Янгиликлар
01
“Sport úgit násiyatshısı” qosımsha wazıypası júkletilgen xızmetkerlerge ústeme pulları tólenbegen
“Sport úgit násiyatshısı” qosımsha wazıypası júkletilgen xızmetkerlerge ústeme pulları tólenbegen
Qaraqalpaqstan Respublikası Ádillik ministrliginiń Insan huqıqların qorǵaw bólimi hám Ózbekstan Respublikası Oliy Majlisiniń Insan huqıqları boyınsha (Ombudsman) aymaqlıq wákili tárepinen Ózbekstan Respublikası Prezidentiniń 2020-jıl 30-oktyabr kúngi “Salamat turmıs tárizin keńnen úgit-násiyatlaw hám ǵalabalıq sporttı bunnan bılay da rawajlandırıw ilajları haqqında”ǵı PP-6099-san Pármanı talaplarınıń mámleketlik uyım hám shólkemler tárepinen orınlanıwı jaǵdayı tiyisli hújjetlerdi aldırıw jolı menen úyrenildi.
Úyreniw dawamında, jergilikli hákimlikler, Qaraqalpaqstan Respublikası Mámleketlik Salıq basqarması, Qaraqalpaqstan Respublikası Mektepke shekemgi bilimlendiriw ministrligi, Qaraqalpaqstan Respublikası Den-sawlıqtı saqlaw ministrligi hám Qaraqalpaqstan Respublikası Turizm hám sport bas basqarması hámde olardıń ayırım rayon (qala) bólimleri tárepinen jámi 36 “Sport úgit násiyatshısı” qosımsha wazıypası júkletilgen xızmetkerlerge 70.763.764 sumlıq ústeme pulları tólenbesten turǵanlıǵı anıqlandı.
Sonday-aq, Qaraqalpaqstan Respublikası Transport ministrligi, Qaraqalpaqstan Respublikası Sanitariya-epidemiologiyalıq tınıshlıq hám jámiyet salamatlıǵı basqarması, Kadastr agentligi Qaraqalpaqstan Respublikası basqarması, Mámleketlik Kadastrlar palatası Qaraqalpaqstan Respublikası basqarması, Qaraqalpaqstan Respublikası Statistika basqarması hám Agrosanoat kompleksi ústinen baqlaw inspekciyasınıń Qaraqalpaqstan Respublikası basqarmaları tárepinen tiyisli xızmetkerlerge “Sport úgit násiyatshısı” qosımsha wazıypasın júklew hám onıń bazalıq lawazım is haqısına 20 payız muǵdarında ústeme belgilew Pármanda belgilengen múddetten 5-8 ay ótip ámelge asırılǵanlıǵı anıqlandı.
Bunnan tısqarı, Qaraqalpaqstan Respublikası Ekologiya hám qorshaǵan ortalıqtı qorǵaw komitetinde Pármanda belgilengen talaplar úyreniw kúnine shekem orınlanbaǵanlıǵı yaǵnıy, tiyisli xızmetkerge “Sport úgit násiyatshısı” qosımsha wazıypası júkletilmegenligi anıqlandı.
Sonıń menen bir qatarda, Pármanda “Sport úgit násiyatshısı” qosımsha wazıypasın miynet jámiyetlerinde jumıs alıp barıp atırǵan xızmetkerge júklew názerde tutılǵan bolsa da, Qaraqalpaqstan Respublikası Xalıq bilimlendiriw ministrligi tárepinen ministrliktiń tiyisli buyrıǵına tiykar “Sport úgit násiyatshısı” qosımsha wazıypası Ózbekstan “Yoshlik” dene tárbiya hám sport jámiyeti Qaraqalpaqstan aymaqlıq bólimi trener-oqıtıwshısına júkletilgenligi anıqlandı.
Anıqlanǵan nızam buzılıw jaǵdayların saplastırıw boyınsha ministrlik tárepinen tiyisli mákeme hám shólkemlerge 10 usınıs, ámeldegi miynet nızamshılıǵı talapların buzǵan lawazımlı shaxslardı hákimshilik juwapkershilikke tartıw máselesin kórip shıǵıw boyınsha Qaraqalpaqstan Respublikası Bántlik hám miynet qatnasıqları ministrligi hám onıń rayon (qala) oraylarına jámi 31 hákimshilik usınıs hámde tiyisli sudlarǵa 65.742.452 sumlıq 34 dawa arzalar kiritildi.
Insan huqıqların qorǵaw
bólimi baslıǵı E.Utepov.