Янгиликлар
08
Nızamshılıqtaǵı jańalıqlar Bakalavriat basqıshı studentleri ushın Prezident hám mámleketlik stipendiyaların tayınlaw tártibi tastıyıqlandı
Nızamshılıqtaǵı jańalıqlar
Bakalavriat basqıshı studentleri ushın Prezident hám mámleketlik stipendiyaların tayınlaw tártibi tastıyıqlandı
Ózbekstan Respublikası Ministrler Kabinetiniń 2021-jıl 4-noyabrdegi 674-sanlı qararı menen Húkimettiń ayırım qararlarına ózgeris hám qosımshalar kirgizildi.
Kirgizilgen qosımshalarǵa muwapıq, bakalavriat hám magistratura basqıshları studentleri ushın Prezident hám mámleketlik stipendiyalardı tayınlaw tártibi óz aldına tastıyıqlandı.
Prezident stipendiyası hár bir JOO bakalavriat basqıshı studentlerinen 1 (bir) pitkeriwshi kurs studentine tayınlanadı.
Basqa mámleketlik stipendiyalar sońǵı eki kursta oqıp atırǵan studentlerge tólenedi.
Stipendiyalar ushın talabanlardı kórsetiw JOO keńesleri tárepinen talabanlardıń oqıw hám ilimiy jumısların ǵalabalıq dodalaw tiykarında ámelge asırıladı.
JOO keńesi qararına muwapıq, tańlawlardıń gezektegi basqıshına usınıs etilgen talabanlar «stipendiya.edu.uz» sistemasına hár jılı 1-15-avgust kúnleri kirgiziledi.
Stipendiya tayınlaw haqqındaǵı usınısnamalardı beriw 10-30-sentyabr kúnleri kórip shıǵıladı.
Stipendiyalar 1-sentyabrden tayınlanadı.
Magistratura qánigeliklerine qosımsha qabıllawǵa ruqsat berildi
Mámleketlik joqarı oqıw orınlarına 2021-2022-oqıw jılı magistratura qánigelikleri boyınsha kiriw imtixanlarında qatnasıp, qánigelik pánnen belgilengen maksimal balldıń 40 payızı (40 ball) hám onnan joqarı ball toplaǵan abiturientlerdi tiyisli joqarı oqıw ornı tárepinen belgilengen tólemli-kontrakt tiykarında ballar izbe-izligine qatań ámel etken halda qosımsha qabıllawǵa ruxsat berildi.
Magistratura kiriw imtixanlarında qatnasıp, joqarıdaǵı talaptı orınlaǵan talabanlar joqarı oqıw orınlarınıń qabıllaw komissiyasına 2021-jıl 9-noyabrden baslap múrájat etiwi múmkin.
Tólew shártnama muǵdarınıń keminde 50 payızın orınlawdıń sońǵı múddeti 2021-jıl 20-noyabr etip belgilendi.
Ózbekstan Respublikası Prezidentiniń 2021-jıl 22-iyundaǵı PQ-5157-sanlı qararına muwapıq, magistratura qánigeliklerine qosımsha qabıllaw tólemli-kontrakt muǵdarı bir studenttiń oqıwı ushın jumsalatuǵın qárejet muǵdarınan kelip shıqqan halda joqarı oqıw ornı tárepinen belgilenedi.