Янгиликлар
11
MÚDDETINEN ALDÍN DAWÍS BERIWDI ShÓLKEMLESTIRIW
MÚDDETINEN ALDÍN DAWÍS BERIWDI ShÓLKEMLESTIRIW
Múddetinen aldın dawıs beriw tártip-qaǵıydasına kóre, saylaw kúni óz jasaw ornında bolıw imkaniyatına iye bolmaǵan saylawshı múddetinen aldın dawıs beriw huqıqına iye.
Ulıwmalıq tártipke kóre, Ózbekstan Respublikası Prezidenti saylawı puqaralardıń dawıs beriwine tiykarlanadı. Dawıs beriw – hár bir puqaranıń mámleket basshısın saylawday Konstituciyalıq huqıqın realizaciya etiwdiń forması esaplanadı. Hár bir saylawshı bir dawısqa iye. Dawıs beriw huqıqı,
óz qálewin bildiriw teńligi hám erkinligi Saylaw kodeksi menen kepillenedi.
Saylaw kodeksiniń 57-statyasına kirgizilgen qosımshaǵa kóre, endigiden bılay Ózbekstan Respublikası Prezidenti saylawında múddetinen aldın dawıs beriwdi ótkeriw waqtı tiyisli okruglik saylaw komissiyası tárepinen emes, bálkim Oraylıq saylaw komissiyası tárepinen belgilenedi.
Uchastkalıq saylaw komissiyası tárepinen saylawshılar dizimin anıqlastırıw jumısları alıp barılıp atırǵan waqıtta puqaralarǵa múddetinen aldın dawıs beriwdi ámelge asırıw imkaniyatı hám basqa huqıqlar túsindiriledi.
Saylaw uchastkası aymaǵında waqtınshalıq jasap atırǵan puqaralar tárepinen múddetinen aldın dawıs berilgende uchastkalıq saylaw komissiyası aǵzası múddetinen aldın dawıs bergen saylawshını Saylaw procesin basqarıwda málimleme sistemasınan izlep tabadı hám múddetinen aldın dawıs bergen saylawshı sıpatında belgileydi hám de bul haqqında puqaralar turaqlı jasaytuǵın uchastkalıq saylaw komissiyasın xabardar etedi.
Múddetinen aldın dawıs beriw saylawǵa on kún qalǵanda baslanadı hám saylawǵa úsh kún qalǵanda juwmaqlanadı. Bul haqqında saylawshılardıń, baqlawshılardıń itibarına ǵalaba xabar quralları arqalı jetkeriledi.
Múddetinen aldın dawıs beriwdi ámelge asırıw ushın saylawshı saylaw kúninde bola almawınıń sebepleri (dem alıs, xızmet saparı, shet elge shıǵıw hám basqa) kórsetilgen arza tiykarında sonday-aq, shaxsın tastıyıqlawshı hújjetti usınǵannan keyin tiyisli uchastkalıq saylaw komissiyasınan saylaw byulletenin aladı.
Uchastkalıq saylaw komissiyası saylawshıdan saylaw kúninde bola almawınıń sebeplerin tastıyıqlawshı qosımsha hújjetlerin talap etiw qadaǵan etiledi.
Saylawshı saylaw byulletenin alǵanlıǵı haqqında tiyisli uchastkalıq saylaw komissiyasınıń keminde eki aǵzası qatnasında saylawshılar dizimi kóshirmesine imza qoyadı.
Saylaw byulleteni arnawlı úskenelengen jasırın dawıs beriw kabinasında yamasa xanasında saylawshı tárepinen toltırıladı.
Saylawshı qarar qabıl etedi. Oǵan kesent etiwge hesh kimniń haqısı joq. Ol ózi tárepinen toltırılǵan saylaw byulletenin jabıq konvertte qaldıradı.
Konvert tiyisli uchastkalıq saylaw komissiyasınıń seyfinde saqlanadı. Konverttıń jelimlengen ornına uchastkalıq saylaw komissiyası eki aǵzasınıń imzaları qoyılıp, olar komissiyanıń móri menen tastıyıqlanadı. Sonıń menen saylawshınıń múddetinen aldın dawıs beriw processi tamamlanadı.
Nasiba Qutlımuratova,
Huqıqıy úgit-násiyat hám aǵartıwshılıq bólimi
bas másláhátshisi