyatı islep shıǵılatuǵınlıǵı belgilengen.
Meyli ol sociallıq qorǵawǵa mútáj bolsın, ata-anasınan yaki ata-ana qaramaǵınan ayrılǵan bolsın barlıq balalar mámleket qorǵawında bolıp, qatań qadaǵalawǵa alınǵan, sonıń ushın balarımızdıń sociallıq támiyinleniwi, olardıń qolaylı shárt-shárayatlarda tálim-tárbiya alıwı ushın hár birimiz juwapker hám minnetli ekenligimizdi umıtpawımız kerek.
Kegeyli rayonı Yuridikalıq
xızmet kórsetiw orayı baslıǵı Kazbek Paluaniyazov