Янгиликлар
08
Nızamsız qollanılǵan hákimshilik jaza sharaları biykarlandı
Nızamsız qollanılǵan hákimshilik jaza sharaları biykarlandı
Taqıyatas rayonı ádillik bólimi tárepinen rayonlıq ishki isler bóliminiń Migraciya hám puqaralıqtı rásmiylestiriw bólimshesinde (keyingi orınlarda Bólimshe dep júritiledi) Ózbekstan Respublikası Hákimshilik juwapkershilik kodeksiniń (keyingi orınlarda Kodeks dep júritiledi) 223-statyasında kórsetilgen huqıqbuzarlıq isleri boyınsha rásmiylestirilgen hákimshilik bayanlamalar, kórilgen hákimshilik isler, qollanılǵan jaza sharaları nızamlılıǵı belgilengen tártipte úyrenilip shıǵıldı.
Anıqlanıwınsha, G.K. atlı puqara 2020-jıl 7-mart kúni ózine tiyisli bolǵan puqaralıq pasportın joytıp alǵanlıǵı tuwralı Taqıyatas rayonlıq ishki isler bólimine arza menen múrájat etken. Usı halat boyınsha G.K. atlı puqara qarsısına Kodekstiń 223-statyası 1-bóliminde názerde tutılǵan hákimshilik huqıqbuzarlıq islegenligi sebepli bólimshe baslıǵı A.E. tárepinen huqıqbuzardıń huqıq hám minnetleri bilgilengen tártiplerde túsindirilmesten UZ 0831334-sanlı hákimshilik bayanlama rásmiylestirilip, huqıqbuzardı bazalıq esaplaw muǵdarınıń 2/1 esesi muǵdarında járiymaǵa tartıw haqqında qarar qabıl qılǵan hám járiyma mámleket paydasına óndirilgen.
Bunday jaǵday, 2020-jıl 8-sentyabr kúni J.R. atlı puqaranıń puqaralıq pasportın joytıp alǵanlıǵı boyınsha onıń qarsısına rásmiylestirilgen UZ 0831356-sanlı hákimshilik bayanlamada jol qoyılǵanlıǵı anıqlandı.
Qalaberse, G.K. hám J.R. atlı puqaralardıń qarsısına rásmiylestirilgen hákimshilik huqıqbuzarlıq isi menen tanısıp shıqqanımızda, Kodekstiń 245, 303, 3031, 307 hám 308-statyalarında názerde tutılǵan talapları tiykarında, hákimshilik huqıqbuzarlıq haqqındaǵı isti kórip shıǵıw waqtında bayanlama júritetilmegenligi, isti ob'ektiv hám qalıs sheshiw maqsetinde huqıqbuzarlardıń qatnasında kórilip shıǵılıwı támiyinlenbegenligi, kórip shıǵıw waqtı hám ornı tuwralı oǵan xabar berilmegenligi hám huqıqbuzarlıq islengen yaki islenbegenligi anıqlanbaǵanlıǵı málim boldı.
Ózbekstan Respublikası Oliy sudi Plenumınıń 2018-jıl 30-noyabr kúngi “Sudlar tárepinen hákimshilik huqıqbuzarlıq haqqındaǵı islerdi kóriwdi tártipke salıwshı nızamlardı qollawdıń ayırım máseleleri haqqında”ǵı 35-sanlı qararında, hákimshilik juwapkershilikke tartılıp atırǵan shaxs huqıqlarınıń buzılıwı hákimshilik juwapkershilikke tartıw haqqındaǵı qararın biykarlaw ushın tiykar bolatuǵınlıǵı kórsetilgen.
Sonday-aq, Kodekstiń 3321-statyası 1-bóliminde huqıqbuzar oǵan járiyma salıw haqqındaǵı qarar tapsırılǵan kúnnen baslap on bes kún ishinde járiyma muǵdarınıń jetpis payızın ıqtıyarıy ráwishte tólegen jaǵdayda, onıń járiymanıń qalǵan bólegin tólewden azat qılınatuǵınlıǵı kórsetilgen bolıwına qaramastan bólimshe tárepinen G.Ya atlı puqaraǵa 2020-jıl 19-avgust kúni rásmiylestirilgen UZ 0831356-sanlı hákimshilik bayanlama tiykarında 111.500 sum járiyma qollaw haqqında qarar shıǵarılıp, usı kúnniń ózinde qararda kórsetilgen járiyma muǵdarı tolıq óndirilip alınǵan.
Sonlıqtan, Ózbekstan Respublikası Prezidentiniń 2018-jıl 13-aprel kúngi
PQ-3666-sanlı Qararı menen tastıyıqlanǵan “Ózbekstan Respublikası Ádillik ministrligi haqqında”ǵı Rejege muwapıq, Taqıyatas rayonlıq ishki isler bólimine usınıs kirgizilip, tiykarsız qabıl etilgen hákimshilik jaza qollaw haqqında qararları biykar etildi hám nızambuzılıwshılıqlar saplastırıldı.
Abatov Amangeldi Paraxatovich,
Taqıyatas rayonı
ádillik bólimi baslıǵı