Янгиликлар
22
Tamırlasıp ketken KESELLIK
Tamırlasıp ketken KESELLIK
Jaqında dostımnıń avtomobilinde ketip baratırǵanımızda JHQB xızmetkeri bizlerdi toqtattı. Dostım máseleni tezirek sheshiw maqsetinde xızmetker qaltasına aqshadan saldı. Bul jaǵday maǵan tábiyiy jaǵday sıyaqlı ko'rindi, hátte, egerde xızmetker puldı almasa “kerekli adamǵa” qońıraw qılıw pikiri de tuwıldı. Al, sonday eken men korrupciyaǵa qarsı emespen, men korrupciyanı rawajlandırıp atırman.
Internet yamasa televizor arqalı qandayda bir kisiniń korrupciya menen qolǵa túskenin kórgenimde, olarǵa qarata mende jerkenish payda bolar edi. Ózimshe ishimnen: “Sol da lawazımlı shaxs pa? Iskerligińe, shańaraǵıńa daq túsirdiń” deytuǵın edim. Biraq ózimde júz bergen jaǵdaydı tárezige sala turıp, meniń de olardan ayırmashılıǵım qalmadı, dep oylap qaldım. Óytkeni korrupciya mámlekette qaysı tarawda yamasa qaysı dárejede bolmasın, ol bári bir jámiyetke zıyanın tiygize beredi.
Biz ǵalaba xabar quralları arqalı korrupciya jolına kirgenlerdi tamasha etkenimizde olardı ayıplaymız, tap ózimiz qandayda bir ret, qandayda bir máseleni pul yamasa tanısımız arqalı sheshiwge urınbaǵanday. Bir oylap kóreyik biziń bul uqıplılıǵımız arqalı sheshim tapqan máselemiz, erteń ózimizge qıyınshılıq tuwdırmaspeken? Yaǵnıy, biz korrupciya arqalı sheship kelgen islerimiz waqıtı kelip aqshamız yamasa tanısımız bolmay qalǵanında sheship bolmaytuǵın máselege aylanıp qalmaspa eken?
Lawazımlı shaxs óz jumısın shın kewilden atqarsa, óz máplerin oylap qáte kemshilikke jol qoymasa barlıq mashqala joǵalıp qalatınday. Biraq máseleniń ekinshi tárepide bar, korrupciya júz beriwine tek ǵana lawazımlı shaxslardı ayıplaw qáte, sebebi biz uqıplılar qanday bolmasın jumısımızdı pitiriwge háreket etemiz hám óz ornında korrupciya rawajlanıwına kómeklesken bolamiz. Sonday eken, biz korrupciya joǵalıp ketiwin qálemeymiz.
Waqtı kelip perzentimiz jıllap tayarlanıp oqıwǵa kire almasa, onıń ornın para menen oqıpwǵa kirgen qońsımız iyelese, ter tógib islegen joybarmızdı qabıllanbastán “joqarıdan” buyrıq kelip ornına “qam” joybar tastıyıqlansa… negizinde, ózimiz tutqan soǵan uqsas jollarımız oyımızdıń bir shetinen de ótpeydi. Óytkeni biziń korrupciya arqalı pitkergen hár bir isimiz, shınjır mısalı basqalarǵa zıyan keltirmekte, rawajlanıwımızǵa tosqınlıq etip atır. Bulardıń barlıǵı puqaralarda óz huqıqların tolıq bilmewi, huqıqıy sananıń joqarı emesligi menen túsiniledi. Oylap kóreyik, denemizde payda bolǵan jaraǵa qarsı ózimiz ilaj kórmesek, ol úlkeyip biziń den-sawlıǵımızǵa úlken zıyan jetkeriwi múmkin.
Sonday eken hadal, tuwrı bolıp jasasaq, óz jumısımız benen iskerligimizdi sap hám ádalatlı alıp barsaq, tek ǵana jámiyettiń emes bálki áyne ózimiz hám shańaraǵımızdıń rawajlanıwına úlken úles qosqan bolamız. Ásirese, biz jaslar korrupciyaǵa keskin múnasibette bolıwımız kerek, sebebi mámleket keleshegi bizlerdiń qolımızda.
Shımbay rayonı yuridikalıq
xızmet kórsetiw orayi
bas yuriskonsultı E.Q. Adilov