Янгиликлар
25
Ádillik bólimi tárepinen kirgizilgen usınısqa tiykar, xızmetker perzentin kútip qaraw dem alısınan keyin jumısqa qayta ornalastı
Ádillik bólimi tárepinen kirgizilgen usınısqa tiykar, xızmetker perzentin kútip qaraw dem alısınan keyin jumısqa qayta ornalastı
Nókis rayonı “Aqmanǵıt” PPJ aymaǵında jasawshı puqara V.K. 2015-jılda rayondaǵı Medicina birlespesi Tuwıw bóliminen perzentin kútip qaraw dem alısına shıqqanlıǵın, 2019-jıldan berli perzentin kútip qaraw dem alısınan shıǵıp jumısqa kirisiw boyınsha xabarlasqanda jumıs ornı joq ekenligin bildirgenliginen narazı bolıp jazǵan múrájatı úyrenip shıǵıldı.
Υyreniw dawamında, V.K. 2011-jıl 7-iyul kúni Medicina birlespesi Tuwıw bóliminde waqtınsha múddetli miynet shártnamsı tiykarında, yaǵnıy G.B.nıń (perzentin kútip qaraw dem alısınan kelemen degenge shekem) ornına náwbetshi miyirbiyke etip jumısqa qabıl etilgenligi hám 2015-jıldan berli (qatara 2 márte perzentli bolǵanlıǵı sebepli) perzentin kútip qaraw dem alısında otırǵanlıǵı anıqlandı.
Ózbekstan Respublikası Miynet kodeksiniń (keyingi orınlarda kodeks dep júrgiziledi) 150-statyasına tiykar, múddetli shártnama múddeti tamamlanıwı menen biykar etiledi dep kórsetilgen, biraq usı kodekstiń 237-statyasına tiykar, hámiledar hayallar hám 3 jasqa tolmaǵan balası bar hayallar menen dúzilgen miynet shártnamasın jumıs beriwshiniń baslaması menen biykar etiwge jol qoyılmaydı, qárxananıń saplastırılıwı bunnan tısqarı, bunday jaǵdaylarda miynet shártnaması olardı álbette jumısqa jaylastırıw shárti menen biykar etiledi.
Múddeti tamamlanǵanlıǵı sebepli miynet shártnaması biykar etilgen jaǵdaylarda da jumıs beriwshi jumısqa jaylastırıwı shárt dep kórsetilgen.
Kodekstiń 234-statyası 2-bólimine tiykar, hayalǵa onıń qálewine qarap, balası 3 jasqa tolǵanǵa shekem perzentine kútip qaraw ushın is haqı saqlanbaǵan halda qosımsha dem alıs ta beriledi, yaǵnıy bunda xızmetkerdiń arzasına tiykar 1 jılǵa shekem sozıladı hám bul mákemedegi “Kadrlar bólimi” tárepinen rásmiylestiriledi.
Bunnan tısqarı 234-statyanıń 5-bóliminde perzentin kútip qaraw dem alısı dáwirinde hayaldıń jumıs ornı (lawazımı) saqlanadı. Bul dem alıslar miynet stajına biraq hámmesin qosqanda kóbi menen 3 jıl sonday-aq, qánigeligi boyınsha is stajına da qosıladı dep belgilengen.
Joqarıdaǵılarǵa kóre, bólim tárepinen puqara V.K.nıń huqıq hám nızamlı máplerin qorǵaw maqsetinde medicina birlespesine usınıs kirgizildi, usınısqa tiykar V.K. medicina miyirbiykesi lawazımına jumısqa qayta ornalastı.
Aysanem Abdikadirova,
Nókis rayonı Ádillik bólimi
bas másláhátshisi