Янгиликлар
27
Nókis qalası hám barlıq rayonlarda Yuridikalıq xızmet kórsetiw orayları óz jumısın baslamaqta
Ózbekstan Respublikası Prezidentiniń 2021-jıl 29-iyun kúni qabıl etilgen «Mámleketlik uyımları hám shólkemlerine yuridikalıq xızmet kórsetiw iskerligin elede jetilistiriw is-ilájları haqqında»ǵı PQ-5168-sanlı qararında usı jıldıń 1-oktyabr sánesinen baslap Respublikamızdıń barlıq rayon (qala)larında Yuridikalıq xızmet kórsetiw orayların shólkemlestiriw belgilengen.
Qaraqalpaqstan Respublikasındaǵı usı Oraylarda jámi 78 xızmetker iskerlik kórsetedi.
Búgin Ózbekstan Respublikası Ádillik ministrligi tárepinen dúzilgen isshi topar aǵzaları Moynaq, Qońırat, Qanlıkól, Ámiwdár'ya, Beruniy, Tórtkúl, Ellikqala rayonlarında usı Qarardıń mazmun-mánisin túsindiriw hám orınlanıwın támiyinlew máseleleri boyınsha seminar ótkerdi.
Seminarǵa rayondaǵı mámleketlik uyım hám shólkemleriniń juwapker xızmetkerleri qatnastı.
Sonday-aq, Isshi topar aǵzaları yuridik xızmet kórsetiw oraylarındaǵı sharayatlar menen tanısıp, oray xızmetkerlerine metodikalıq járdem kórsetpekte.
Oraylar Yuridikalıq xızmet kórsetiw orayları haqqındaǵı Rejege tiykar, Oraylar tárepinen yuridikalıq xızmet kórsetiwi belgilengen mámleketlik uyım hám shólkemler (12ni quraydı)ge biypul, sonday-aq shártnama tiykarında basqa yuridikalıq shaxslarǵa pullı tiykarda yuridikalıq xızmet kórsetedi.
Oraydıń tiykarǵı wazıypası:
➖yuridikalıq xızmet kórsetiletuǵın mámleketlik uyım hám shólkemleri iskerligin huqıqıy tárepten támiyinlew;
➖mámleketlik shólkemlerine sapalı yuridikalıq járdem kórsetiw;
➖mámleketlik shólkemler xızmetkerleriniń huqıqıy sawatlılıǵı hám huqıqıy mádeniyatın asırıw;
➖ mámleketlik shólkemlerdiń múlkiy hámde basqa huqıqları hám nızamlı máplerin óz waqtında, hár tárepleme hám nátiyjeli qorǵalıwın támiyinlew;
➖ mámleketlik shólkemler tarepinen qabıl etilip atırǵan hújjetlerdiń nızamlı hámde hár tárepleme puqta hám sapalı bolıwın támiyinlewden ibarat.