Янгиликлар
10
Ózin-ózi bánt etken shaxs sıpatında ǵárezsiz miyirbiykelik penen shuǵıllanıwǵa ruqsat beriledi
Ózin-ózi bánt etken shaxs sıpatında ǵárezsiz miyirbiykelik penen shuǵıllanıwǵa ruqsat beriledi
Húkimet qararı (578-san, 17.09.2021-j.) menen ózin-ózi bánt etken shaxs sıpatında “miyirbiykelik isi” jumısın ámelge asırıw tártibi haqqındaǵı reje tastıyıqlandı.
Rejege kóre, ózin-ózi bánt etken shaxs sıpatında “ miyirbiykelik isi ” jumısı menen shuǵıllanıwǵa orta medicinalıq (miyirbiykelik isi, emlew isi, akusherlik isi) yamasa joqarı miyirbiykelik isi boyınsha joqarı maǵlıwmatqa iye bolǵan, mámleketlik yamasa mámleketlik emes medicinalıq shólkeminde islemeytuǵın shaxslarǵa (miyirbiyke) ruqsat beriledi.
Bunıń ushın miyirbiyke arnawlı mobil qosımsha yamasa salıq tólewshiniń jeke kabineti arqalı yamasa mámleketlik salıq xızmeti uyımına kelgen halda dizimnen ótedi.
Miyirbiykege maǵlıwmatnama rásmiylestirilip, sol tiykarda Den-sawlıqtı saqlaw ministrliginiń málimleme baǵdarlamasında dizimnen ótedi hámde ǵárezsiz miyirbiyke sıpatında jumısın baslaydı.
Ǵárezsiz miyirbiyke málimleme baǵdarlamasında maǵlıwmatlardı tikkeley ózi kirgiziwi yamasa rayon (qala) kóp tarmaqlı oraylıq poliklinikalarǵa kelgen halda málimleme baǵdarlamasında dizimnen ótiwi múmkin.
Bunda mamanlıq haqqındaǵı sertifikat bolıwı talap etiledi, ǵárezsiz miyirbiyke bilimlendiriw shólkemin tamamlaǵanlıǵına 3 jıl bolmaǵan jaǵdayda usı sertifikat talap etilmeydi.
Sorawnama toltırılǵannan keyin usı jumıs penen shuǵıllanıw imkaniyatın beriwshi gúwalıq avtomatik tárizde rásmiylestiriledi.
Gúwalıq sheklenbegen múddetke berilip, onı rásmiylestiriwde haqı óndirilmeydi.
Rejege kóre, ǵárezsiz miyirbiykeniń shıpaker kórsetpesisiz hámde onıń usınısı tiykarında xalıqqa ǵárezsiz medicianlıq másláhát hám emlerdi islew boyınsha huqıqları belgilendi.
Sonday-aq, ǵárezsiz miyirbiykege sterilizaciya etiliwi talap etiletuǵın medicinalıq buyımlardan paydalanǵan halda xalıqqa medicinalıq emlerdi islewge, dári ónimlerin qabıl etiwde keri tásir jaǵdayın anıqlaw maqsetinde qoyılǵan sınaw jaǵdayın bahalawǵa ruqsat etilmeydi.
Ǵárezsiz miyirbiyke jumısın ámelge asırıwdaǵı háreketleri (háreketsizligi) ushın jeke ózi juwapker boladı.
Esletip ótemiz, usı iskerlik penen Prezident pármanına tiykar, Den-sawlıqtı saqlaw ministriliginiń tiyisli málimleme sistemasında 2022-jıl 1-yanvardan baslap dizimnen ótken shaxslar shuǵıllanıwı múmkin.