Янгиликлар
28
Farzandlikka olishi mumkin boʻlmagan shaxslar roʻyxati kengaytirildi
Farzandlikka olishi mumkin boʻlmagan shaxslar roʻyxati kengaytirildi
21.10.2021-yildagi «Farzandlikka olish tartibining huquqiy asoslari takomillashtirilishi munosabati bilan Oʻzbekiston Respublikasining ayrim qonun hujjatlariga oʻzgartish va qoʻshimchalar kiritish toʻgʻrisida»gi OʻRQ-723-son Qonun qabul qilindi.
Ushbu Qonun bilan Oila kodeksiga hamda «Vasiylik va homiylik toʻgʻrisida»gi Qonunga oʻzgartirish va qoʻshimchalar kiritildi. Xususan, farzandlikka olishi mumkin boʻlmagan shaxslar roʻyxati kengaytirildi.
Quyidagilar farzandlikka olishi mumkin boʻlmagan shaxslar hisoblanadi:
a) ilgari quyidagi jinoyatlarni sodir etganlik uchun hukm qilinganlar:
hayotga, sogʻliqqa qarshi jinoyatlar hamda hayot yoki sogʻliq uchun xavfli boʻlgan jinoyatlar;
jinsiy erkinlikka, oilaga, yoshlarga va axloqqa qarshi shaxsning ozodligiga, sha’ni va qadr-qimmatiga qarshi jinoyatlar (bundan tuhmat va haqorat qilish mustasno);
fuqarolarning konstitutsiyaviy huquq va erkinliklariga qarshi jinoyatlar (bundan jismoniy va yuridik shaxslarning murojaatlari toʻgʻrisidagi qonunchilikni buzish, mualliflik yoki ixtirochilik huquqlarini buzish mustasno);
tinchlikka va insoniyatning xavfsizligiga qarshi, Oʻzbekiston Respublikasiga qarshi jinoyatlar;
oʻzgalarning mol-mulkini talon-toroj qilish bilan bogʻliq boʻlgan jinoyatlar, jinoiy yoʻl bilan topilgan mol-mulkni olish yoki oʻtkazish, tijoratda pora evaziga ogʻdirib olish yoxud nodavlat tijorat tashkilotining yoki boshqa nodavlat tashkilotining xizmatchisini pora evaziga ogʻdirib olish bilan bogʻliq jinoyatlar;
boshqaruv tartibiga, shuningdek odil sudlovga qarshi jinoyatlar, qinoqqa solish va boshqa shafqatsiz, gʻayriinsoniy yoki qadr-qimmatni kamsituvchi muomala hamda jazo turlarini qoʻllash;
jamoat xavfsizligiga qarshi jinoyatlar, quyidagilar bundan mustasno:
-uchuvchisiz uchadigan apparatlarni qonunga xilof ravishda olib kirish, oʻtkazish, olish, saqlash va ulardan foydalanish;
-karantinli va inson uchun xavfli boʻlgan boshqa yuqumli kasalliklar tarqalishi haqida haqiqatga toʻgʻri kelmaydigan ma’lumotlarni tarqatish;
-tadqiqot faoliyatini amalga oshirishda xavfsizlik qoidalarini buzish, mehnatni muhofaza qilish qoidalarini buzish, sanitariyaga oid qonunchilikni yoki epidemiyalarga qarshi kurash qoidalarini buzish;
-togʻ-kon, qurilish yoki portlatish ishlari xavfsizligi qoidalarini buzish, yongʻin xavfsizligi qoidalarini buzish;
giyohvandlik vositalarining yoki psixotrop moddalarning qonunga xilof muomalasidan iborat jinoyatlar;
jamoat tartibiga qarshi jinoyatlar va harbiy mansabdorlik jinoyatlari;
b) a-bandda koʻrsatilgan jinoyatlar jumlasiga kirmaydigan ogʻir va oʻta ogʻir jinoyatlarni sodir etganlik uchun ilgari hukm qilinganlar;
c) a) va b) bandlarda koʻrsatilgan jinoyatlarni sodir etganlik uchun oʻziga nisbatan jinoyat ishi ayblilik toʻgʻrisidagi masala hal qilinmay turib tugatilganlar;
d) farzandlikka olishga monelik qiladigan kasalliklarga chalinganlar, ularning roʻyxati Vazirlar Mahkamasi tomonidan tasdiqlanadi.
Shuningdek, farzandlikka oluvchilar va farzandlikka olinuvchilar yoshidagi farq 15 yoshdan kam boʻlmasligi shart qilib belgilandi, bundan oʻgay ota va oʻgay ona yoki farzandlikka oluvchining yaqin qarindoshlari tomonidan farzandlikka olish hollari mustasno.
Amudaryo tumani yuridik xizmat koʻrsatish
markazi boshligʻi N.Jumaniyazova